Read Vaiphei ESTHER 6 Bible Online

ESTHER 6 - Vaiphei bible

ESTHER 6

¹Zia jan ah chun lengpa chu a ipmu thei ta pua; lengte chanchin poimaw tepte’na lekhabu hun la dingin thu a pia; ziate chu a kiang in a sim tau a.

²Lengpa kotkhak bul vêngpa, mitilge Bigthan leh Teresh in Lengpa Ahasueras a gûk ah thalup a guatnau, Mordekai in a la gendawna thu chu a hun simdok tau a.

³Lengpa chun, a kiang un, “Zia gual ah thilpha a bawlna ziak hin, Mordekai chu bang gual choihoina leh sep phat tepte’na piak in a um em?” ti’n a dong a. Lengpa tawi leh chante chun, “Bangma bawl piak ahi puai,” ti’n a dawnhuu a.

⁴Lengpa chun, “Lal In sung ah kua dang a um awm?” ti’n a dong a. Zia lai tak ah chun, Haman in Mordekai khailup a guatna thu lengpa kiang ah gen ding ah a hung lut lai tak ahi’n.

⁵Tichun, lengpa tawi leh chante chun, “Haman, lal In ah hung lut gua’n a ding hi,” ti’n a hil tau a. Lengpa chun, “Hun lutsak un,” a tia.

⁶Tichun, Haman a hung lut phatin lengpa chun a kiang in, “Lengpa’n a chawihoi nopte chu bang gual in kibawl leh pha la sa em?” ti’n a dong a.

⁷Haman in a lungthim in, Keima sâng ah lengpa’n a chawihoi nop zawk kua dang um ding a hem, ti ngaitua zing kawm in,

⁸“Lengpa’n a chawihoi nopte chu, lengpa’n a sil sek lengpuante, a chuanna sek sakolte leh a lallukhuk hun lau hen la;

⁹lengpa’n a chawihoi noppa kithuamna dingin lengpa puan leh a sakolte chu, lengpa siamângte lakah hotu lianpen kiang ah hun piau hen la; ama chun thuam in, sakol chung ah chuansak in, khawlai dung zosia ah pui hen la, a âng ah chun, ‘Lengpa’n a chawihoi nopte chu zia gual hin a bawl sek hi,’ ti’n kiko malam pek hen,” ti’n a gen tai.

¹⁰Ziaphatchun, Lengpa chun Haman kiang in, “La gen gual tak ah chun Lengpa puan leh a sakol chu kin tak in vala’n la, Lengpa kotkhak bul ah kitung sek, Juda mi Mordekai chung ah zia gual chet ah chun vabawl in. La gensa zosia kha hi’khial leh hetmil umlo in vabawl in,” ti’n a gen a.

¹¹Tichun, Haman in Lengpa puan leh sakol chu a vala khawm ah, khawlai dung ah vâkpi in, “Lengpa’n a chawihoi nopte chu zia gual hin bawl hi sek ding ahi,” ti’n a kiko pek tai.

¹²Ziazaw chun, Mordekai chu Lengpa kotkhak bul ah chun a hung kit ah, Haman ahileh chu lungngai tak leh puan kilukhu in a In lam ah kin tak in a chia kit tai.

¹³Haman in a ji Zeresh leh a lawite zosia kiang ah a thil tuak thu zosia chu a gen zaw phatin, a ji Zeresh leh ama thuhilte zosia chun a kiang in, “Tu’ni a ma-âng ah la mualphona pa Mordekai hi Juda mi ahileh vang, nang in dêk zo lo ding la hi, a ma-âng hin pûk ngei ngei ding la hita hi,” a ti tau hi.

¹⁴Zia gual ah a la holim zing lai ua chun, Lengpa pindan vêng mitilgete a hung tung ngal un, kin tak ah Haman chu Esther luaithe’na ankuang ûm dingin a hung puidok tau hi.