Read Vaiphei PAWTDAWNA THU 18 Bible Online

PAWTDAWNA THU 18 - Vaiphei bible

PAWTDAWNA THU 18

¹Midian gam ah thiampu, Mosi sungpa Jethro chun, Mosi tawh a mipi Israelte â ding ah Pathian in thil a la bawl piak zosia leh Aigupta gam ah kipat Israelte chu LALPA’n a puidok tai ti a het phat in,

²Mosi’n a la nutsia, a ji Zipporah chu a sungpa Jethro chun,

³a chapa panite chu tawh a hun pui a. A chapa khatpa min chu Gershom ahi (Ama chun, “Khualgam ah hin malzin ka la hi,” a ti ziakin;)

⁴a pakhat zawkpa min chu Eliezer ahi (ama chun, “Ka pa Pathian chu ei panpipa a hia, Pharaoh chemjam ah kipat in ei hukdok tai,” a ti ziak in.)

⁵Mosi sungpa Jethro chun Mosi ji tawh a chapa teni chu gamthip mun ah, Pathian tâng ah, Mosi giakna mun ah chun a hun pui ta’n.

⁶Chuleh, Mosi kiang ah chun, “Keima la sungpa Jethro hi la ji tawh, la chapa teni tawh ka hung ui,” ti’n a thuthâk a.

⁷Mosi chu a sungpa lamtua dingin a kipandok ah, a âng ah chun a bok khup ah, a chawp ah; a chanchin teu kidongtua in, Biakbûk sung ah chun a lut tau a.

⁸Mosi chun, LALPA’n Pharaoh leh Aigupta mite chung ah Israelte ziak ah a thilbawl zosia tawh, a hungnau lamkâl ah gentheina a chung ua tung zosia tawh, LALPA’n zia haw zosia lak ah kipat a hukdaw dante chu a sungpa kiang in a hil tai.

⁹Aigupta mite khut ah kipat hukdok ah, Israelte chung ah LALPA’n thilpha a bawl piak zosiate ziak ah chun Jethro chu a kipak ma ma a.

¹⁰Jethro chun, “Aigupta mite tawh Pharaoh khut ah kipat nangma hun hukdokpa LALPA chu pâk in um ta hen:

¹¹Tu’hin, LALPA chu pathian dang zosia sâng in a lianzawi ti ka he tai; a chung ua nunsia tak ah thu a nei khum zing lai un, a mipite chu Aigupta mite khut ah kipat in a hukdok ta’ngal in,” a tia.

¹²Chuleh, Mosi sungpa Jethro chun hâlmang thillat leh kithoinate chu Pathian â dingin a hun la; chuleh, Aron leh Israel upate zosia chu, Pathian âng ah Mosi sungpa an nêkpi dingin a hung khawm tau hi.

¹³Chuleh, a jing ah Mosi mipite vaihawm piak ding ah a hung kichut phatin, mipite chu jingkal ah kipat nitâk tiang in Mosi kiang in a ding kual ua.

¹⁴Mipite zosia â ding ah a thilbawl dante chu a sungpa’n a mu in, “Mipite â ding ah la thilbawl dan hi bangti a hem? Bang ding ah nang ngen ah kichu, mipite chu jingkal ah kipat nitâk tiang hial ah la kiang ah dinsak la hem?” a tia.

¹⁵Mosi’n a sungpa kiang in, “Mipite hi Pathian dong ding ah ka kiang ah hung sek a hiu;

¹⁶thubuai a nei phat ua leh ka kiang in a hung sek ua, khat leh khat kikâl ah thubuaite chu ka la tan piak sek ah; chuleh, Pathian thugente leh dante chu ka la hilsek ahi,” a tia.

¹⁷A sungpa chun a kiang in, “La thilbawl dan hi a pha puai.

¹⁸Nang leh la kiang ah um mipite hi kisuchau ngei ngei ding la hiu hi. Zia hi nang â dingin a giksak talua ahi; nangma ngen in bawl zo pua’n la.

¹⁹Tu’hin ka thu ngai in: La bawl ding dan hun hil ing ka tin, Pathian in hun umpi ta hen! Nangma chu Pathian kiang ah mipite sik in pang inla, a thubuaiteu chule Pathian kiang in tut inla;

²⁰nang in amau chu thupiak leh dante zilsak inla tin; chuleh, a um ding dan leh a bawl ding leh bawl lo dingteu hil in.

²¹Chuleh, mipite lak ah kipat mi matthei, Pathian lau, mi thudik, golgûkna doilote chu têldok inla: zia gual mite chu sang khat chung ah te, za khat chung ah te, sawmnga ah chung ah te leh sawm khat chung ah te vaihawm dingin a chung un koi inla;

²²chutileh, amau chun mipite chung ah hun zosia ah thu tan piak intiu in, thubuai lian taphot chu la kiang in hun tut intin uh, thu nepnawi taphot chu amau in a la tan diu ahi. Chutichun, nang â dingin jangkhai intin, amau chun la puakgik hun puakpi ding a hiu.

²³Pathian in thu a hun piak dungzui ah zia gual ah hi la bawl chun, zia tak chuleh pang zo bep in la tin, zia tak ah mipite hile thamuang in amau In lam chiat ah kile’kit thei in au,” a tia.

²⁴Tichun, Mosi’n a sungpa thugen chu a ngai ah, a gen dan zosia chu a zui tai.

²⁵Mosi chun Israelte zosia lak ah kipat in mi matthei dawmte chu a têldok ah, amau chu mipite chung ah luchang in, sang khat chung ah te, za khat chung ah te, sawmnga chung ah te leh sawmkhat chung ah te vaihawm dingin a siam tai.

²⁶Tichun, amau in mipite chung ah hun zosia’n vai a hawm ua; thu haksa deute chu Mosi kiang in a hun tut ua: thu nepnawite chu amau in a ngaitua piak sek ui.

²⁷Ziaphatchun, Mosi’n a sungpa chu a chiasak ta’n; ama le a gam lam un a chia kit tai.