Read Vaiphei ESTHER 3 Bible Online

ESTHER 3 - Vaiphei bible

ESTHER 3

¹Zia nung ah chun, Lengpa Ahasueras in Agag mi, Hammedatha chapa Haman chu a kaisânsak ah; a chawisâng ah, a milian leh lalte zosia chung in a koisâng tai.

²Lengpa nasêmte zosia’n, lengpa kotkhak bul ah chun Haman chu ja’na pia’n a ma-âng in a kûn tau ah; zia gual ah chu bawl ding ti ah lengpa’n thu a piak himle ahi’n. Himaleh, Mordekai in vang ja’na pia’n a kûn ngai puai.

³Ziaphatchun, lengpa kot bul ah nasêmte chun Mordekai kiang in, “Bang ding ah lengpa thupiak mang nuam lo la hem?” ti’n a dong ua.

⁴(Zia gual chun ni si’n leh a gen zing uh himaleh, a ngai diak lo phatin, Mordekai in, kei Juda mi ka hi ziak ahi, a ti chu Haman in bangti’n a ngai him him em ti’n a dong tau a.)

⁵Haman in Mordekai a ma-âng ah khun nuam lo leh, ja’na penuam lo ahi ti a het phat in, a siatchang a so ma ma ziang ta’n.

⁶Himaleh, Mordekai chung bep ah khut thâk chu a hawmthaw ta’n. Tichun, Mordekai chu kua mi a hem ti a hilsau ahiziak in, Ahasueras lenggam pumpi Mordekai chipite Juda mi zosia chu bang gual ah sukmangthai ding a hem ti chu Haman in a ngaitua tai.

⁷Lengpa Ahasueras lal kum sawm leh ni’na, a tha khatna, Nisân tha ah kipat chun, nisi’n, thasi’n in Haman kiang ah chun, tha sawm leh thum tin ni tiang in âisânna Pur kiti chu a sân zing tau a.

⁸Ziaphatchun, Haman in Lengpa Ahasueras kiang in, “La gam sung pumpi huap ah kithejak, la mipite tawh le kibang lo, a dan zuiteu chule la gam ah midangte tawh kibang lo ah kichuamse ma ma, lengpa dante le zui nuam lo, lengpa’n la daidawp lo ding nam khat a um un.

⁹Lengpa’n lem la sak ahi chun, amau haw sukmangthaina dingin thupiak siam hi hen la; zia gual ah thilbawl dingte chun lengpa sumbûk ah a koi ding un dangka thik shekel sîng khat le hun pia’ng ka,” ti’n a vagen a.

¹⁰Tichun, lengpa’n a min namna khutsebi chu Judate mêlmapa, Agag mi, Hammedatha chapa Haman kiang ah chun a pia tai.

¹¹Lengpa chun Haman kiang in, “Dangka hihen la, mite hileu, nang in pha lasak dan dan ah la bawl dingin piakdaw la hi tai,” ti’n a gen a.

¹²Tichun, tha khatna, a ni sawm leh thum ni chun, lengpa lekhazik ah pangte chu ko khawm in, Haman in a dawi dan tak in, vaipawte, gambung tin leh nam tin lakah hotute kiang chiat ah thot dingin, thupiak chu gambung tin ah nam tin amau lekhamal leh a pau chiat un, Lengpa Ahasueras min ah zik in, lengpa min namna khutsebi ah namdet in a um tai.

¹³Lengpa gambung tin ah, tha sawm leh ni’na Adar tha, a ni sawm leh thum ni phat leh, Juda mi taphot, a têk a khang, a lian a neu, numei pawsal zosia ni khat sung thu ah a thâgam suak chiat ua, a nei a lamteu zosia gâl lâk ah a kilâk chiat diu, ti’n lekhathot zik in, a thak ding mi a puaksak tau a.

¹⁴Zia lekha chu gambung tin ah mipite zosia chun, zia ni ding ah chu a la kisakkhol diam theina ding un puanlat leh hawm jak ahi.

¹⁵Lengpa thupiak in lekha chu kin tak in a thotvêl tau ah, zia thu chu Susa ah lengpa In ah kipat sua ahi. Lengpa tawh Haman uain dawn ah a chutkhawm lai un, Susa khawpi sung chu buaina’n a dim tai.