Read Vaiphei NEHEMIAH 9 Bible Online

NEHEMIAH 9 - Vaiphei bible

NEHEMIAH 9

¹Zia tha ah a ni sawmni leh li ni chun, Israel mipite chu anngawl ah saidip puan sil in, leivui kibuak khum in a kikhawm tau a.

²Tichun, Israel suante lak ah gam dang mi lak ah kisuthiangte zosia chu hung dingdok in, amau leh a pu leh pateu gitlonate leh khawlonateu zosia a kiphuang jak tau a.

³Chuleh, a umnau mun chiat ah dingdok in, LALPA a Pathian uh dan lekhabu chu dakkal thum sung simdaw’na a nei un, a gitlonau thupha choina leh LALPA a Pathian uh hona’n dakkal thum sung ma a mang tau a.

⁴Ziaphatchun, Jeshua, Bani, Kadmiel, Shebaniah, Bunni, Sherebiah, Bani leh Chenani te chu Levite khangdaw chung ah ding in, aw ngai tak in LALPA a Pathian kiang in a pauchap tau a.

⁵Ziaphatchun, Levite, Jeshua, Kadmiel, Bani, Hashabneiah, Sherebiah, Hodiah, Shebaniah leh Pethahiah te chun, “Ding unla, LALPA I Pathian uh chu kumtuang ah kipat kumtuang in pakcha tau in. LALPA, la min lopi tak chu, maljawlna leh pâkna zosia chung ah choisa’n in um ta hen,” a hun ti tau a.

⁶Chun, Ezra in, Nangma bep hi LALPA chu la hi; nang in van leh a sung ah um zosia leh, lei leh a chung ah um zosia leh, tuisuagiat leh a sung ah um zosia hi la siam ah. A leng un hinna la pia’n, van lam ah um zosia’n le a hun ho ui.

⁷Nangma LALPA, Kaldaite gam ah Ur khua kipat Abram kodok ah Abraham ti minsak pa Pathian chu la hi;

⁸nang in a lungthim chu nang lam ah ginum lasak ziakin, zia Kanaan mite, Hit mite, Amor mite, Periz mite, Jebus mite leh Girgash mite gam hi a suante luasak ding ah piak la la tiam ta’n; chuleh, la diktat ziakin la thutiam chu la guitunsak hi.

⁹Aigupta gam ah ka pu leh pateu genthei dan kha la mu’n; chuleh, Tuipi San pang ah a pauchapnau khale la hia’i.

¹⁰Nang in Pharaoh leh a suakte zosia leh, a mipite zosia’n ka pu leh pateu chung ah kiletsak takah a bawl uh thukna’n, tepte’na leh thilmak tam tak la la bawl khawlaw ta’n. Tichun, tu’ni tiang dai dingin la minthanna la koi tai.

¹¹Chuleh, lei hul ah a gâl kâi theina ding un, a ma-âng un Tuipi San chu la la khên tan a; himaleh, amau delzuite chu suangtum, tuili lai ah kikhelut gual in, tuili sung in la sep lut tai.

¹²Zia bep chule hilo in, sun ah sûmpi ding leh jan ah meikuang dingin, a chiana ding uh lampi salvâk in la pui pek a.

¹³Sinai tâng ah khan van ah kipat in la hung kum suk ah; tichun, a kiang un thu la gen ah; chuleh, vaihawmna dan leh ki-etkolna dan dik takte leh thuguat leh thupiak pha takte chule la pia ahi kha;

¹⁴chuleh, la suak Mosi mangcha’n, la sabbath thiangtho hiatsak in, thupiak leh thuguatte le la pia’i; chuleh, ki-etkolna ding dantele la la pia ahi kha.

¹⁵A gilkial phat un van ah kipat in vaithum la pia, a dangchâk phat un suangpi ah kipat in tui la luandaw sak in; chuleh, a kiang ua piak la tiamna gam lam ah chia ah luaden dingin la hil tai.

¹⁶Himaleh, ka pu leh pateu khan, kisathei tak leh lu’lul tak in la thupiakte kha a la mang nuam ta puau a;

¹⁷la thu nial in, a lak ua la thilbawl mak tak takte khale a la ngaisak puau hi; ahi’n, kihi’ lu’lul in, Aigupta gam ah a suak channau lam ma’n kile’kit a tup tau a. Himaleh, nang chu Pathian ngaidam pei, mi hepi thei, lainatna dim, jaidaw leh chitna hau la hiziak in, amau haw chu la thâthawt puai.

¹⁸Bawngno lim a kisiam un, “Zia hi Aigupta gam ah kipat hun puidokpa, la Pathian uh chu ahi,” ti ah a hun gensiat lai unle,

¹⁹la ja’ngaina nasat ziakin, gamthip ah khan la nusia pua’n; sûn ah amau pui huai sûmpi kitung leh, jan ah a chianau lampi salvâk ding meikuang ah la puile la haisan diak puai.

²⁰Amau zilsak dingin la thagau pha chu la pia; a kam ua kipat in la Manna la jukdok kit pua’n, a dangchâknau sudai dingin tuile la pia ahi.

