Read Vaiphei PAWTDAWNA THU 30 Bible Online

PAWTDAWNA THU 30 - Vaiphei bible

PAWTDAWNA THU 30

¹Chun, gimtui hâlna ding mâichâm khat siam inla: thinggi thing ah la siam ding ahi.

²A dung lam tong khat, a vailam tong khat ah lian hi’ntin; ning li nei ah siam ding ahi; a san lam le tong ni hi’ntin, a ningbawkte chule mâichâm chu tawh kizopa sakhat ahi ding ahi.

³A chung lam, a sîkte tawh, a ningbawkte zosia chu sana thiangtho tui la luan khum ding ahi; a sik geikawl ding sana thiangtho bawl inla.

⁴Chuleh, a geikawl nuai lam ah, a sik tuak ah chun a kol pani sana in siam inla, zia sung ah chun a jawnna ding mol la thun lut ding ahi.

⁵A jawnna mol ding thinggi thing in siam inla, sana tui la luan khum ding ahi.

⁶Zia chu thuthunna thingkuang chung ah ka hun ho sekna ding mun, ja’ngaina chutpha mai jawn tak ah, puanjak pang ah chun la koi ding ahi.

⁷Aron in zia mun ah chun gimtui a hâl sek ding ahi; jingkal si’n ah thaumeite chu a siam tup zaw tak leh, zia chung ah chun gimtui a hâl ding ahi;

⁸Aron in nitâk lam ah thaumei a det zaw phat leh, zia mâichâm chung ah chun gimtui hâl intin, la khang zosiau ah LALPA ma ah gimtui ahi zing ding ahi.

⁹A thianglo gimtui a hem, hâlmang thillat a hem, thâiga thillat a hem zia chung ah chun la lat lo diu a hia; chuleh, dawnthei thillat le zia chung ah chun la sunthâk lo ding uh ahi.

¹⁰Aron in kum khat sung ah khatvei bep zia mâichâm ningbawkte chung ah chun kichamna a bawl sek ding ahi; kichamna ding ah gitlo thoina thisan chu kumsin ah khatvei jel la suanteu zosia tiang in a bawl jel ding uh ahi. Zia chu LALPA â ding ah munzek thiangtho pen chu ahi, a tia.

¹¹Chuleh, LALPA chun Mosi kiang in:

¹²“A min uh khum ding ah Israelte la sim phat leh, LALPA âng ah mi tin in kitatna, min khum hun ah chun a bawl chiat ding uh ahi; a min uh khum ahiziak ah a chung ua natpi a tunlona dingin.

¹³Min khum taphot mi tin in a piak ding uh chu zia gual hi hi’n a: Mun thiangtho shekel kimkhat chiat a piak diu ahi (shekel khat chu gerah sawmni tawh kibang ahi:) LALPA chantum ding ah thillat dingin shekel kimkhat ma tawh.

¹⁴Min khum taphot, kum sawmni ah kipat chung lam zosia chun LALPA chantum dingin thillat a pechiat ding uh ahi.

¹⁵La hinnau kitatna ding ah LALPA chantum ding ah thil la hun lat phat ua leh, shekel kimkhat sâng ah tam zaw mi hausa ahiziak in pediak ki’hen la, mi genthei a hiziak inle zia sâng ah tawm zaw chu a piak diak lo ding ahi.

¹⁶Israel suante kitatna man dangka chu hun la’n la tin, kikhopna biakbûk ah matchâk dingin la guat ding ahi; la hinnau kitatna ding ah LALPA âng ah Israel suante â ding ah la hetzingna ding a hung hitheina dingin,” ti’n a gen a.

¹⁷LALPA chun Mosi kiang in:

¹⁸“Kisilna ding sum-eng tui kuang tawh sum-eng in a keng siam inla. Zia chu kikhopna biakbûk tawh mâichâm kikâl ah koi inla, zia chun tui la koi ding ahi;

¹⁹zia tui ah chun Aron tawh, a chapate chun a khut leh a kengteu chu a sil ding uh ahi.

²⁰Kikhopna biakbûk ah a lut ding phat a hem, LALPA a ding ah mei ah thillat hâl ding ah mâichâm kiang ah nasêm ding ah a hung phat si’n ua leh zia tui ah chun a kisil sek diu ahi; chutilochun, thi ziang kha’n au.

²¹A thi lona ding un a khut leh a kengteu chu sil sek intiu in; zia chu amau â ding ah kumtuang ah a zui ding ua chawn dan chu hi’ntin, ama leh a suante’n a khang zosiau ah a zui ding uh ahi,” a tia.

²²Mosi kiang in LALPA’n:

²³Gim namtui pente lak ah murra tui shekel za nga tawh, sinamon gimtui a kimkhat, zia chu shekel za ni leh sawmnga; chuleh, kalamas gimtui shekel za ni leh sawmnga tawh,

²⁴kassia shekel za nga, munthiangtho shekel te’na dungzui in; chuleh, Oliv thau Hin khat tawh hun la’n la;

²⁵gimtui siampa’n a bawl sek gual in ziate chu gawt hel in, sathau thiangtho dingin la siam ding ahi; ziate chu kinu’ ding sathau thiangtho chu hi’n a.

²⁶Zia sathau chun kikhopna biakbûk, thuthung thingkuang,

²⁷dawkan tawh a matchâk zosiate, thaumei koina leh a matchâkte, gimtui hâlna mâichâm,

²⁸hâlmang thillatna mâichâm leh a matchâk zosiate, kisilna kuang leh a tunna pum in la nu’ ding ahi;

²⁹chuleh, a zek thiangtho pen a hitheina dingin, la hithiangtho ding ahi; zia khoikha taphot chule thiangtho jel ding ahi.

³⁰Aron tawh a chapate chu zia sathau chu nu’ inla, hithiangtho in; tichun, kei â ding ah thiampu na a septheina ding un.

³¹Chuleh, Israelte kiang ah chun, “Zia hi la suan zosiau kei â ding ah kinu’ ding sathau zek thiangtho hi ding ahi,” ti la hil ding ahi.

³²Mihing taksa chung ah la nu’ lo ding ahi; zia sathau kihel khawm gual a hin thil dang kihel khawm, a kibatpi le la siam diak lo ding ahi: Zia hi thilzek thiangtho a hia, nang â dinginle a thiangtho ding ahi.

³³Zia gual hi kuale a bawl a hem, ahiloleh, zia thau hi nu’ tâk lo kua a hem khat nu’khâk ah a um chun, a chipite lak ah kipat himangthai ding ahi, a tia.

³⁴LALPA chun Mosi kiang in: “Thil gimtui tak, stakti, onukte, galbanumte tawh thil gimtui begawte, a kibang chiat in hun la’n la,

³⁵ziate chu gimtui siampa’n a gawt-hel gual ah gimtui dingin hel in; chi saw al in, thiangtho tak in gimtui la siam ding ahi:

³⁶Bang jat a hem chu gawt buang dim dem inla, ka hun hosekna ding mun, kikhopna biakbûk sung ah thu hiatsakna mun ah chun koi in: Zia chu nang uh â ding ah thilzek thiangtho pen hi’n a.

³⁷Zia thil gimtui la siam ding gual a hin, nangma â ding la kisiam lo ding ahi: LALPA â ding ah thilzek thiangtho in la ngai ding ahi ngal a.

³⁸Kuale ama mat ding ah zia gual ah kisiam a um chun, a chipite lak ah kipat nawdaw ding ahi,” a tia.