Read Vaiphei ESTHER 7 Bible Online

ESTHER 7 - Vaiphei bible

ESTHER 7

¹Tichun, Lengpa leh Haman chu Lengnu Esther luaithena ûm dingin a chia tau a.

²A niveina uain a dawn kham phat un, lengpa chun Esther kiang in, “Lengnu Esther, bang a hem la thil dot nop chu? Hun pia ding ka hi. Bang a hem la dot ding chu? Ka lenggam kimkhat hial hileh le hun pia ding ka hi,” ti’n a dong kit a.

³Ziaphatchun, Lengnu Esther in zia gual hin a dawnhu a, “Aw Lengpa, la lung tuak ka hi a, Lengpa lemsak lam ahi chun, ka doi pen chu zia ka hinna hi ei hinghoi piak inla, ka chipite hinna ei hawi piak lechin ti hi ka dot nop pen ahi.

⁴Kei leh ka chipite hi sukmangthai ding, thalup sik sek ding leh sukmangthai suak ding ah khot zawsa ka hi ta’ngal un. Numei pawsal kidang lo ah suak hiding ah khot zaw hileng un vang, thipsan hiat hiat mai ding ka hi; himaleh, ka siatna ding ua Lengpa kiang ah ka mêlmapau chun jângna dawpna sêng lo ding ahi’n,” ti’n a hun gen tai.

⁵Ziaphatchun, Lengpa Ahasueras in Lengnu Esther kiang in, “Zia gual ah thilbawl gua leh ngaitua ngam chu kua a hia, khoi tak ah um a hem?” ti’n a hun dong a.

⁶Esther in, “Ka kilanpiu leh ka mêlmapau chu zia migilo Haman hi ahi!” ti’n a hun dawnhu a. Ziaphatchun, Lengpa leh Lengnu âng ah chun lau in a kithing ta.

⁷Lengpa chu luaithe’na ankuang bul ah kipat in lungna talua’n a dingdok ah, lal In huan sung lam ah chun a vapawtdok ah; Haman chu Lengnu Esther kiang in a hinna hinghoi piak ding ah don in a la um zing ah, Lengpa chun thatlum ngei ngei ding ahi ti a mu chian ta’ngal a.

⁸Lal In huan sung ah kipat Lengpa chu luaithe’na ankuang bul a hun zot kit phatin, Haman chu Esther lup sekna jalkhun ah a la kizam chu a mu ta’n; Lengpa chun, “Zia ka In sung ah ka mit mu ngei ah ka ji Lengnu chu a la pum sual nalai ahi maw?” a hun ti tai. Lengpa’n zia gual thu a hun gen phat ah chun, Haman mai chu a tuam piak ngal tau a.

⁹Lengpa pindan vêngte lak ah mitilge pakhat Harbona chun, “Ngaitia, Haman in Lengpa hinna hukdawna ding ah thugenpa, Mordekai khailupna ding ah a siam, mi khailupna tong sawmnga sâng ah a siam Haman in a In ah a nei hi,” ti’n a hun gen a. Lengpa chun, “Zia chun vakhailum un,” a hun ti tai.

¹⁰Tichun, Mordekai khailupna ding ah Haman in a bawlsa chun ama chu a khailum tau a. Ziaphatchun, Lengpa lungnatna chu a dai tai.