Read Vaiphei PAWTDAWNA THU 11 Bible Online

PAWTDAWNA THU 11 - Vaiphei bible

PAWTDAWNA THU 11

¹LALPA chun Mosi kiang in, “Pharaoh tawh Aigupta gam chung in gawtna pakhat hun tunsak nalai ing ka tin, ziazaw chuleh hun pawt dawsak ta’n a: A hun pawt dawsak vânglak tak leh a del in hun del mang thaw ziang ding ahi.

²Mipite het dingin gen inla, pawsal zosia’n a Invêngpa, numei zosia’n a Invêngnu dangka leh sana ah kibawlte dotsak chiat in,” a tia.

³LALPA’n mipite zosia chu Aiguptate mit in doisakna a neisak ah. Aigupta gam pumpi chun, Pharaoh leh a miliante leh mi zosia mit mu in Mosi chu mi minthang ahi ta’ngal a.

⁴Mosi chun lengpa kiang in, “LALPA’n: Jan kim vêl lai tak leh Aigupta gam pumpi vachuan suak ding ka hi.

⁵Aigupta gam ah chapa upa pen chiat, lal chutpha kichu Pharaoh chapa upa pen ah kipat in buhêkna khawl nung lam ah um suaknu chapa leh gancha note lak ah a suak masa pen tiang in that ding ka hi.

⁶Tu’ma le a la um kha ngai lo, tu’nung ah le hung um kit talo ding khop ah huaisia tak ah patau thawm Aigupta gam pumpi ah chun hung um ding ahi.

⁷Himaleh, Israelte leh a ganchateu, ngak ding uichate’nle ngîk pua’n au; LALPA chun Israelte tawh Aiguptate a khenchuam dan la hettheina dingin.

⁸Ziaphat chuleh, la miliante sia hile ka kiang ah hung suk intiu in, ka âng ah hung bokkhup in, ‘Pawtdok in, nang leh la nungzui mipi zosia tawh pawt un; ziazaw chuleh, keile hung pawtdok ing ka,’ hung ti’n au, a tii,” a tia. Tichun, lungna tak in Pharaoh âng ah kipat chun a pawtdok tai.

⁹LALPA’n Mosi kiang in, “Aigupta gam ah thilmak tam tak ka bawl theina dingin Pharaoh chun la thugen ngaisak pua’n a,” a tia.

¹⁰Mosi tawh Aron in zia thilmak zosia chu Pharaoh ma-âng in a bawl tau a; himaleh, LALPA chun Pharaoh lungthim a hikhau ah, a gam ah kipat in Israelte chu a pawt dawsak nuam diak puai.