Read Vaiphei PAWTDAWNA THU 23 Bible Online

PAWTDAWNA THU 23 - Vaiphei bible

PAWTDAWNA THU 23

¹Zuau thu la genjak lo ding ahi. Diklo tak ah hiatpitu ah pang dingin dawha phalote tawh kikhutzopna la nei lo diu ahi.

²Thil diklo bawl dingin mi a tam lam lam la mawk zui lo ding ahi; mi kinialna hiatpitu ah la pan phat leh, a dik lai thiam lo chansak dingin a tam lam lam in pang ziang kin la;

³kihêkna mun inle mi chaga ahiziak in la dangdâk lo ding ahi.

⁴La mêlmapa bawngchal a hem, sabiltung a hem vâk mang la mu ahileh, a kiang lam ah la hun pui tung kit tei tei ding ahi.

⁵Nang hun mudapa sabiltung khat, a puak gik in a del den lai tak la tuak khâk leh, panpi lo ah la nutsia lo ding, sabiltung chu la panpi tei ding ahi.

⁶Vaihawmna ma âng ah mi chaga ahiziak in a dikna chu kihiatlosak kin.

⁷Hekna diklo lak ah kipat in kikoikiang inla, mawna neilote leh midikte chu that kin: mi diklote phuba chu la ding ka hi’ngal a.

⁸Golgûkna him him la lâk lo ding ahi; golgûkna hin vaihawmte mit a hi’thûm ah, midikte dikna a lebawl sek ziakin.

⁹La lak ua chêng malzinte la sukgenthei lo diu ahi: Aigupta gam ah malzin la la hi’tâk ziak un malzin lungthim la he ta ngal un.

¹⁰Kum guk sung la gam ua buchi the’ in la tin, a gate chu kilak khawm in la tin;

¹¹a kum sagi’na phat leh gam chu kichawl damsak in la tin; a ga him him le la lak khawm lo ding ahi: tichun, la lak ua mi gentheite’n kilak khawm intiu in, amau nêkbangte chu zu leh vâte’n a nêk ding uh ahi. Zia gual a hin la grep huan leh la Oliv huanteu le la bawl sek diu ahi.

¹²Ni guk sung na sêm in la tiu in, a nisagi ni leh la kichawl dam diu ahi; tichun, la bawngchal leh la sabiltung un kicholdamna a muu ah, la In ah piang la suakte leh gam dang mi la lak ua chêngte le a kichawldam theina ding un.

¹³La kiang ua ka gen zosia hi pha tak in ngai un; pathian dangte min him him sua ki’un la, la kam ua kipat in gitdawsak him him kiu in.

¹⁴Kum khat sung in kei â dingin Kût thumvei la bawl sek diu ahi.

¹⁵Thawipanglo Kût la bawl diu ahi: a hunbî ding ah ka guatna Abib tha leh, thu ka hun piak gual in ni sagi thawipanglo vaithum la nêk diu ahi: zia tha hin Aigupta gam ah kipat hung pawtdok la hiziak un. Kuama khutngawn in ka kiang ah a hung kilat lo ding uh ahi.

¹⁶Lou ah la tu, la nasep ga lakkhawmna Pawltâk Kût la mat diu ahi. Kumtawp phat ah, la nasepna gate lou ah kipat la puak khawm zaw phat leh bu sunkhawmna kût la mat sek ding uh ahi.

¹⁷LALPA PATHIAN âng ah la lak ua pawsal zosia kum khat sung in thumvei a kilâk tei tei diu ahi.

¹⁸Kithoina gan thisan chu thawi kisaw tawh la lat khawm lo diu ahi; ka kiang ah kithoina gancha thau chu a jingkal kit tiang in la umsak lo ding ahi.

¹⁹La gam ah ga masa doichuam bikte chu LALPA la Pathian In sung ah la hun puak lut ding uh ahi. Kelno chu a pi nawitui in la huan lo ding ahi.

²⁰Ngai in, la ma-âng ah vansawlchâk pakhat, la lampi nangma hun vêng ding leh nang â ding ah ka tiamna gam ah hun pui lût dingin ka hun sawl hi.

²¹Ama thu chu ngaisak inla, a thu mang in: hilungna kin la, ama’n la bawlkhialnate chu hun ngaidam lo hial ding ahi ngal in: ka min le ama ah chun a um ngal a.

²²A thu la ngai ah, ka gen zosia la zui leh, la gâlte â ding ah gâl leh, la mêlmate a ding ah mêlma hi ding ka hi.

²³Ka vansawlchâk chu la ma-âng ah a chia phat leh, Amor mite, Hit mite, Periz mite, Kanaan mite, Hiv mite leh Jebus mite gam chu hun pui tung intin; amau chu gawtmang dim dem ding ka hi’ngal a;

²⁴a pathianteu âng ua la bawkhup lo diu, a nau le la sep lo ding uh, a bawldan uh le la zui lo diu ahi: amau chu la tawden ua, a biak uh dawikhuamte chule la khetbuang dim dem ding uh ahi.

²⁵LALPA la Pathian uh na la sep ding uh ahi: tichun, la an uh leh la tui uh hun maljawl ding ka hi; chuleh, la lak ua kipat natna lamang ding ka hi.

²⁶A piangsual leh a chîngle la gam sung un um pua’n a: La dam sung niteu huitungsak ing ka.

²⁷La âng un keima launa hun sawl ing ka tin, la tuak khak ding mi teu zosia chu hun subuai ing ka tin, la mêlmateu zosia chu hun jamsiat sak ding ka hi.

²⁸Chun, la ma-âng ah natpi hun sawl ing ka tin, ziate chun Hiv mite, Kanaan mite leh Hit mite chu la ma-âng ua kipat in del dawsak ding ka hi.

²⁹Amau chu kum khat sung in la ma-âng ua kipat in deldok ziang lo ding ka hi: Chutilochun, gam chu thip talua’n tin, nang uh â ding ah gamsa hângte hung pung kha’n au.

³⁰La hung pun ua, a gam la hun lua zaw masiau, a them them in amau chu la ma-âng ua kipat in hun nawdaw piak ding ka hi.

³¹Chuleh, la gamgi chu Tuipi San ah kipat Philistinte Tuipi tiang; gamthip ah kipat Euphrates luipi tiang in gît piak ing ka; a gam ah chêngte chu la khut ah pia ding ka hi’ngal a: Chuleh, amau chu la ma-âng ah kipat in la nawdok ding ahi.

³²Amau tawh thuthung la siam lo hial diu a hia; a pathianteu tawh le la siam diak lo ding uh ahi.

³³Amau chu la gam sung ua la chênsak lo ding uh ahi: Chutilochun, ka chung ah thil phalo hun bawlsak kha’n au: A pathian uh la biak ua ahileh, nang uh â ding ah thâng hung hilo thei lo ding ahi ngal ah, a tia.