Read Vaiphei PAWTDAWNA THU 14 Bible Online

PAWTDAWNA THU 14 - Vaiphei bible

PAWTDAWNA THU 14

¹Ziaphatchun, Mosi kiang in LALPA’n thu a gen a:

²“Israelte chu kihei uh hen la, Pihahiroth mai zawn ah, Migdol tawh Tuipi kikâl ah, Baal-zephon zawn tak in giak uh hen: A ma zawn ah Tuipi pâm ah chun la giak ding uh ahi:

³Pharaoh chun Israelte chu, ‘Gam sung ah awk den a hitau: Gamthip gam chun amau ah khak khum tai,’ hun ti ding ahi.

⁴Keima’n Pharaoh lungthim hun sukhau ing ka tin, amau chun hun delzui intin uh, Pharaoh tawh a sepai zosiate chung ah chun choisa’n in um ding ka hi; tichun, Aigupta mite zosia chun keima hi LALPA chu ka hi ti a hun hettheina ding un,” a tia. Zia gual chun a bawl tau hi.

⁵Mipite chu a jamdok tau hi ti Aigupta lengpa a vahil phat un, Pharaoh tawh a miliante lungthim chu zia mipite siatna ding lam chun a lungthim uh heikawi in a um ta’n; tichun, “Israelte’n I nau a sepnau ah kipat hi bangtidan ah I pawtsak ziang uh ahi tam?” a tiu a.

⁶Tichun, a sakol kângtalaite chu siam tûp in, a sepai honte chu a pui a.

⁷Sakol kângtalai a pha diakte za guk tawh, Aigupta gam ah a sakol kângtalai zosia leh a hotuteu zosia tawh a pui a.

⁸LALPA chun Aigupta Lengpa Pharaoh lungthim chu a hikhau ah, Israelte hangsan tak ah pawtte chu a del zuisak tai.

⁹Aigupta mite, a sakol kângtalai sepai zosiate leh a sepaite chun a del tau a; Baal-zephon tawh Pihahiroth mai zawn ah, Tuipi pâm ah a giakna mun ua chun a va delpha tau a.

¹⁰Pharaoh chun a hun del ah a nai phatin, Israelte chu a vak nung et ua: Aigupta mite chu a nung un a hung kizawt dup dup mai tau a. Israelte chu lau talua in LALPA kiang in a kap jak ziang tau a.

¹¹Mosi kiang in, “Aigupta gam ah kivuina ding thân a umlo ziak ah, thalêk gamthip ah thi ding ah lei puidaw ahi em? Bangatia, zia gual ah ei bawl ding ah Aigupta gam ah kipat ei puidok mawng mawng la hem?

¹²Aiguptate nasêm in um hiat hiat mai hitiu, ka tiu kha zia hin ei sia ahi hilam. Thalêk gamthip ah thi sâng in, Aigupta mite suak ah um den mai chule kei uh â dingin phazaw ma ma ding ahi ngal in,” a tiu a.

¹³Himaleh, Mosi’n mipite kiang ah chun, “Lau lo in ding det un, tu’ni a hun etsak ding LALPA hukhinna chu en mai un; tu’ni la muu Aigupta mite hi bangmatik in mu kit talo ding la hi’ngal un;

¹⁴LALPA’n nang uh â dingin gâl hun do piak intin, thipbek in um hiat hiat mai un,” a tia.

¹⁵Ziaphatchun, LALPA chun Mosi kiang in, “Bang ding ah kap la hem? Israelte chu ma lam zuan ah chia dingin hil in.

¹⁶Ahi’n, nang in la mol kha lâm inla, la khut chu Tuipi chung in vak jak inla, Tuipi chu vak khen in; tichun, Israelte chu Tuipi lai tak ah chun lei hul chung in chia theng ding ahi ngal un.

¹⁷Ziaphat chuleh, Aiguptate lungthim chu hun hikhau ing ka tin, amau chun hun del zui intin uh; chuleh, Pharaoh tawh a sakol kângtalai hotute, a sepai zosiate leh a sakol sepaite zosia chung ah chun keima’n choisânna ka chan theina dingin.

¹⁸Chutia, Pharaoh leh a sakol kângtalaite leh a sakol sepaite chung ah choisân ah ka um tak chuleh, keima hi LALPA chu ka hi ti hun he ta’n au,” a tia.

¹⁹Pathian vansawlchâk, Israel sepaite ma-âng ah chia pek chu a nung lam un a hung kichawn ah; chuleh, sûmpi ding chule a ma-âng ua kipat hung kichawndok in, a nung lam uh dâl dingin a hung ding tai.

²⁰Aigupta sepaite tawh Israel sepaite kikâl in a hung kikhang tai. Chutichun, sûmpi chu a lang khatte â ding ah thimpi himaleh, amau â dingin jan ah amau salvâktu ahi: a lang khat lam gêl ah umte chu a kizuantua thei him him ta puau hi.

²¹Ziaphatchun, Mosi’n a khut Tuipi chung in a vak jak ah. LALPA’n jankhua’n sualam hui hat tak a hân sak ah, Tuipi chu a le’luansak ah; Tuipi chu lei hul a suaksak ah; chun, tuite chu a kikhensak tai.

²²Israelte chu Tuipi sung ah lei hul ah chun a lut tau ah; chuleh, tuite chu amau â dingin changlam leh veilam in bâng in a pang ta mai hi.

²³Aiguptate chun a del zui tau a, Tuipi sung tiang in Pharaoh sakolte, a sakol kângtalai natiang in a nung uh a del lut pek tau a;

²⁴jingkal phalvak ding kua’n ah chun LALPA’n meipi ding leh sûmpi ding ah kipat chun a hun en suk ah, Aiguptate chu nasa tak in a hun patausak tai.

²⁵A sakol kângtalai kengteu chu a puaidaw piak ah; tichun, a naw hat thei ta puau a. Ziaphatchun, Aiguptate chun, “Israelte ah kipat hin tai mang mai hitiu, LALPA amau lam in a pang ah, Aiguptate hi a do piak ahi,” a tiu a.

²⁶Ziaphatchun, LALPA chun Mosi a hun ho ah: “La khut chu Tuipi chung ah vak jak in, Aiguptate leh a sakol kângtalaiteu leh a sakolchungchuang mite zosia chung ah tui a luan mat kit theina dingin,” a tia.

²⁷Tichun, Mosi’n a khut chu Tuipi chung ah chun a vak jak ah, jingkal phalvak ah chun Tuipi chu a thuk dan pangai ah thuk in a hung luang mat kit tai. Aiguptate a jam daw guat lai un LALPA’n Aiguptate chu Tuipi lak ah chun a paitha tai.

²⁸Tuite a hung luan mat kit phat in, sakol kângtalaite leh a chung ah chuang mite zosia tawh; Pharaoh sepai Tuipi ah a hun del zui zosiate chu, pakhat chale a suakcha umlo in a chup mang zo tai.

²⁹Himaleh, Israelte chu Tuipi sung ah chun lei hul chung in a chiau ah, tuite chu amau â ding ah changlam leh veilam ah bâng ahi tai.

³⁰Zia ni chun LALPA chun Israelte Aiguptate a kipat in a hukdok ah; Israelte chun Tuipi pang ah Aiguptate thi haw chu a muu a.

³¹Aiguptate do-na a chung ua LALPA thilbawl lopi tak chu Israelte’n a muu a. Tichun, mipite chun LALPA chu a lau tau a; chuleh, LALPA leh a suak Mosi chule a taksang tau hi.