Read Vaiphei ESTHER 8 Bible Online

ESTHER 8 - Vaiphei bible

ESTHER 8

¹Zia ni chun Lengpa Ahasueras in Judate mêlmapa, Haman In chu Lengnu Esther khut in a pedok tai; Mordekai chu Lengpa kiang in a hung ah, Esther in Lengpa kiangah Mordekai chu a bang ahi a la hilsa ahi ta’ngal a.

²Haman khut ah suai namna khutsebi um chu Lengpa chun a ladok ah, Mordekai a pia tai. Chuleh, Esther in Haman Inkuan chu Mordekai a pedok tai.

³Chuleh, Esther in Lengpa kiang in thu a gen kit a; a kengbul ah bokkhup in, kap kawm kawm in Agag mi Haman in Judate chung ah thil phalo a bawl guat dante chu sudanglam dingin a don tai.

⁴Lengpa chun a lal tiang chu Esther kiang lam in a vak lek a,

⁵Esther chu a hung tho ah, Lengpa âng ah chun a ding ah. Zia gual hin a hun gen a: “Lengpa’n lem lasak lam ahi ah, la doisakna chang tâk ah lei ngai chun, Lengpa phasak lam ahi ah, lei phal piak thei chun, Agag mi, Hammedatha chapa Haman in lenggam bung tin ah Judate sukmanthai sik sekna ding ah a guanggalna, thupiak ah kizik zosia chu phelkitna ding in lekha zik hi hen.

⁶Ka mipite chung ah siatna hung tung ding chu, bangti’n en ngam ma ma ding ka hem? Ahiloleh, ka chanaute suksiat ah a umnau chu, bangti’n thuak zo ma ma ding ka hem?” ti’n a hun gen a.

⁷Ziaphatchun, Lengpa Ahasueras in Lengnu Esther leh Juda mi Mordekai kiang in, zia gual hin a gen tai: “En un, Judate chung ah thil phalo tak a guanggal ziakin Haman chu khailum in, a Inte chule Esther khut in ka pia ta hilam.

⁸Judate chung thu ah la dawi gual tak un, Lengpa min ah thot dingin lekha zik unla, Lengpa khutsebi’n namdet un; Lengpa min ah lekha kizik leh a khutsebi kinamte chu sukdanglam thei tâk lo ahi ngal in,” ti in.

⁹Lengpa lekha zikte chu zia hun ma ma ah, Sivan, tha thumna, a ni sawmni leh thum ni’ chun a ko khawm tau a; Mordekai thupiak dungzui in Judate kiang leh, hotu liante leh, India ah kipat Ethiopia tiang huap ah gambung za sawmni leh sagite ah gam awpte leh lamkaite kiang ah thot dingin lekha chu a zik tau a; gambung tinte â ding in amau lekhamal leh amau pau chiat in, Judate â dinginle amau lekhamal leh a pau un a zik tau a.

¹⁰Lengpa Ahasueras min ah zik in, Lengpa khutsebi’ nam det in, Lengpa sakol hat pen pen ah puak sak in a thotdok tau a.

¹¹Zia lekha dungzui ah chun, Judate chun a umnau khua taphot ah chun kihumbit ding ah pan a la lâk gaw chiat ding leh, amau hung bulu ding ah hung kuan taphot chu, gam sung ah mi hi’n, thuneite hi ziangleu le, a la that ah, a la suchimit ding ah pung khawm ah, a cha a nauteu, a numeiteu leh a nei a lamteu chom gaw zosia chu that gam dingin,

¹²Lengpa Ahasueras lenggam sung ah chun, ni khat sung, tha sawm leh ni’na, Adar tha ah a ni sawm leh thumni chu guat in a um tai.

¹³Zia thupiakna lekha chu, zia ni sung ah chun a mêlmateu chung ah phuba a lâk theina ding un, Judate chu kisingsa diam ah a umtheina ding un, gambung tin ah thotdok in, mi zosia kiang ah puandaw ding ti ahi tai.

¹⁴Tichun, lekha thak vêl dingte chu Lengpa thupiak ah kin tak ah tai vêl dingin, Lengpa sakol hat pen pente ah chun a taisak tau a. Zia thupiak chu Susa ah Lengpa In ah kipat bawl ahi.

¹⁵Ziaphatchun, Judate â ding ah vakna leh kipakna, limna leh choihoina a um tâk ziakin, Mordekai chu a leng puan lopi, a dum leh a vam ah kisiam sil ah, sana lallukhuk khuk kawm ah, puan malngat sandup maikhûna kithuam in, Lengpa kiang ah kipat in a pawtdok ah, Susa khawpi sung ah chun limna leh kipakna kiko git chu a dul veng vung ziang tai.

¹⁷Lengpa thupiak tunna gambung tin leh khawpi tin ah chun, Judate â ding ah kipakna leh limna a um ziakin, luaithe’na leh awllênna’n a mang tau a. Zia mai chule hilo in, Judate a lau ziak un mi tam tak chu Juda mi ka hi ti’n a hung pang tau hi.