Read Vaiphei ESTHER 2 Bible Online

ESTHER 2 - Vaiphei bible

ESTHER 2

¹Lengpa Ahasueras a lungdam phatin, Vashti leh a thilbawl dante leh a chungchâng ah thutanna a bawl haw chu a hun he tau a.

²Lengpa suak, a tawi leh chante chun a kiang in, “Lengpa ji dingin nungak mêlpha hawl hi hen la;

³numei enkol leh lengpa In Susa ah numeite pindan vêngpa, mitilge Hegai venna’ nungak mêlpha zosia hun ko khawm dingin, lengpa’n a gam sung ah gambung tin ah hotu lian ding guat chiat hen la; a mêl uh siamphatna dingle piak hi chiat uh hen.

⁴Tichun, lengpa lung tuak pen chu Lengnu Vashti thasâng dingin têldaw hi hen,” a tiu a. Zia thu chu lengpa lung lam tak ahi ziakin, zia gual chun bawl ahi tai.

⁵Susa lal Inpi ah chun Juda mi pakhat a um ah, a min chu Mordekai a hi; ama chu Benjamin nam ah Kish chapa Shimei chapa Jair chapa ahi.

⁶Kish chu Babulon Lengpa Nebukadnezar in Judai gam ah lengpa Jekoniah tawh, Jerusalem ah kipat sal ah a puimangte lak ah pang a la hi.

⁷Mordekai in a suapipa chanu Hadassah, Esther kiti chu a la enkol ah; ama chu nu leh pa nei talo a la hi’n; zia nungak chu pianpha leh mêlpha ma ma ahi; a nu leh pa a thi’nung un Mordekai in ama chanu ding ah a la ki-etkol ahi.

⁸Lengpa thupiak leh dan bawl chu puandaw ahi’phatin, nungak tam tak chu Susa khua Hegai etkolna Inpi a hung khawm phat un, Esther chule lengpa lal In ah numeite enkolpa Hegai etkol dingte lak ah chun a hung pang a.

⁹Nungak Esther chun a lung a tuak ziakin doisakna a chang ngal ah; tichun, ama tawh nungak dang lal In ah têldaw ah um pasagite chu a chanvo ding leh mêlphatna ding ah kicheina matchâkte chu kin takah piak ah um in, ama leh a nungakte chu numeite pindan nuam pen ah chun a lut tau a.

¹⁰Mordekai in a hil dungzui in, Esther in kua mi leh kuate chanau a hi a gendok puai.

¹¹Nisi’n in Mordekai chun Esther bang a ti na em, bang tin a um na em, ti he ding in numeite umna huang kot mai ah chun a vachia zing sek a.

¹²Tha sawm leh ni zaw ah numeite bawl dan ding a zaw nung un, Lengpa Ahasueras kiang ah a bân bân ah a hung kilâk ni ding uh a hung tun phatin; (zia tawhbang ah hin mêlphatna ding ah kicheina chu a bukim sek ah:) tha guk sung chu murra sathau ah kichei hoi hun leh, tha guk dang sung chu gimtui leh numeite kicheina jat chuam chuamte ah kichei hun a hisek in.

¹³Nungakte chu lengpa kiangah kilâk ding ah a lut phat ua leh, nungakte pindan ah kipat a kicheina ding ua a dawi tapo uh piak a hiu a.

¹⁴Nitâk leh lut intiu in; a jing leh lengpa thâikemte enkolpa Shaashgaz umna, numeite pindan pani’na chun a kile’kit diu ahi; lengpa’n a dawi ah, a min ah a kokit lo ngal chu kuama a vachia kit tâk lo diu ahi.

¹⁵Abihail chanu, Mordekai in a chanu ding ah a kivâk, Esther chu lengpa kiang ah a lutna hun a tun phatin, numeite enkolpa mitilge Hegai in a hil dungzui bep in a kichei a. Esther chu a mu tapo in a pakchau a.

¹⁶Esther chu Lengpa Ahasueras lal In ah, tha sawmna, Tebeth tha ah, a lal kum sagi’na chun pui lût ahi;

¹⁷lengpa chun nungak dangte zosia sâng in Esther chu a dawi pen a; nungak dang zosia sâng in doisakna leh lungtunna a nei tâk ziak in, a lallukhuk khuksak in, Vashti thasâng in a siam tai.

¹⁸Tichun, Esther lopna, luaithe’na thupi tak chu lengpa’n a milian leh lalte zosia chu tawh a bawl ta’n; chuleh, a lenggam pumpi ummit ni ah puang in, lengpa kiphalna dungzui in thilpiakte le hawm jak ahi.

¹⁹Nungakte chu a hung kiko khawm phat un, Mordekai chu lengpa kêlkot bul in a kichu ta’n.

²⁰Mordekai in a hil gual in, Esther in kua mi leh kuate chanau ahi’na a kigendok nai puai; Esther in a la etkol lim ah kipat Mordekai thu a la nial kha lo him him ahi gual in.

²¹Lengpa kotbul ah Mordekai a kichut zing lai ah chun, lengpa pindan vêngte lak ah pani, Bigthan leh Teresh, a huang sung vêngte chu a lungnat ziak un, Lengpa Ahasueras a gûkah thalup ding vai a sawm tau a.

²²Zia thu chu Mordekai in a la hegu ta’n; Lengnu Esther kiang in a hil ah; Esther inle Mordekai min in zia thu chu lengpa a la hilsawn tai.

²³Zia thu chu kan chian ahi ah, a dik tak ahi ti a hetdaw phat un, amau teni chu khailup in a um tau a. Zia thu chu lengpa het in tepte’na lekhabu ah chun zik lut in a um tai.