Read Vaiphei PAWTDAWNA THU 26 Bible Online

PAWTDAWNA THU 26 - Vaiphei bible

PAWTDAWNA THU 26

¹Chuleh, pat thuksa, puanmalngat, a dum, a sandup leh a sandâng ah kisiam puanjak sawmkhat nei in biakbûk la sak ding ahi; thiamnêl tak in cherub lim chuang in la bawl ding ahi.

²Puanjakte sau dan chu tong sawmni leh giat chiat hi’ntin: a vailam tong li chiat hi’n ah; puanjakte chu a let, a neu kibang chiat ding a hiu.

³Puanjak pangate chu kizopmat intin, a dang pangate chule a kizopmat ding uh ahi.

⁴A kizop tuanau puanjak mong ah chun pat dum in a gen la siam ding ahi; zia gual ma chun puanjak gualni’na kizopna mong gei ah chun a gen le la bawl chiat diu ahi.

⁵Puanjak tuak khat ah chun pat-hual gen sawmnga la siam ding ahi; chuleh, a gual ni’na kizopna puanjak gei ah chun a kizawn chiat in a gen sawmnga la bawl ding ahi.

⁶Sana bil sawmnga le siam inla, puanjakte chu zia bil ah chun man tua inla, zia chu Biakbûk khat hi’ngal ziang ding ahi.

⁷Chuleh, biakbûk chungkhû dingin kêl mul in puanjak siam inla: puanjak sawm leh khat la siam ding ahi.

⁸Puanjak khat dung lam chu tong sawmthum hi’ntin; a vailam chu tong li hi hen: puanjak sawm leh khatte chu, a let a neu kibang chiat ding ahi.

⁹Puanjak pangate chu zoptua inla, puanjak pagukte chule khat hung hi dingin zoptua in la tin, biakbûk mai lam ah chun paguk kizopte chu a mong kithep in la jak ding ahi.

¹⁰Chuleh, a kizoptua nau ah a pâmnung pen puanjak masa zaw ah chun, pat-hual gen sawmnga la siam ding ahi: chun, gualni’na zop tuana puanjak gei ah chun pat-hual gen sawmnga ma la siam ding ahi.

¹¹Chun, sum-eng kol sawmnga siam in la tin, zia kol haw chu pat-hual gen sung ah chun thun lut inla; tichun, biakbûk chu zopkhawm in, a leng ah chun biakbûk pakhat hung hiziang ding ahi.

¹²Puanjak mongvâl a kimkhat chu biakbûk tomlam ah chun kikhâitha ta’n a.

¹³Biakbûk hâp langtuak gêl ah chun puanjak mongvâl tong khat gêl um intin, zia chu biakbûk hâp gêl ah a chungkhû dingin a kijak ding ahi.

¹⁴Biakbûk chung khû dingin belamchal vun kidianip ah kisiam leh a pawnung ah khû ding savun thiang pakhatle la bawl ding ahi.

¹⁵Chun, biakbûk khuam lepkhawm dingte chule thinggi thing ngen la bawl ding ahi.

¹⁶Khuam kilem khawmte sân dan chu tong sawm chiat leh, a vailam tong khat leh a kimkhat chiat in la bawl ding ahi.

¹⁷Khuam kilem khawm ah chun a dangte tawh a kikuai mat theina dingin a bil pani chiat bawl inla, khuam kilem khawm zosia ah chun zia gual chiat chu la bawl ding ahi.

¹⁸Biakbûk â ding ah khuam kilem khawm chu siam in la tin, simlam pang ah um dingin sawmni siam in;

¹⁹zia khuam kilem khawm sawmnite kingakna ding ah chun dangka thik kikhuak hawm sawmni siam inla; a kituana bil panite â ding in a kituana kikhuak pani chiat khuam kilem khawm khat kituana dingin la siam ding ahi: chuleh, a kituana ding ah kikhuak pani ma, khuam kilem khawm nuai ah chun la siam ding ahi, a bilte chu tawh suktua dingin;

²⁰chuleh, biakbûk mallam kâi hâp zawk ah um ding ah chun khuam kilem khawm sawmni ma la siam ding ahi;

²¹chuleh, ziate kituana ding ah dangka thik kikhuak sawmli, khuam kilem khawm pakhat nuai ah pani chiat um dingin siam in;

²²biakbûk tumlam kâi ah um dingin khuam kilem khawm paguk la siam ding ahi.

²³Biakbûk tomlam kil ah pang dingin bankhuam kilem khawm pani siam in.

²⁴Zia khuam kilem khawmte chu a nuai lam uh kikâk intin, a chung lam ah chun a kikaitua ding uh ahi; zia gual hin a paniu in bawl in la tin, amau chu a ning pani ding chu hi’n a.

²⁵Zia gual ah khuam kilem khawm chu pagiat hi’ntin, a kituana ding ah kikhuak dangka thik ah kisiamte chu sawm leh paguk hi’ntin; a tuana ding ah kikhuak pani chu khuam kilem khawm pakhat nuai ah chun um chiat ding ahi.

²⁶Chuleh, thinggi thing a jawl dingin siam in la tin; biakbûk hâp langkhat ah khuam kilem khawmte â ding ah chun thingjawl panga la siam ding ahi;

²⁷biakbûk hâp langkhat lam ah khuam kilem khawm â ding ah chun thingjawl panga; chuleh, biakbûk tumlam kâi kil teni ah khuam kilem khawmte â ding ah chun a jawl panga ma la siam ding ahi.

²⁸Khuam kilem khawmte laizawl pen chun a mong langkhat ah kipat a mong langkhat lam tiang in a thillet ding ahi.

²⁹Khuam kilem khawmte chu sana tui la luan khum ding ahi; thingjawlte thunna ding chule sana bil bawl in la tin, a jawl haw chule sana tui la luan khum ding ahi.

³⁰Tichun, tâng ah la bawl ding dan la kiang ah ka hun etsak dungzui ah khan biakbûk chu la tun daw ding ahi.

³¹Chun, puanjak dingin puanmalngat, thuksa, a dum, a sandup leh a sandângte mang in cherubte lim khutthiam tak ah kikhuithaw ah kibawl la siam ding ahi.

³²Dangka thik kikhuak ah kiphut, thinggi thing sana tui kiluan khuam pali ah sana kuaika chun zia puan chu la bât ding ahi.

³³Zia puanjakte chu puanjak kildenna nuai lam ah chun jak in la tin; chuleh, zia puanjak sunglam ah chun thuthung thingkuang chu la lut in: Tichun, puanjak chu munthiangtho leh mun thiangtho pen kidaidanna hi’ngal in a.

³⁴Ja’ngaina chutpha chu munthiangtho pen ah um, thuthung thingkuang chung ah chun la koi ding ahi.

³⁵Vaithum koina dawkân chu puanjak pawlam ah chun koi inla, thaumei tunna chu biakbûk simlam kâi, dawkan tawh kigâlchân in, dawkan chu a mallam kâi ah koi in.

³⁶Chun, biakbûk kotkhak ah jak dingin puan malngat, thuksa, a dum, a sandup leh a sandâng ah puanjem kikhui thaw bawl in.

³⁷Puanjak jakna ding thinggithing khuam panga bawl inla, zia chu sana tui luan khum inla; puanjak bânna dingte chu sana kuaika siam in: zia khuamte tunna ding ah chun sum-eng kuak panga bawl in.