Read Vaiphei PAWTDAWNA THU 13 Bible Online

PAWTDAWNA THU 13 - Vaiphei bible

PAWTDAWNA THU 13

¹LALPA chun Mosi kiang in;

²“Israelte lak ah cha lutîl, sulhong masa pen taphot chu, mihing hi hen la, gancha hitaleh kei â ding ah la hun lat thiantho diu ahi,” a tia.

³Mosi’n mipite kiang ah chun, “Aigupta gam ah saltânna In a kipat la hung pawtdawna niu, zia nikhua hi hezing unla: bân thahât ah LALPA’n zia gam ah kipat chu a hun puidaw la hiziak un, thawi kisaw vaithum la nêk him him lo ding uh ahi.

⁴Tu’ni, Abib tha ah hin hung pawtdok la hiu;

⁵LALPA chun Kanaan mite, Hit mite, Amor mite, Hiv mite leh Jebus mite chênna gam, la pu la pateu kiang ah piak ding ah sia a la sapna, bawngnawi leh khuaizu luanna gam chu a hun pui lût phat leh, zia kût hi zia tha ma ma’ hin la bawl zing sek diu ahi.

⁶Ni sagi sung thawisawlo vaithum ne’n la tiu in, a ni sagi tinni leh, LALPA â dingin kût pakhat la bawl diu ahi.

⁷Thawisawlo vaithum ni sagi la nêk diu a hia; thawi kisaw vaithum him himle la koi lo ding uh ahi: la gam sung pumpiu ah le thawi umlo ding ah la bawl diu ahi.

⁸Zia ni chun la chateu kiang in, ‘Aigupta gam ah kipat ka hung pawt daw lai ua ei uh â ding ah LALPA’n ei bawlpiakte ziakin zia thil hi bawl ahi,’ ti’n la hil sek diu ahi.

⁹LALPA dan chu la kam ah a um zing theina dingin, zia hi nang â ding ah la khut ah tepte’na leh la chalkiu ah hetzingna hi’n a; khut thahât tak in LALPA chun Aigupta ah kipat a puidaw la hi’ngal un.

¹⁰Zia dan hi kum si’n leh a hunbî tak ah hin la zui zing ding uh ahi,” a tia.

¹¹Chun, nanghaw leh la pu la pateu kiang ah a la tiamsa gual ah, LALPA chun Kanaan mite gam a hun pui lût ah, la kiang ua a hun piak phat leh zia gual hi hi’n a:

¹²Sulhong masa pen pente chu LALPA â dingin la koichuam diu ahi. La ganhon lak ah a chal suak masa pen taphot chu LALPA â ding ah la koichuam diu ahi.

¹³Ahi’nla, sabiltungno suak masa pen chu belam no pakhat in la tatdok diu ahi; la tatdawk lo ahileh, a ngawng la sat tan diu ahi. La chateu lak ah pawsal piang masa pen chu la tatdok ding uh ahi.

¹⁴Tu’nung phat leh la chateu in, “Zia hi bang ding ah kibawl a hem?” ti a hun dot phat ua leh, “Aigupta suak channa In ah kipat LALPA’n a bân thahat ah ei puidok ziak leh,

¹⁵Pharaoh in ei pawt dawsak nop lo lai ah, LALPA chun Aigupta gam ah cha lutîl zosia, mihing cha masa pen leh, gancha no masa pen chu a that hen: Ziaziakchun, sulhong masa pen, a chal taphot chu LALPA kiang ah ka lat ahi; ahi’n la, ka chate lakah a piang masa pen chu ka tat ahi,” ti’n la dawnhu sek diu ahi.

¹⁶Bân thahat in, LALPA chun Aigupta gam ah kipat ei puidok hi ti tepte’na dingin, la khut leh la chalkiu in mêlchikna la bawl diu ahi, a tia.

¹⁷Pharaoh in mipite a pawt daw sak zaw phat ah chun, Pathian in a lampi nai zaw maleh, Philistinte gam lam ah chun a pui nuam pua; Pathian chun, “Mipite hi kua a hem khat in a la doleu a lungthim uh kihei kit in, Aigupta gam lam ah kile’kit ziang kha tawl in au,” a ti ziakin.

¹⁸Tichun, Pathian in Tuipi San lam ah, gamthip lam in a pui kawi tai. Chuleh, Israelte chu Aigupta ah kipat in kigâlging zing in a chia to tau a.

¹⁹Chuleh, Mosi chun Joseph gute chu a pawdok ah, “Pathian in matheilo in hun kantha’n tin, zia tak ah kipat hin ka gute hi la puakdok ding uh ahi,” ti ah Israel chate kiang ah titakzet ah a la tiam tâk ziak ah khan.

²⁰Sukkoth ah kipat in a kipandok ua, thalêk gamthip lam gamgi chin Etham mun ah chun a giak tau a.

²¹LALPA’n amau pui dingin sun ah sûmpi dingin a ma lam un a chia pek ah; sun leh jan ah a chiatheina ding un jan tak leh amau salvâk dingin meikuang in amau a pui pek a.

²²Mipite masang ah kipat chun sun ah sûmpi ding leh, jan ah meikuang chu a lamang ngai puai.