Read Vaiphei ESTHER 5 Bible Online

ESTHER 5 - Vaiphei bible

ESTHER 5

¹Ni thum a ti’n ni chun, Esther chu a lengnu sil leh chên ah kithuam in, lal In sungnung ah lengpa pindan mai jawn tak ah chun a vading ah. Lengpa chu lal In sung ah lalchutpha a kichut lai tak ahi’n.

²Lengnu Esther a kotkhak jawn tak ah ding chu lengpa’n a vak mu phât in, a doisakna a chang ngal a; tichun, a khut ah sana lal tiang chu a kiang lam in a vak lek ah. Esther inle a nai ah a lal tiang mûk chu a vak tu’pai ngal a.

³Lengpa’n a kiang in, “Lengnu Esther, Bang a hem? Bang la don nuam em? Ka lenggam kimkhat hial hilehle hun pia ding ka hi,” ti’n a dong tai.

⁴Esther in, “Lengpa’n lem a sak leh, tu’ni lengpa â ding ah ankuang ka siam hin, lengpa tawh Haman hung thei leu chin ka nuam hi,” ti’n a dawnhu a.

⁵Lengpa chun, “Haman kha hung kin-gang hen la, Esther thildot chu a duthusam gual ah bawl piak a hitheina dingin,” ti’n a gen a. Tichun, lengpa tawh Haman chu Esther ankuang siamna chun a chia tau a.

⁶Uain a dawn khawm zing lai un, Lengpa chun Esther kiang in, “Bang a hem la dot ding? Hun pia ding ka hi. Bang a hem la dot nop? Ka lenggam kimkhat hial le hun pia ding ka hi,” ti’n a dong a.

⁷Esther in, “Ka thil dot leh ka thil dawi chu zia hi ahi:

⁸Lengpa doisakna ka chan ah, ka thil dawi leh ka dotna lengpa’n piak ding lem eisak piak ding ahi chun, jing leh ankuang siam kit ing ka tin, lengpa leh Haman hung kit unla, zia phat chuleh, lengpa’n a ti gual in gen ing ka,” ti’n a dawnhu tai.

⁹Zia ni chun, Haman chu lungthim lim tak leh kipak tak in a chiadok a. Himaleh, Haman in lengpa kotkhak bul ah Mordekai, ama ja ah a la dingdok lo leh kithing lo chu a mu phât in, Mordekai chung in a hachang a thak ma ma a;

¹⁰ahi’n la, Haman chu kisûm ham ham in a In lam in a chia tai. Chuleh, a gualte leh a ji Zeresh a ko a,

¹¹Haman in a nei leh lam nasat dan, chapa a hau dan, lengpa’n midangte sâng ah a choisa’n dan leh, a ja dante leh lengpa milian leh lalte zosia chung ah a koisân dante chu a gen a.

¹²Zia bep chule hilo in, “Lengnu Esther natiang inle lengpa tawh an ne’khawm dingin keima bep ei chial in. Jing leh le lengpa tawh an ne’khawm dingin ei chial kit nalai hi.

¹³Himaleh, Juda mi Mordekai, lengpa kot bul ah kichu ka mu laisia chu, zia gual ah doisakna zosia hin ei sukipak tak tak thei puai,” a tia.

¹⁴Ziaphatchun, a ji Zeresh leh a gualte zosia chun a kiang in, “Tong sawmnga sâng in mi khailupna ding siam inla, jing leh lengpa kiang ah chun Mordekai khailum dingin don in; zia phat chuleh, lengpa tawh lungthim nuam tak in an ne’khawm dingin chia ta ding la paw em,” a ti tau a. Zia thu chu Haman lung lam tak a hia, mi khailupna ding chu a siam zo ngal tai.