Read Vaiphei ESTHER 4 Bible Online

ESTHER 4 - Vaiphei bible

ESTHER 4

¹Mordekai in a thilbawl zosiau chu a la het phat in, Mordekai in a puan botthêk ah saidip puan sil in, leivui a kibuak khum ah, khawlai ah vâkvêl in, ngai tak leh thasia tak in a kap a;

²lengpa kot bul tiang in a chia a; kuama saidip puan sil pum ah lengpa kotkhak sung lut phal ahi paw’ngal a.

³Lengpa thupiak leh a thu vaisawm tunna gambung taphot ah chun, Judate lak ah lusûnna huaisia tak, anngawlnate, kâ leh mauna a hung um ah; mi tam tak chu saidip puan sil in leivui lak in a lum tau a.

⁴Esther chu a nungakte leh ama enkol mitilge in a vahil phat in, lengnu chu a lungngai ta ma ma a; Mordekai chu a saidip puan sil sût ah, a kithuamna dingin puan a thot ah; himaleh, ama chun a la la nuam puai.

⁵Ziaphatchun, Esther in lengpa mitilgete lak ah pakhat Hathak chu a ko ah; ama chu lengnu tawi leh chan ah pang ahi’n; Mordekai kiang in a sawl ah, bang gual thil hung tung ah, bang ziak a hem ti a vadotsak a.

⁶Hathakh chule lengpa kotkhak jawn ah mun awng ah Mordekai kiang ah chun a vachia a;

⁷Mordekai inle a chung ah thil hung tun dan zosia leh, Judate zosia sukmangthaina ding ah Haman in lengpa sum a piak jat dik tak chule a la hil tai.

⁸Mordekai in, ama chu Susa Inpi thusuak kizikna lekha chu, Esther kiang ah a umdan hilchian kawm ah a piak dingin a choisak ah; chuleh, lengpa kiang ah amau haw sukchigap lona ding ah lengpa kiangah don dinginle thu a thot a.

⁹Hathakh chu chia kit in, Mordekai in a gente chu Esther kiang in a hil ta’n.

¹⁰Chuleh, Esther in Hathakh chu Mordekai kiangah vachia kit ah, zia thu hi vagensawn dingin a sawl kit a:

¹¹“Lengpa nasêmte zosia leh a gam sung ah mipite zosia’n a het chiat uh, kuale numei hi’n pawsal hiziang maleh, lengpa’n a ko lo ah a Indan sungnung ah lût tapo chu, thalup ngal ding ti dan a um hi; ahi’n la, lengpa’n a lal tiang a la lapsân leh vang chu, zia mi chu hing ding ahi. Keima hile tu’ ni sawmthum sung hi lengpa kiang ah lût ding ah ko ah um talo ka hi tai,” vati dingin a sawl a.

¹²Mordekai kiang ah Esther thugen chu a vagen phatin,

¹³Esther kiang ah a gensawn dingin, zia gual hin a gen tai: “Juda mi zosia manthai zaw nung ah, lengpa In ah nang suakcha diak dingin kigingcha kin.

¹⁴Zia tawhbang hun ah hi la thip hiat hiat ahi chun, Juda mite â ding ah panpi’na leh hukdawna khoilam a hem khat ah kipat in hung ngei intin; himaleh, nangma leh la pa Inkuante vang mangthai tho tho ding la hiu. Lengnu la hung pan hi zia gual hun â ding ziak hi himaw lo ding ei vei; zia chu kuan he ding a hem?” vati dingin a sawl kit tai.

¹⁵Ziaphatchun, Esther in Mordekai dawnhuna dingin zia gual hin a gen kit a:

¹⁶“Chia inla, Susa khua Juda mi zosia ko khawm inla, kei â dingin anngawl in pauchap un; sûn thum leh jan thum sung chu bangma ne lo leh dawn lo in um chiat un. Nanghaw’n la bawl gual un kei leh ka nasêm nungakte hinle bawl ing kau. Ziazaw chuleh, dan lo gual tak himaleh, lengpa kiang in vachia ing ka; ka manthai leh ka manthai himai hen,” ti’n a gen tai.

¹⁷Mordekai le a chia ah, Esther in a gen gual ah chun a vabawl tai.