Read Vaiphei PAWTDAWNA THU 3 Bible Online

PAWTDAWNA THU 3 - Vaiphei bible

PAWTDAWNA THU 3

¹Mosi chun a sungpa Jethro, Midiante thiampupa belamte chu a ching ah; belamte chu gamthip khêl lam ah, Pathian tâng, Horeb tiang hial in a vaching a.

²Zia tak ah chun, LALPA vansawlchâk pakhat a kiang ah hampa buk lak ah meikuang in a hung kilâk ah; ama chunle a vak en ah; ngaitia, hampa buk chu a kuang ah, himaleh bangma a kâng diak puai.

³Ziaphatchun, Mosi’n, “Kihei in, zia thil hi vak en tiam ka, bangtidan ah hambuk saw kâng lo a hem?” a tia.

⁴A en dingin a kihei tai ti LALPA’n a mu phât in, Pathian in hambuk lak ah kipat chun, “Mosi, Mosi,” ti’n a hun ko ta’n. Ama’nle, “Zia tak hin ka um hi,” a hun tia.

⁵Ziaphatchun, ama’n, “Hun nai kin! La kengtawdap kha sût in; la dinna mun kha mun thiangtho ahi ngal in,” a hun tia.

⁶Ama chun a gen zom pek ah, “Keima hi la pa Abraham Pathian, Isak Pathian leh Jakob Pathian chu ka hi,” a tia. Mosi’n Pathian a et ngam lo ziakin a mai chu a sêl tai.

⁷Chuleh, LALPA chun, “Aigupta gam ah ka mipite thokgim dan ka en zui zing a; chuleh, a nasepsak hotuteu ziak ah a kâ thawmteu chule ka he tai. A thokgim danteu chule ka hechian ta ahi.

⁸Amau chu Aiguptate khut ah kipat hukdok ding leh zia gam ah kipat chu puidok ah, gam hawi leh kiningting, khuaizu leh bawngnawi luanna gam, Kanaan mite, Hit mite, Amor mite, Periz mite, Hiv mite leh Jebus mite chênna gam lua ding ah pui lût ding ah hung suk ka hi.

⁹Israel mite kâ thawm chu ka kiang a hung tung ta’n; Aiguptate engbawl dante chule ka muchian ta’ngal in.

¹⁰Tichun, hung inla, ka mipi Israelte chu Aigupta gam ah kipat puidok ding ah Pharaoh kiang ah chia dingin nangma hun sawl ding ka hi,” a tia.

¹¹Himaleh, Mosi’n Pathian kiang in, “Israel chate hi Aigupta gam ah Pharaoh ah kipat vapuidok dingin kei hi kua ka hia hem?” a tia.

¹²Ama chun, “Keima’n nang hun umpi ing ka; chuleh, zia hi keima hun sawl ngei la hinai ti tepte’na hi’n a: Mipite chu Aigupta gam ah kipat la hun puidaw phat leh, zia tâng chung ah hin Pathian ho ding la hi,” a tia.

¹³Himaleh, Mosi chun Pathian kiang in, “Israel mipite kiang ah ka vatun ah, a kiang un, ‘La pu, la pateu Pathian in la kiang ua ei sawl ka hi,’ ti leng, amau in, ‘A min chu bang a hem?’ ti’n ei la dong taleu, a kiang un bang ka gen ta diam?” a tia.

¹⁴Pathian in Mosi kiang in, “KEI CHU A UMZINGPA chu ka hi,” a tia. Israel mite kiang ah chun, “KEIMA kiti chun nanghaw kiang in ei sawl ka hi, ti’n gen in,” a tia.

¹⁵Pathian in Mosi kiang in: “Israel mipite kiang in zia gual hin gen in: JEHOVAH la pu, la pateu Abraham Pathian, Isak Pathian leh Jakob Pathian chun la kiang un ei sawl ka hi. Zia hi kumtuang ah ka min chu ahi’n; zia gual ah hin khang zosia tiang ah hetzing ah um ding ka hi.

¹⁶Chia inla, Israel upate ko khawm inla, a kiang un, ‘LALPA, la pu la pateu Pathian, Abraham Pathian, Isak Pathian leh Jakob Pathian chu ka kiang in a hung kilâk hen, zia gual hin a gen hi: Aigupta gam ah, bang bang la chung ua tung a hem ti ka he’n, ka hun ngaisak zing la hiu;

¹⁷Aigupta gam ah la thokgimnau ah kipat hun pui dok ing ka tin, Kanaan mite, Hit mite, Amor mite, Periz mite, Hiv mite leh Jebus mite a la chênnau, khuaizu leh bawngnawi luanna gam ah hin hun pui lût ding ka hi, ti ka tiam la hiu, a tii,’ ti’n la.

¹⁸La thu chu ngai in au; tichun, Israel upate tawh nangma Aigupta lengpa kiang in vachia to inla tiu in, a kiang in, ‘LALPA, Hebraite Pathian chun kei uh ei kimupi hen; tuhin ka Pathian uh LALPA kiang ah kithoina ka vabawl theina ding un gamthip lam ah, ni thum lam chiana gamla’n ei chiasak in,’ ti’n vagen unla.

¹⁹Ka khut thahat in a cham lo ah a phalsak lo ngal leh Aigupta lengpa chun hun pawt dawsak phal pua’n ah ti ka henai.

²⁰Tichun, ka khut hun tha’ng ka tin, thilmak tak tak a gam sung ah ka bawl dingte mang in, Aigupta soisa ding ka hi; ziazaw phat chuleh, hun pawtsak bep ding ahi.

²¹Aigupta mite mit mu ah chun zia tak ah mipite hi doisak ing ka tin, la pawt daw tak uh leh khutngawn in chia lo hial ding la hiu.

²²Numei zosia’n a Invêngteu leh a Invêngteu In ah numei um taphotte bilba leh khutsebi, dangka leh sana ah kisiamte leh nîk leh puante chu don intiu in, ziate haw chun la chapateu leh la chanuteu zosia thuam in la tiu in; tichun, Aigupta gam ah van pha zosia chu lâkpiak ding la hiu,” a tia.