Read Vaiphei PAWTDAWNA THU 17 Bible Online

PAWTDAWNA THU 17 - Vaiphei bible

PAWTDAWNA THU 17

¹Sin gamthip ah kipat chun Israel mipi zosia chu LALPA’n thu a piak dungzui in a ban ban in a kichawn pek ua. Rephidim mun ah a giaknau ah chun dawn ding tui a um ta pua’n.

²Tichun, mipite chun Mosi a kinakpi tau ah, a kiang in, “Ka dawn ding uh tui ei pia’n,” a tiu a. Mosi’n a kiang un, “Bang ding ah ei kinakpi la hiu em? Bang ding ah LALPA patep la hiu em?” a tia.

³Himaleh, mipite chu tuidu in a dangchâk ta ma mau a; tichun, mipite chu Mosi chung in a phunchiak tau a, a kiang in, “Bang ding ah kei uh leh ka chateu leh ka ganchateu dangchâk ah thi’sak ding ah Aigupta ah kipat lei puidaw a hem?” a tiu a.

⁴Tichun, Mosi chunle LALPA a ko ta’n, “Zia mipite hi bang law ding ka hi tam? Suang ah ei seplum dingsa’n a um ziang tau hilam?” a tia.

⁵LALPA chun Mosi kiang in, “Mipite malam in chia pek inla, chuleh, Israel upate lak ah khenkhat le pui inla; chuleh, Nail luipi la khetna tiang kha chawi inla, chun chia in.

⁶Horeb ah Suangpi chung in la ma-âng ah a la ding di ka hi. Suangpi chu jep in la tin, zia kipat chun mipite dawn ding tui hung pawt ding ahi,” a tia. Zia gual chun, Israel upate mit mu ah chun Mosi’n a bawl tai.

⁷Zia mun min chu Massah leh Meribah a sak tai: Israel chate’n ama a kinakpi ziak uh leh, LALPA I lak ua um a hem, umlo tia a patep ziak un.

⁸Ziaphatchun, Amalekte a hung ua, Rephidim mun ah chun Israelte a hung do tau a.

⁹Mosi chun Joshua kiang in, “Mi hun zendok inla, pui inla, Amalekte hi vado un; jing leh ka khut ah Pathian mol hi chawi in, mualvum chung ah chun a la ding ding ka hi,” a tia.

¹⁰Tichun, Mosi’n a gen tâk gual in Joshua’n le a bawl ah; Mosi, Aron leh Hur chu mualvum chung ah kaldok in, Amelekte chu a vado tau hi.

¹¹Mosi’n a bân a jak lai sia chu Israelte’n a zo ua; a ban a kiak niam phat leh Amalekte’n a zo ngen sek ua.

¹²Himaleh, Mosi banthâ a hung kham ta’n; tichun, suang pakhat a hun lau ah, a kichutsak ua. Aron tawh Hur chu a langkhat gêl ah dingin, a khutbân teni chu a dawp piak gêl tau a: Tichun, nitum tiang in a bân chu a jak thei tai.

¹³Tichun, Joshua’n Amalek leh a mipite chu a chemjam in a that zo tai.

¹⁴Ziaphatchun, LALPA chun Mosi kiang in, “Hetzingna dingin zia hi lekhabu khat in zik inla, Joshua het dingin gen kit in: Amalekte chu van nuai ah kipat in nuaimang ding ka hi,” a tia.

¹⁵Tichun Mosi’n mâichâm pakhat a siam ah, a min dingin Jehovah Nissi ti a sak tai.

¹⁶Ama chun, “LALPA puanlap chu khâisâng un! LALPA’n a khang a khang in Amalek chu do ding ahi ngal in,” a tia.