Read Vaiphei PAWTDAWNA THU 10 Bible Online

PAWTDAWNA THU 10 - Vaiphei bible

PAWTDAWNA THU 10

¹Ziaphatchun, Mosi kiang in LALPA’n, “Zia ka thilmak bawlte hi a âng ua ka tâklat theina ding in, Pharaoh kiang ah chia in; ama tawh a miliante lungthim la ka hi’tâk ta’ngal in:

²Chuleh, la chate leh la tute tiang in Aiguptate bang gual ah a la soisa ka hem ti leh, a lak ua tepte’na thilmak ka bawlte hi la gen theina ding leh, keima hi LALPA chu ka hi ti a hettheina ding un,” a tia.

³Tichun, Mosi tawh Aron chu Pharaoh kiang in a chia tau ah, a kiang in, “Zia gual hin Hebraite Pathian in a gen hi: Ka ma-âng ah hin kingaitawm nuam lo ah bang chan um nalai ding la hem? Ei ho theina ding un ka mite hun thâdok ta’n;

⁴chutia, ka mipite la hun thâdaw nop lo tei tei nâk lai ahileh ngai in, jing leh la gam sung pumpi ah hin khaubepi hun umsak ding ka hi.

⁵Amau chun leipêk hi kuama’n a mutheilo ding khop un dap suak intiu in. Chuleh, gial in a sesiat bang sia, a suakcha a themnên um sun chu ne zo intin uh; chuleh, lou ah nang â ding ah thingkek zosia chule hun ne zo in au.

⁶Amau chun lal Inte leh la miliante In leh Aiguptate In zosia chu lua dim intin uh; zia gual chu la pu la pateu khan lei chung a um lim ah kipat tu’ni tiang ah a la mu khâk nai lo uh ahi,” a tia. Chuleh, ama chu a kihei ah, Pharaoh kiang ah kipat in a pawtdok tai.

⁷Chun, Pharaoh miliante chun a kiang in, “Zia mipa hi bang chan ei uh â ding ah buaina bul hi zing ding a hem? LALPA a Pathian uh a ho theina ding un chiasak ziang ta’n la: Aigupta gam pumpi hi suksiat dim dem ahi tai ti helo la hem?” a tiu a.

⁸Tichun, Mosi tawh Aron chu Pharaoh âng in a hun pui un a kiang ua, “Chia tau in, LALPA la Pathian uh vaho tau in: Ahi’n la, kua kua a hem a chia dingte chu?” a hun ti tai.

⁹Mosi’n a dawnhu ah, “Ka chasenteu leh ka têkseteu tawh, ka chapateu leh ka chanuteu tawh, ka belamteu leh ka kêl honteu tawh, ka bawng honteu le chia sik sek ding ka hiu; LALPA kiang ah luaithe’na siam ding ka hiziak un,” a tia.

¹⁰Ama’n a kiang un, “LALPA min sâl in ka gen la hiu: La chasenteu natiang ka hun chiasak tâk leh aw! Thil phalo bawl gua la hiu a kichian ta hilam!

¹¹Zia gual chu hitalojen in a! Nanghaw pawsalte chiau inla, LALPA chu vaho tau in; zia chu la duthusam pen uh ahi ngal in,” a tia. Tichun, Pharaoh ma-âng ah kipat a nawdok tau hi.

¹²LALPA chun Mosi kiang ah, “Khaubepite chu Aigupta gam ah a hung lut ua, a gam ah anche lohing tincheng gial in a hawi khak sunte chu a hun nêkchâi theina ding un, Aigupta gam chung in la khut jakdok in,” a tia.

¹³Tichun, Mosi’n a tiangkhut chu Aigupta gam chung ah a jakdok tai; LALPA’n zia ni sun nitum leh jan khawvak in zia gam zosia ah chun sualam thigua a hânsak ah; chuleh, jingkal a hung hi’phatin, sualam thigua chun khaubepi a hun tok lut tai.

¹⁴Khaubepite chu Aigupta gam pumpi chun a vak jak tau ah, Aigupta gam pumpi chu a dapsuak ziang tau hi; zia gual ah khaubepi tam hi tu’ma khan hetkhâk a la hikha nai pua, tu’nung inle zia gual hi um kit diak ta pua’n a.

¹⁵A gam lei chung pumpi a dâpsuak ziak ua chun, a gam pumpi chu a a vom hial ta’n; chutichun, gial in a suksiat bang anche lohing leh thingga chi zosia chu a ne zo ziang tau a; tichun, Aigupta gam sung pumpi ah chun thinghing, loupa hing leh lou ah anche lohing a um ta puai.

¹⁶Ziaphatchun, Pharaoh chun Mosi tawh Aron kin tak in a ko ah a kiang un, “LALPA la Pathian uh leh nangmau chung in thil ka bawl khial tai;

¹⁷zia ka thil bawlkhialna ziak hin ei ngaidam nalai unla, zia thi’na ding tizat um tak hi tunsak lo dingin LALPA la Pathian kiang un ei dot piak nalai un,” ti’n a don tai.

¹⁸Tichun, Pharaoh chu nusia in a pawtdok a, LALPA kiang ah chun a pauchap ta.

¹⁹Chuleh, LALPA’n tumlam hui hat tak a hun hânsak ah, khaubepite chu a hun tok mang ah, Tuipi San ah chun a tok lut sik sek tai; tichun, Aigupta gam sung pumpi ah chun khaubepi pakhat chale a um ta puai.

²⁰Himaleh, LALPA chun Pharaoh lungthim chu a hikhau ah; tichun, Israel chate chu a chiasak nuam nai diak puai.

²¹LALPA chun Mosi kiang in, “La khut chu van lam in vak jak tiam in, Aigupta gam sung ah thimna, khoikhâk thei hial ding ah thim a ji’n theina dingin,” a tia.

²²Mosi’n a khut van lam in a vak jak ah; tichun, Aigupta gam pumpi ah chun ni thum hial thimpi a jing tai.

²³A kimutua thei le um talo in, ni thum sung chu a um nau mun ah kipat kichawndok thei le a um ta puau a; himaleh, Israelte chênna zosia chu a vak zing a.

²⁴Pharaoh in Mosi a ko ah a kiang in, “Chiau inla, LALPA chu vaho tau in; la bawngteu leh la gan honteu chu nusiau inla, la naupangteu le pui in chia tau in,” a tia.

²⁵Himaleh, Mosi chun, “LALPA ka Pathian kiang ua hâlmang thillat leh kithoinate ka bawltheina ding un ei chiasak unla;

²⁶ka ganchateu tawh le ka kiton ding uh ahi; gancha kengtin natiangle ka nutsia lo ding uh ahi: zia haw mang ah chu LALPA ka Pathian uh ho ding ka hi’ngal un: A ho’na mun ding chu ka tun masang un LALPA chu bang pen ah ho ding ka hiu em ti ka he paw’ngal un,” a tia.

²⁷Himaleh, LALPA chun Pharaoh lungthim chu a hikhau ah; tichun, a mau chu a pawt dawsak nuam diak puai.

²⁸Chuleh, Pharaoh chun a kiang in, “Ka kiang ah kipat hin pawtdok in! Kivêng in, ka mêl mu kit ta pua’n la; ka mêl la mu kit ni ni chu la thi ni hi ding ahi,” a tia.

²⁹Mosi’n le, “La gen gual gual chun um ta hen! La mêl hung mu kit talo him him ding ka hi,” ti’n a dawnhu tai.