²¹Kum sawmli sung ving veng gamthip ah bangma tasam lo dingin la vâk ah; a sil leh chênteu a sia pua’n, a keng uh le a vûng diak puai.

²²Chuleh, lenggam leh mipite le a khut un la pia, a kil a kawm tiang a lua ding un la pia’i. Tichun, Heshbon ah Sihon Lengpa gam leh Bashan ah Og Lengpa gam haw chule a lua tau hi.

²³A suan leh pâkteu chu van lam ah aksite jat in la sukpun piakah, a pu leh pateu kiang ah piak la tiamna gam chu lut ah lua dingin la pui tung tai.

²⁴Tichun, a suan a pâkteu a lut un, a valua tau ah; a gam ah a la chêngsa Kanaan mite haw chu la tawden piak ah, a khut un la pedok ah, a nop dan dan ua a khoi thei ding un a lengteu leh a mipiteu chu la pedok tai.

²⁵Tichun, kul nei khawpite leh gam hausa tak chu a lau ah, thuamthil chitin ah dim, tuikhukte, grep huante, Oliv huante, nêk sên lo theiga kungte leh a Inteu chu a lua tau hi; tichun, nevâ in, a thau zo tau a, la thilpha chitin piakte chu kinoptelna’n a mang tau hi.

²⁶Chutisapi’nle, thu a mang puau ah, a hun do nalai lai un; la dan thute chu nungngat in, nang lam ah a kihei kitna ding ua thumop la jawlneiteu chu a la that un, nasa tak in la min a gensia tau hi.

²⁷Ziaziakchun, a mêlmateu khut in la pedok ah, amau chun nasa tak in a sugenthei tau hi. A genthei lai tak ua nang a hun ko thawm uh van ah kipat in la ngaithâk piak ah; tichun, la ja’ngaina a nasat dungzui in a mêlmateu lak ah kipat hukdok ding la pia ahi kha.

²⁸Himaleh, gâl muang tak ah a hung um phat un, la chung in thil phalo tak a hun bawl kit tau a; tichun, a mêlmateu in a chung ua thu a nei khum theina ding un la nusia ah; himaleh, hung kile’kit ah, a hun ko uh chun, van ah kipat in la ngaitha’n, la ja’ngaina hau dungzui in vêl tam tak la hukdok ta ahi kha.

²⁹Chuleh, la dan a zuitheina ding un la vauhil ah. A Chutisapi’nle kisathei tak ah um in, la thupiakte chu zui lo in, kua’nle a zui ah a hintheina ding ua thuguatte chu a botsiau ahi kha. A kisulochal ua, a ngawng uh hikhau in a ngaitha nuam puau hi.

³⁰Kum tam tak a chung un la dawthei ah, la jawlneite mang in la thagau chun la vauhil zing ah; himaleh, a ngaitha nuam diak puau hi. Ziaziakchun, a gam ah mite khut in la la pedok ta ahi.

³¹Chuti maleh, la ja’ngaina a nasat ziakin amau chu sumangthai ziang lo in, la nusia diak puai; nang mi hepina dim leh ja’ngaina hau Pathian la hiziak in.

³²Ziaziakchun, tu’hin ka Pathian uh, Pathian lopi leh Bangkim bawlthei, lau um, thuthung hezing ah, ja’ngaina ah dim chun, kei uh chung leh ka lengteu, ka pu leh pateu leh la mite zosia chung ah, Assuria lengte hun ah kipat tu’ni tiang ah haksatna ka tuakteu hi ngainêp ziang kin la;

³³ka chung ua la thil hun tunsak zosia ah hin nang chu la dik ah, nang in dik tak in la bawl hi; kei un vang nunsia tak in ka la bawl zo tau hi;

³⁴ka lengteu, ka vaihawmteu, ka thiamputeu leh ka pu leh pateu khan la dan a la zui puau ah; chuleh, la thupiakte leh la vauhilna thute le a ngaitha nuam puau hi.

³⁵A gam sung nasan un, a chung ua la phatna nasa tak ah la jangvuksa, gam lian leh hausa tak la piak inle, nang â dingin a sêm nuam puau in, a thilbawl uh nunsia takte chu a haisan nuam diak puau hi.

³⁶Zia tak ah hin, tu’ni tiang hin, ka pu leh pateu in a gate leh la thilpiak pha tincheng a nopchên ding ua la piakna gam sung ah hin, mi suak leh sal ah um ka hi nâk lai uh tawh.

³⁷A gam ga pha zosia chu, ka gitlo ziak ua ka chung ua leng hiding ah la guatte chun a kinêk un; amau chun ka taksau leh ka gan-gualteu chung ah a nop a ning ua bawltheina thahâtna a nei un, ka lung uh a kham ma ma tai, ti’n a pauchap tau a.

³⁸Ziaziakchun, thuthung det tak siam in ka zikdok tau ah, zia thu kizik ah chun ka gam vaihawmteu, Levite leh thiampute min chu a chuang hi.