Read Vaiphei ESTHER 1 Bible Online

ESTHER 1 - Vaiphei bible

ESTHER 1

¹Ahasueras , India gam ah kipat Ethiopia tiang ah gambung za sawmni leh sagi chung ah vaihawmpa, zia Ahasueras ma ma lal lai ah chun zia gual hi a hung tung a.

²Zialai hun ah chun Lengpa Ahasueras chu a lenggam khawpi Susa ah lalchutpha a kichut lai in,

³a lal kum, kum thumna chun, a miliante zosia leh siamângte zosia â dingin, luaithe’na lopi tak a siam ah. Persia leh Media gam sung ah sepaite tawh, miliante leh gambung tin ah uktute zosia chule a kim kei un;

⁴ni za leh sawmgiat sung zet chu, a lenggam hausak dan leh a lopi dan leh nasat dan zosia chu a etsak a.

⁵Zia hunte chu a kichai phatin, Susa khawpi sung ah mipi zosia, mi lian leh mi neute â dingin, Lengpa chun a huan sung in ni sagi sung luaithe’na a siam a.

⁶Zia tak mun chu puanjak vâm leh a dumte, puan malngat sandup, khauhual sandup ah dangka kuaikâ, suangvam khuamte ah kikhâi a um a. Chuleh, sana leh dangka ah chutna kisiamte chu, tuanglai suang chi chuam chuam leh, suang mantam chi chuam chuam ah kisiamte chung in a dawu a.

⁷Sana no, a chi chuam chiat ah kibawl haw chun uain kiningting tak in, lengpa hausak dungzui in a hawm ua.

⁸Uain chu a thawl in a hawm ua, mi tin in kisûm lo ah a du zat zat uh a dawn ding ua pia ding in, lengpa chun a lal In ah tuanvaite chu thu a pia tai.

⁹Zia bep chule hilo in, Lengnu Vashti chunle Ahasueras lal In sung ma ma ah chun, zia hun ah chun numeite â dingin a chuam in luaithe’na a siam a.

¹⁰Ni sagi a ti’n ni’ lengpa lungthim chu uain in a suklimte’n phat in, Lengpa Ahasueras â ding ah siamâng ah pangte Mehuman, Biztha, Harbona, Bigtha leh Abagtha, Zethar leh Karkas, mi tilge sagite chu sawl in,

¹¹Lengnu Vashti chu mêlpha ma ma ahi ziakin, a lallukhuk pum ah lengpa âng ah hung kilâk ah, mipite leh a milian leh lalte kiang ah a mêlphat dan hung etsak dingin thu a pia tai.

¹²Himaleh, Lengnu Vashti chun mitilgete’n chia ding ah lengpa thupiak a hung gen uh chu a la nial tai. Zia gual ah a la nialna ziak ah chun Lengpa lung chu na ma ma in, a siatchang a so tai.

¹³Ziaphatchun, lengpa chun dan leh mual thiamte chu a dong ah, dan leh vaihawm dan thiamte chu zia gual chun lengpa’n a la dot leh ho sek him ahi’n;

¹⁴lengpa bân tak ah thuneite chu Karshena, Shethar, Admatha, Tarshish, Meres, Marsena leh Memukante leh Persia leh Media gam sung ah milian pasagite, lengpa âng ah lut leh pawt sek, a lenggam sung ah milian ah pangte chiat chu a hiu ah; a kiang un:

¹⁵“Lengpa Ahasueras in a sawl mitilge thugen, dan lo gual tak ah a la nial, Lengnu Vashti chu dan dungzui ah bang law ding I hitau em?” ti’n a dong a.

¹⁶Ziaphatchun, Memukan in lengpa leh a miliante kiang ah chun, “Lengnu Vashti chun lengpa chung bep ah thil bawlkhial a hipua’n, a milian zosia leh Lengpa Ahasueras gambung zosia ah mipite chung ah le bawlkhial ahi.

¹⁷Zia lengnu thilbawl dan hi numei dangte zosia’nle hun hia’n tiu in, Lengpa Ahasueras in Lengnu Vashti chu a ma-âng ah hung ding dingin thu a pia’n; ahi’n la, a chia puai, ti thu hi a hung kithan chun, a pawsalteu hun simmaw khawlaw mai ding a hiu.

¹⁸Tu’ni ma ma hinle Persia leh Media gam sung ah numeite’n lengnu umchan hi a la het phat ua leh, lengpa miliante chung ah le zia gual ma chun a la bawl ngal mai ding a hiu; ziaphat chuleh, kinuaisiana leh lungnatna nasa tak hung um khawlaw mai ding ahi!

¹⁹Lengpa’n lem a sak chun, Lengnu Vashti chu Lengpa Ahasueras ma-âng ah hung lût kit talo dingin, Persia lengpa thupiak in puandaw hihen la, Persia leh Media gam dan lak ah sukdanglam thei lo dingin ziklut hi hen; chuleh, lengpa’n ama sâng ah phazaw, lengnu mun chu lua sak mai hen.

²⁰Chutia, lengpa thupiak chu, a gam chu lian maleh, a gam sung zosia ah thejak ahi ah, numei zosiate’n a pawsalteu chu lian in neu taleu, a ja chiat theina ding un,” ti’n a hun gen a.

²¹Zia thupuan chu lengpa leh a miliante chun pha a sa tau a; tichun, Memukan guanggal dungzui chun lengpa’n a bawl tai;

²²pawsal zosia chu amau In sung chiat ah a lian pen hiding ahi, ti ah mi tinte hiat thei dingin, a lenggam bung tin ah chun amau lekhamal leh amau pau chiat ah zik in, lekha chu a gambung zosia ah chun a thotjak tau hi.