Read Vaiphei PAWTDAWNA THU 25 Bible Online

PAWTDAWNA THU 25 - Vaiphei bible

PAWTDAWNA THU 25

¹LALPA chun Mosi kiang in:

²“Israelte chun kei â ding ah thilpiak pakhat chiat hun chawi dingin gen inla; kua’nle a lungthim ah kiphalna a nei dungzui chiat ua a piak taphot uh chu, ka kiang ah thilpiak dingin la sân ding ahi.

³Amau ah kipat thilpiak la sân dingte chu ziate hi ahi: sana, dangka, sum-eng,

⁴pattak leh puan malngat leh kêlcha mul a dum, a sandup leh a sandâng leh kêlmulte,

⁵belamchal vun kidianip, savun thiang, thinggi thing,

⁶thaumei tui ding, thau hel gimtuina kinu’ chi tawh, gimtui siamna ding sathaute,

⁷thiampu puanâk chual leh awmphaw jemna ding ah Onik leh suang mantam chi taphot le hi’n a.

⁸A lak ua ka chênden theina dingin mun thiangtho pakhat ei bawl piak uh hen.

⁹La kiang ah ka hun etsak ding zosia dungzui in biakbûk sak ding dan leh a sung ah matchâk ding la siam ding uh ahi,” a tia.

¹⁰Thinggi thing in thingkuang pakhat la siam diu ahi: a sau dan tong ni leh a kim, a vailam tong khat leh a kim, a sân dan tong khat leh a kim hi’ntin.

¹¹Sana thiang la luan khum ding ahi, a sung leh a pawlam le la luan khum ding ahi; a chung lam geikawl sana la siam ding ahi.

¹²Chuleh, a bil ding pali sana in siam inla, a ning pali ah chun khat chiat la bul ding a hia; a bil pani chu a ning langkhat ah um intin, a ning langkhat ah chun a bil pani ma um in a.

¹³Thinggi thing in mol khat siam inla, sana tui la luan ding ahi.

¹⁴Thingkuang jawnna dingin zia mol chu a ning chiat ah a bil sung ah chun la gol lut ding ahi.

¹⁵Mol haw chu a bil sung ah chun um den ta’n ah; lakdaw kit tâk lo ding ahi.

¹⁶Thuthung ka hun piak ding hi zia thingkuang sung ah chun la koihe ding ahi.

¹⁷Chuleh, sana thiang in ja’ngaina chutpha pakhatle la bawl ding ahi; a saulam chu tong ni leh a kim, a vailam tong khat leh a kim hi’n a.

¹⁸Ja’ngaina chutpha mongte ni ah koi dingin sana Cherub pani, sek ah kisêk ah la siam ding ahi.

¹⁹A mong langkhat ah um dingin Cherub pakhat siam inla, a mong langkhat ah um dingin Cherub dang pakhat ma la siam ding ahi; ja’ngaina chutpha mong langni chu tawh kizop ah um gêl dingin Cherubte la siam ding ahi.

²⁰Cherubte chu ki-ângngat in ja’ngaina chutpha chu a thau ah lia in, a chung ah chun jak khum gêl in au. Ja’ngaina chutpha lam chu Cherubte chun a âng ngat gêl ding uh ahi.

²¹Ja’ngaina chutpha chu thingkuang chung ah chun koi inla; chuleh, thingkuang sung ah chun thuthung ka hun piak dingte hi la koi ding ahi.

²²Zia tak ah chun nang hun kituakpi ing ka tin, ja’ngaina chutpha chung, thuthung thingkuang chung ah Cherub panite kikâl tak ah chun Israelte kiang ah ka thupiak dingte zosia chu la kiang in hun pia ding ka hi.

²³Thinggi thing in dawkan pakhat, tong ni ah sau, tong khat ah lian leh tong khat leh a kim ah sâng in siam in.

²⁴Sana thiang luan khum inla, sana geikawl le siam in.

²⁵Khutpêk tia ah lian in a geijul ah bâng ding bawl inla, a geikawl dingin sana siam in.

²⁶Chuleh, dawkan â dingin sana bil pali siam inla, a keng palite chung ah, a ning pali ah chun bul in.

²⁷Dawkan jawnna mol thunna ding a bilte chu a geijul ah chun a um ding ahi.

²⁸Dawkan jawnna ding molte chu thinggi thing in siam in la tin, sana la luan khum ding ahi.

²⁹Gimtui hâlna matchâk dingin kuang leh no le siam in la tin; dawn ding thillat sunthâkna ding belbute le la siam ding ahi; sana thiangtho ngen in la siam ding ahi.

³⁰Chun, dawkân chung ah chun ka âng ah umzing dingin Umpi Zing Vaithum chu la koi ding ahi.

³¹Chuleh, sana thiang in thaumei tunna ding la siam ding ahi: zia thaumei tunna ngul ding leh a ngulbulte chu sektum ah kisêk hi’ntin; a khawnte, a pâk kabulte, a pâkjamte zosia chu a kimat chiat diu ahi.

³²Thaumei tunna ngul ah kipat chun, thaumei tunna bâk guk jamdok intin; a langkhat lam ah kipat bâk thum, a langkhat lam ah kipat bâk thum ma jamdok in a.

³³Kuangcha pathumte chu vaisuaklu pâk gual ah kisiam, pâkkhat chiat ah a lu leh a pâk um; chuleh, kuangcha pathum vaisuaklu pâk gual ah kisiam a lu pakhat leh a pâk pakhat ah bâk dang ah chunle a um chiat ding ahi: zia gual chiat ah chun thaumei tunna ngulpi ah kipat bâk paguk jamdokte ah chunle a um chiat ding ahi.

³⁴Thaumei tunna’ chun kuangcha pali, vaisuaklu pâk gual ah kisiam, a lu leh a pâk a um chiat ding ahi.

³⁵Zia bâk panite nuai ah chun a lu pakhat, zia thaumei tunna bâk panite nuai ah chun a lu pakhat, pâk pani nuai ma ah chun a lu pakhat, thaumei tunna kipat hung jamdok bâk pagukte ah chunle a um chiat diu ahi.

³⁶A luchang leh a bâkte chu chi kibang, a leng ah sana thiang kisek ngen ahi ding ahi.

³⁷Thaumei pasagi dingte chule la siam ding ahi: zia thaumei chun salvâk intin; tichun, a âng ah mun awng chu salvâk in a.

³⁸Chuleh, châichete leh mei-ek luakna ding kuangte chule sana thiang ah siam ding ahi.

³⁹Zia chu tawh, a matchâk ding zosia la siamna chu sana thiang talent khat ah gik mang in la siam ding ahi.

⁴⁰Chun, a siam ding dan tâng chung ah la kiang ah ka hun taklat gual tak kha ahi na em ti enchian in.