Read Vaiphei PAWTDAWNA THU 21 Bible Online

PAWTDAWNA THU 21 - Vaiphei bible

PAWTDAWNA THU 21

¹Ziate hi mipite ma-âng ah la taklat ding dan thuguatte chu ahi:

²Hebrai mi pawsal la suak ding ah la chawk phot leh, kum guk sung la na sêm intin, a kum sagi’na tak leh bat nei lo ah la pawtsak ding ahi.

³A chang ah hung lut ahileh a chang in pawt kit intin, ji nei ahileh a ji tawh a pawt kit ding ahi.

⁴A pu’n ji a neisak ah, chanu chapa a nei tâk ahi chun, a ji tawh, a chate chu a pu â hi’n tin, ama bep a pawt ding ahi.

⁵Himaleh, suakpa chun, “Ka pu, ka ji leh ka chate ka hepi hi, suak lo gual ah zalen in pawt pua’ng ka,” a ti chun;

⁶a pu chun vaihawmte kiang in pui intin. Ama chu kotbiang a hem, kotbul a hem chun hun pui in a. Chuleh, a pu’n muithal in a bil vihawm piak intin; tichun, a pu na chu a dam sung sia sêm ta’n a.

⁷Mi pakhat in a chanu chu mi suak ding ah a zawk chun, zia suaknu chu suak pawsalte gual in pawt thei pua’n a.

⁸Suaknu chun ama hualtu a pu chu a suklungkim zaw lo chun, a tatdawsak kit thei ding ahi; a chung ah a bawl ding gual ah a la bawl nop lo ziakin a suaknu chu gam dang mite kiang in a zokdaw theilo ding ahi.

⁹A chapa ji ding ah a hual ahileh ama chanu gual gual in a bawl ding ahi.

¹⁰Ji dang a neibe leh a nêk leh dawn, a nîk leh puan leh a jipi hi’na a thuneina a sukkiam piak lo ding ahi.

¹¹Zia thil pathumte hi a bawlpiak lo leh suak ahi’na kipat bat nei lo in pawtdok thei intin, sum bangma a sên lo ding ahi.

¹²Kua’nle mi a satlup chun, ama chule tha ding ahi.

¹³Ahi’n, kua’nle tup mawng hilo ah Pathian in ama bawl ding him him a la bawl khaksak ahi chun, a tailutna ding, a bitna mun ding guat piak ing ka.

¹⁴Ahi’nla, tup mawng ah dawha phalo nei ah that ahileh vang, ama chu thalup dingin ka mâichâm ah kipat in la puidaw ding ahi.

¹⁵Chuleh, kuale a nu a hem, a pa a hem vaw taphot chu thalup ngei ngei ding ahi.

¹⁶Kuale mi gu ah zuak mang a hem, a khut ah kol nalai a hem chule tha ngei ngei ding ahi.

¹⁷Kuale a nu a hem, a pa a hem hânsia lawkhum taphot chu tha ngei ngei ding ahi.

¹⁸Chuleh, mi pani a kinak ua, pakhat in a langpa suang ah a se a hem, a khuttum ah a chup a hem ah, thi ziang lo maleh lupna ngak in um ta leh;

¹⁹hung tho kit zo ta hen la, tiangkhut mang in hung vakdok zo kit ta leh, ama chung ah khut thapa chun, a damlo sung nikhawtha chu pia’n tin, a dam thianna ding tiang liau intin; tichun, a chung thiang bep in a.

²⁰Mi pakhat in a suakpa a hem, a suaknu a hem chu mol in vua hen la thi ta leh, suak neipa chu gawt tei tei ding ahi.

²¹Ahi’n, a suak chu ni khat a hem, ni ni a hem hing nalai ah thi ahi’chun, a suak neipa chu gawt lo ding ahi: a suak chu a nei thilte lak ah simkhawm ahi ngal a.

²²Chuleh, mi kisualte lak ah pakhat in nupi gâi pakhat sukha hen la, a nau chu seta leh, a nu chung ah siatna dang bangma umlo maleh, a pawsal in a phût dungzui ah vaihawmte’n a bithiak zat zat uh a sukha pen chun a liau ding ahi.

²³Ahi’n, siat zawk diak na’n a zui chun, hinna thasâng ah hinna a piak ding ahi.

²⁴Mit thasâng ah mit, ha thasâng ah ha, khut thasâng ah khut, keng thasâng ah keng,

²⁵meikâk thasâng ah meikâk, beliam thasâng ah beliam, jep thasâng ah jep a piak ding ahi.

²⁶Chuleh, mi pakhat in a suakpa a hem, a suaknu a hem mit sukha hen la, a mit chu sia ta leh, a mit siat ziak ah chun suak chu pawtsak intin, a zalensak mai ding ahi.

²⁷Mi pakhat in a suakpa a hem, a suaknu a hem ha chu sutha kha ta leh; a ha ziak ah chun suak chu pawt sak intin, a zalensak ding ahi.

²⁸Bawngchal in mi pakhat a sîtlup chun, zia bawngchal chu suang ah se’lup ding a hia, a sa chule nêk lo ding ahi; ahi’n la, bawngchal neipa chu a thiang ding ahi.

²⁹Ahi’n, zia bawngchal chu tu’ ma le mi si sek ahi ah, zia chu a neipa kiang ah le gen hi’napi ah, a bawngchal chu ching diak lo ah, mi hun si’lum ahi’chun, bawngchal chu suang ah se’lup ding a hia, a neipa le tha ding ahi.

³⁰Bawngchal neipa chu that lo ah, a hinna kitatdawna ding ah liausak ding ahi’chun, a kiliausak jat jat chu a piak mai ding ahi.

³¹Tangval a hem, nungak a hem khat phil taleh, zia thutanna dungzui ah hin bawl piak ding ahi.

³²Bawngchal chun suakpa a hem, suaknu a hem khat si ta leh, bawngchal neipa chun suak neipa chu dangka shekel sawmthum a piak ding ahi; chun, bawngchal chu se’lup ding ahi.

³³Mi pakhat in kawkhûk sit lo a hem, a khûk chaw a sit bawl lo a hem in nusia hen la, bawngchal a hem, sabiltung a hem khat ke’lut ta leh,

³⁴kawkhûk neipa chun liau intin, gancha neipa chu sum a piak ding ahi; a gancha ke’lum pen chu a kawkhûk neipa a chan ding ahi.

³⁵Chun, mi pakhat bawngchal in midang bawngchal a sukliam ah, bawngchal liam chu a hung thi chun, bawngchal hing chu zok hi’n tin, a man chu a kihop diu a hia; chuleh, bawngchal thi’pen sa chule a kihop mai ding uh ahi.

³⁶Himaleh, bawngchal chu tu’ma lam ah le gancha siveu sek ahi ti a neipa hiatsak ahi’nung ah le, ching diak lo ahi’chun, ama chun bawngchal thatheng in bawngchal dang pia’n tin, bawngchal thisa luang chu a kichan ding ahi.