Read Vaiphei ESTHER 9 Bible Online

ESTHER 9 - Vaiphei bible

ESTHER 9

¹Tu’hin, a tha sawm leh ni’na, Addar tha ah, a ni sawm leh thum ni chun, Lengpa thupiak ah Judate chung ah a mêlmateu in khut a thâk ua, a chung ua a gualzawna ding niu ah kiguat chu a hung tun phatin, Judate’n a mêlmateu chung ah a gualzawna niu a hung suak ta zaw’n;

²Lengpa Ahasueras lenggam bung tin ah Judate chu, amau susia dingte chung ah khut tha dingin, amau khaw mun chiat ah chun a pang khawm tau a; amau chu mi zosia’n a lau tâk ziak un, kuama’n a do zo ta puau a.

³Gam bung tin ah vaihawmte, gam awpte leh Lengpa siamângte zosia chun, Mordekai a lau tâk ziak un Judate chu a panpi tau hi.

⁴Mordekai chun Lengpa In ah thu a nei ta ma ma ah; tichun, Mordekai thuneina a let deu deu tâk ziakin, a gambung zosia’n a min a thang deu deu tai.

⁵Tichun, Judate chun a mêlmateu chu chemjam ah that in, a sumangthai tau a; amau muda taphot chung in a nop dan dan un a bawl tau hi.

⁶Susa khawpi kulpi sung in Judate chun mi za nga that in a sumangthai tau hi.

⁷Parshandatha, Dalphon, Aspatha,

⁸Poratha, Adalia, Aridatha,

⁹Parmashta, Arisai, Aridai, leh Vaizatha,

¹⁰Hammedatha chapa Haman, Judate mêlmapa chapa sawmkhatte chutawh a that gam tau a; himaleh, a nei thilteu chu vâng a lâkpiak puau hi.

¹¹Zia ni sung ah Susa khua kulpi sung ah a thalup zat uh chu lengpa kiang in a hun hil tau a.

¹²Lengpa chun, Lengnu Esther kiang in, “Susa khua kulpi sung in Judate’n mipi za nga tawh Haman chapa sawmkhatte chu a that ui. Lenggam bung tin ah chun vang bang gual bep in a bawl ta ding awm! A leh, bang la dotbe nuam nalai em? Hun pia ding ka hi. La lung gual tak in bawl piak hiding la hi,” ti’n a gen a.

¹³Esther in, “Lengpa’n lem leisak piak ahi chun, Susa khua Judate’n tu’ni a bawl gual gual un jing leh le bawl nalai uh hen la, Haman chapa sawmkhatte kha le khailup hiu hen,” ti’n a gen a.

¹⁴Tichun, Lengpa chun zia gual ah chu bawl dingin thupiak a bawl ah; Susa khawpi chun zia thupiak chu a puang tau ah; Haman chapa sawmkhatte chule a khailum tau hi.

¹⁵Susa khawpi Judate chu Addar tha, a ni sawm leh li ni chun a pung khawm un; tichun, Susa khua sung ah mi za thum a that nalai un; a nei thilteu chu vang a khoi puau hi.

¹⁶Lengpa gambung dang dang ah um Judate chunle amau kihûk hinna ding ah a la pang khawm chiat in, panmun a la khaw chiat ziak un, a mêlmateu lak ah kipat gâl muang tak in a la um chiat tau a; chuleh, a mêlmateu sîng sagi leh sang nga chu a la that in; himaleh, a nei thilteu chu vang a khoi puau hi.

¹⁷Zia gual ah a bawlnau chu, Addar tha ah a ni sawm leh thum ni ahi’n, a ni sawm leh li ni’ chun vang a chawldam un, luaithena ni leh limna ni’n a mang tau hi.

¹⁸Himaleh, Susa khawpi Juda mite chu a ni sawm leh thum ni tawh, a ni sawm leh li ni’ chun a kikhawm un, a ni sawm leh nga tin ni chu kichawldamna leh luaithena leh limna ni’n a mang tau hi.

¹⁹Ziaziakchun, khawneu leh khawpi neu kul neilo ah chêngte chun vang, Addar tha ah ni sawm leh li ni chu limna leh luaithe’na ni lopi, nêk leh châk kipiaktuana ummit ni’n a mang tau hi.

²⁰Zia thil zosia chu Mordekai in a tepte dit det ah, Lengpa Ahasueras lenggam bung tin, a gamla leh a nai tuam ah Juda mi zosia lekha a thot a,

²¹Kum si’n leh Addar tha a ni sawm leh li ni leh, ni sawm leh nga ni chu ummit ni mat chiat ding,

²²Judate’n a mêlmateu ah kipat a suachâtnau leh, zia tha leh nite ah hin a lungngaina pen uh a kipakna niu a hung suak ah, a kâna ni ding uh a limna niu a hung suak tâk ziakin, nêk leh châk kipiaktuana leh genthei leh tasamte kiang ah thilpiak piakna ding ah mat ding ahi, ti in.

²³Tichun, Judate chun a la bawl patsau gual ma’n Mordekai in a ti gual chun a bawl chiat tau hi.

²⁴Agag mi, Hammedatha chapa Haman, Judate mêlmapa chun, Judate chu sumangthai ding ah phunsânna, Pur sep in âi a la sân ah, zia chu amau haw sukmangna ding leh sukgamna ding ah âisân a hi’n;

²⁵ahi’n la, Esther chu Lengpa kiang ah a hung phatin, Judate siatna ding guanggalpa thil phalo chu a luchung in chu hen la, ama leh a chapate chu khailupna chun khailup hiu hen, ti’n Lengpa chun a thupiak chu lekha’n a zikdok tai.

²⁶Ziaziakchun, zia nikhua te ni chu Pur, “Âisânna nikhua,” minsak in Purim a sa den tau hi. A lekhathot ah kizik zosia leh, amau in bang hun tuak ah, a chung ua bang hung tung a hem ti leh,

²⁷lekhathot ah a zik ziak leh a ni guat dungzui tak ah chun, kum si’n leh zia nikhuate chu, Judate’n amau hukdawna ni chu a suan a pâk zosiau leh amau thilbawl bawlpi nuam tapote’n a chan ding un a phuang tau ah, a chãng ngal tau hi.

²⁸Zia nikhuate hi suan zosia tiang ah Inkuan tin, gambung tin leh khaw tin ah mite chun hezing ah a chãn zing diu ahi; zia Purim nikhuate hi Juda mite lak ah a ngaisak lo a hem, a hetzingna nite chu a suanteu ah chawl mai lo dingin a ngaikhawk zing diu ahi.

²⁹Abihail chanu Lengnu Esther tawh Juda mi Mordekai chun, Purim chungchâng thu sukdetna lekhathot a niveina chu khau tak in a zik tau hi.

³⁰Lengpa Ahasueras lenggam bung za sawmni leh sagi ah Judate zosia chung ah thamuanna leh bitna a neina ding uh doisakna’n lekha chu a thotdok tau a,

³¹tichun, Juda mi Mordekai leh Lengnu Esther in Purim kût mat ding dan, anngawlna leh lusûnna a nei ding danteu leh a nikhua, a suan zosia tiang ua a bawl ding danteu chu thu a pia tau a.

³²Lengnu Esther in Purim kût ni matna ding ah a thupiak chu lekhabupi ah chun zik lut ahi tai.