Read Vaiphei PAWTDAWNA THU 15 Bible Online

PAWTDAWNA THU 15 - Vaiphei bible

PAWTDAWNA THU 15

¹Ziaphatchun, Mosi leh Israelte chun LALPA pâk in zia La hi a hun sa tau a: LALPA pakna’n La sa’ng ka tin, lopi tak in gual ei zawsak ta’ngal a: sakol leh a chung ah chuangte chu, Tuipi sung in a pai lut tai.

²LALPA chu ka hatna leh ka thâ ahi, ama chu ka hukdamna a hung hi tai: Zia hi ka Pathian ahi, ama pakcha’ng ka, ka pa Pathian, ama chu chawisâng ing ka.

³LALPA chu galdona hat; A min LALPA chu ahi.

⁴Pharaoh kângtalaite leh a sepaite chu, Tuipi sung in a pai lut ah; a sepai doichuam hotute chule, Tuipi San in a tum tau hi.

⁵Tui kinawk in amau a chupmang ta’n; suangtum gual in tui nuai ah chun a tum tau hi.

⁶Aw LALPA, la khut changlam chu, thil hitheina’n a lopi hi! Aw LALPA, la khut changlam chun, mêlmate a mai chimit tai.

⁷La hatna lopi tak ah chun, nangma do-te haw chu, la paitha sik sek tai. La lungnatna chu la sawldok ah, zia chun amau haw chu bupawl gual in, la hâltum tai.

⁸La nâk khawn git in tuite kaikhawm in a um un, tuikhang chu bu vum gual in a kitung a; Tuipi lailung ah chun tui thûknate chu, sukdet in a um hi.

⁹Mêlma chun, “Del ing ting, delpha têi ka, a gâllâk vanteu chu hawm ing ka tin; a chung ua ka duthusam chu buting in a. Ka chemjam jukdok ing ka tin, ka khut in amau chu sumangthai ing ka,” a tia.

¹⁰La hui in la mûtsak ah, Tuipi chun amau a chup mang ta’n; Tuipi nasa tak ah chun, ngêntum gual in a tum mang tau hi.

¹¹“Aw LALPA, kua a hem pathiante lak ah, nang tawh te’thei ding? Kua a hem nangma gual ah thianthona ah lopi, choihoina lam ah lau um leh, thilmakte bawl?

¹²La chang lam khut la jak daw leh, lei in amau chu a val zo tai.

¹³La tatdawsa la mite chu, la lainatna’n la puidok ah: La hatna’n amau chu la chênna, mun thiangtho tiang in la pui tung a.

¹⁴Mipite’n a hiau ah, a kithing tau in; Philistia ah chêngte chu, lungngai na’n a chup tai.

¹⁵Ziaphat chun, Edom lengte chu a lungkham tau a: Moab mi hatte chu launa’n a pha ta’n; Kanaan gam ah chêngte zosia chu, a tawp gam tau hi.

¹⁶Aw LALPA, la mipite a gâlkâi ma siau, la chawk dawsa la mipite zosia chu a gâlkâi ma siau in, launa leh tizatna a chung un a chu ta’n, la bân thahâtna ziakin, amau chu suangtum gual in a thip tau hi.

¹⁷Aw LALPA, la chênna ding ah la siamna mun, Aw LALPA, la mun thiangtho, nangma khut in la sukdetna mun ngei ah chun; nang in amau chu la hun pui lût a, la tâng ngei ah chun la phut tai.

¹⁸LALPA’n kumtuang, kumtuang in vaihawm ding ahi,” a tiu a.

¹⁹Pharaoh sakolte chu a sakol kângtalaite tawh, a sakol chungchuang mi sepai honte chu tawh, Tuipi sung ah chun a tai lut zaw phat un, LALPA’n Tuipi tuite chu amau chung in a luan khumsak tai: himaleh, Israelte chu Tuipi luanna lei hul chung in a chia gâlkâi tau hi.

²⁰Ziaphatchun, jawlneinu Miriam, Aron suapinu chun khuangneu a la’, numei zosia chun khuangneu chawi chiat ah lâm kawm in a hun zui ua:

²¹Miriam in amau haw dawnhu in La a hun sa’n: “LALPA chun lopi tak ah a zaw tâk ziakin, a min pakcha’n La sau inla; sakol leh a chung ah chuang mite, Tuipi sung in a pai lut ta’ngal in,” ti in.

²²Ziaphatchun, Mosi chun Israelte chu Tuipi San ah kipat chiadok dingin thu a pia’; tichun, Shur gamthip chu a lut tau a. Ni thum lam hial a chia nung un tui a mu zo ta puau a.

²³Chuleh, Marah a hung tun phat un, Marah tuite chu a khât bêk ziak in a dawn thei ta puau a. Ziaziak chun, zia mun chu Marah a sak den tau a.

²⁴Tichun, mipite chu Mosi chung in a phunchiak tau ah, “Bang dawn ding ka hitau em?” a tiu a.

²⁵Ama chun LALPA a ko ah; chuleh, LALPA’n thing pakhat a kawkmu ah, zia thing chu tui lakah a se’lut phatin a tui chu a hung thum ta mai a. Zia mun ah chun LALPA’n amau â dingin thupiak pakhat tawh, dan pakhat a siam piak ah, zia chun amau chu a enchian tai.

²⁶A kiang un, “LALPA la Pathian aw chu chingthei tak ah la ngai ua, a mit mu ah thil dik chu la bawl ua, a thupiakte la ngaisak ua, a dante la zop ua ahileh, Aigupta mite chung ah a tunsak hiveite haw hi khat chale la chung un hun tunsak lo ding ka hi: keima hi LALPA, nanghaw hi’dampa chu ka hi’ngal in,” a tia.

²⁷Chuleh, Tuinâk sawm leh pani tawh, tûmthing sawm sagi umna Elim mun chu a hung tung tau a: Tuipang ah chun a giak tau hi.