Read Vaiphei PAWTDAWNA THU 29 Bible Online

PAWTDAWNA THU 29 - Vaiphei bible

PAWTDAWNA THU 29

¹Chun, amau chun kei â ding ah thiampu na a septheina ding un zia gual hin a sukthiantho’na la bawl ding ahi: Bawngchal tuai khat tawh, belamchal pani, demna bei gêl hun la’n la tin;

²thawipanglo vaithum tawh, vaithum pêk thawisawlo sathau kihelsa tawh, vaithum pêk pâ dik dek thawi kisawlo sathau ah kidia tawh la hun lâk ding ahi. Gehu bu changbuang nêl pha tak ah kisiam ahi ding ahi.

³Ziate chu law pakhat ah koikhawm in hun chawi inla, bawngchal tawh, belamchal panite chu tawh la hun choikhawm ding ahi.

⁴Aron tawh a chapate chu kikhopna biakbûk kotkhak bul ah chun hun pui inla, tui in la sil ding ahi.

⁵Chuleh, thiampu kithuamna dingte kha hun la’n la, Aron chu puanâk tawh, thiampu puanâk chual tawh, awmphaw chun thuam inla; thiampu kawnggâk ding ah khutthiam tak ah kigat ah chun la gâk ding ahi;

⁶chuleh, thiampu dialkop chu kopsak inla, zia dialkop chung ah chun lal lukhuk thiangtho chu la khuksak sawn ding ahi.

⁷Tichun, sathau nu’chi hun la’n la, a luchang sunkhum in; sathau chu la nu’ ding ahi.

⁸Chuleh, a chapate chule hun pui in, puanâk chualte chu la âksak ding ahi.

⁹Chuleh, Aron tawh a chapate chu kawnggâk in gâk inla, dial la kopsak ding ahi; tichun, thiampu hi’na chu kumtuang â ding ah guat det piak in a chang ta ding uh ahi. Zia gual ah chun Aron tawh a chapate chu la sukthiantho ding ahi.

¹⁰Chun, kikhopna biakbûk mai lam kotbul ah chun bawngchal khat hun la’n la tin, Aron tawh a chapate chun a luchung ah a khut uh nga’n tiu in;

¹¹zia bawngchal chu kikhopna biakbûk kotbul ah chun, LALPA âng ah la thalup ding uh ahi;

¹²bawngchal thisan bang jat a hem chu la khutzung ah la’n, mâichâm ningbawk chu la jut ding ahi; thisan dang cheng chu mâichâm bul ah chun la sungtha ding ahi.

¹³Chuleh, sasung chu, a thin tuam a lapte, a kãl teni tawh a chung ah um a thau zosia chu ladok in mâichâm chung ah chun la hâltum ding ahi.

¹⁴Himaleh, bawngchal sa leh a vun leh a êk chu daipâm lam ah la hâltum ding ahi: zia chu gitlo thoina chu ahi.

¹⁵Chuleh, belamchal pakhatle hun la’n la tin, Aron tawh a chate chun zia belamchal luchang ah chun a khut uh nga’n tiu in;

¹⁶belamchal chu that in la tin, a thisan chu la in, mâichâm kîmvêl la the’khum ding ahi.

¹⁷Ziazaw chuleh, belamchal sa chu a bat bat in sem nêl inla, a sung leh a kengte chu sawp thiang inla, a sa a bat bat ah la sem nêl chu tawh a luchang chu koikhawm inla;

¹⁸mâichâm chung ah chun belamchal sa chu a pum in la hâltum ding ahi; zia chu LALPA â ding ah hâlmang thillat chu ahi: LALPA â ding ah gimtui, mei ah lat chu ahi.

¹⁹Chuleh, belamchal khat chule hun kai inla, Aron tawh a chate chun a luchung ah chun a khut uh nga’n tin uh;

²⁰ziazaw chuleh, belam chu that in la tin, a thisan bang jat a hem lân in la tin, Aron leh a chapate chang lam bilmong leh khutpi, leh a kengpiteu chu nu’ inla, a thisan dang cheng chu mâichâm kîmvêl chu la the’khum ding ahi.

²¹Chuleh, mâichâm chung ah thisan neukhat la’n la, kinu’chi sathau chule neukhat la’n la, ziate chu Aron tawh a kithuamnate chu la the’khum ding a hia, a chapate leh a kithuamnau vante chule la the’khum ding ahi; ziaphat chuleh, ama leh a kithuamnate leh a chapate leh a kithuamnateu chu sukthiantho hi ding ahi tai.

²²Belamchal thau, a meibul thau, a sungthau leh a thin tuamte, a lapte tawh, a kãl panite tawh, a jangthau tawh, a chang lam liang chu hun la’n la tin (zia chu namdetna belamchal ahiziak in;)

²³law sung ah kikoi sathau ah kikang vaithum tang khat tawh, vaithum pei khat tawh, LALPA â ding ah thawisawlo ah kisiamte kha hun la’n la;

²⁴a leng in Aron khutpêk sung leh a chapate khutpêk sung ah koi inla, LALPA âng ah pei thillat dingin pei sak in.

²⁵A khut ua kipat in lâkpiak kit inla, LALPA â ding ah gimtui hi dingin mâichâm ah, hâlmang thillat chung ah chun la hâltum ding ahi: zia chu LALPA â ding ah mei ah thillat chu ahi.

²⁶Aron namdetna belamchal îk chu ladok in, LALPA âng ah pei thillat dingin la pei ding ahi: zia chu nangma chantum ding chu ahi.

²⁷Aron tawh a chate thiampu hi’na namdetna belamchal îk pei thillat ding ah pei ah um ta chu tawh, a chang lam liang, pei thillat ding ah pei ah a la um ta cheng chu suthiangtho in la tin:

²⁸Zia chu Israel suante lak ah kumtuang ah Aron leh a cha pawsalte chantum ding ah guat chu hi’ntin; zia chu pei thillat ahi: kichamna thillat a kithoinateu lak ah Israel suante’n a pei thillat ding uh chu hi hen, LALPA â ding ah pei thillat ngei chu ahi ngal a.

²⁹Chuleh, Aron kithuamna sukthiantho ah um zosiate chu, ama nung ah a cha pawsalte’n hun luasawn jel intiu in; ziate ah chun kivan in sathaunu’ leh sukthiantho in a umtheina ding un.

³⁰A cha pawsalte lak ah ama thatheng ah thiampu hung pang ding pen chun, mipi kikhopna biakbûk ah biakna nasêm ding ah a lut phat leh ni sagi a âk ding ahi.

³¹Namdetna belamchal chu la’n la tin, mun thiangtho ah chun a sa la huan ding ahi;

³²Aron tawh a cha pawsalte chun, zia belamchal sa kihuan chu tawh law sung ah vaithum kikoi khawmte chu, mipi kikhopna biakbûk kotbul ah chun a nêk diu ahi.

³³Chamna thillat, amau namdetna ding leh hithianthona ding ah kilân zosia chu amau in neu hen la; himaleh, thilzek thiangtho ahiziak in mi dang in a nêk lo diu ahi.

³⁴Zia namdetna sa a hem, vaithum a hem, a jing tiang ah nêkbang um nalai chu, a them a nen ah, mei ah hâltum ding ahi: Zia chu thilzek thiangtho ahiziak in a nêk lo hial ding uh ahi.

³⁵Tichun, thu ka hun piak zosia gual ah chun Aron tawh a cha pawsalte chung ah chun la bawl ding ahi: Ni sagi sung in amau namdetna la bawl ding ahi.

³⁶Chuleh, nisi’n gitlo kithoina ding ah bawngchal pakhat jel kichamna dingin la hun lat ding ahi. Chuleh, kichamna ding ah thillat la hun bawl lai in, mâichâm â dinginle gitlo kithoina la hun bawl diu a hia; la sukthiantho theina dingin sathau la nu’ ding uh ahi.

³⁷Ni sagi mâichâm â ding ah kichamna siam in, la hithiantho ding a hia; tichun, mâichâm chu a thiangtho pen hung hita’n a; mâichâm sukha’ taphot chule a thiangtho hung hi’ngal in a.

³⁸Tu’hin, mâichâm chung ah la thillat ding chu ziate hi ahi: belamno kum khat ah upa pani jel nisi’n in la hun lân ding uh ahi.

³⁹Belamno khat chu jingkal lam in lân in la tin, belamno khat chu nitâk lam in la hun lân ding uh ahi;

⁴⁰belamno a masa zaw chu tawh, changbuang te’na dim khat mun sawm ah khen ah mun khat tawh, thau kihekdok te’na Hin khat mun li ah khen ah mun khat tawh kihel; chuleh, dawn thei thillat ding ah uain Hin khat mun li ah khen ah mun khat la hun lat diu ahi.

⁴¹Chuleh, belamno khat zawk chu nitâk lam a lat ding ahi; zia chu jingkal lam ah nêkthei thillat dan gual leh dawn thei thillat dan gual in gimtui, LALPA â ding ah mei ah thillat hi dingin la lat ding ahi.

⁴²Zia chu la suante tiang ah mipi kikhopna biakbûk kotbul ah, LALPA âng ah hâlmang thillat bawl zing sek ding hi’ntin; zia tak mun ah chun hun kihopi dingin hung sek ding ka hi’ngal a.

⁴³Zia tak mun ah chun Israelte hun kihopi sek ing ka tin; chuleh, ka lopina’n zia mun chu hi’thiantho in um in a;

⁴⁴chuleh, mipi kikhopna biakbûk leh a mai lam chu hi’thiangtho ing ka.

⁴⁵Tichun, Israel suante lak ah chun chêng zing ing ka tin, a Pathian uh hi’ng ka.

⁴⁶Chuleh, amau haw lak ah ka chêntheina dingin, Aigupta gam ah kipat puidok sek LALPA a Pathian uh chu ka hi ti he ta’n tin uh: Keima LALPA a Pathian uh ka hi.