Read Vaiphei PAWTDAWNA THU 35 Bible Online

PAWTDAWNA THU 35 - Vaiphei bible

PAWTDAWNA THU 35

¹Mosi chun Israelte zosia a ko khawm ah, a kiang un: “Zia hi ahi LALPA’n la bawl ding ua thu a hun piak chu:

²Ni guk sung nasepna la mat diu a hia, a ni sagi ni ahileh vang nang uh â ding ah ni zek thiangtho, LALPA â ding ah chawldamna Sabbath hi’n ah; kuale zia ni ah bang a hem khat bawl taphot chu tha ngal ding ahi.

³Sabbath ni chun la chênnau mun taphot ah mei la sêm him him lo ding uh ahi,” a tia.

⁴Mosi chun Israel kikhawm zosiate kiang ah chun: “Zia hi ahi LALPA’n thu a hun piak chu:

⁵La lak ua kipat in LALPA â ding ah thilpiak hun lakhawm chiat un; kuale LALPA â ding ah piak thatnopna nei taphot in ziate hi hun pekhawm un: sana, dangka, sum-eng;

⁶pat dum, a sandup, a sandâng leh puan malngat tawh kêlcha multe tawh;

⁷belamchal vun kidia nipsa tawh savun pha tak ah kisiamte tawh, thinggi thing,

⁸sathau, thaumei tui â ding, kinu’ ding leh hâl namtui dingte,

⁹thiampu awmphaw leh a puanâk chual ah bel ding Onik suang leh suang mantam chi chuam chuamte le hun pekhawm un,” a tia.

¹⁰La lak ua mi khutthiam zosia chu hung khawm uh hen la, LALPA’n bawl ding ah thu a piak zosiate chu bawl uh hen; a biakbûk,

¹¹a puan In ding leh a khu dingte, a bâng ding, a bankhuam ding leh a kitunna dingte tawh;

¹²Thuthung thingkuang tawh a jawnna ding molte, ja’ngaina chutpha leh a puanjak dingte,

¹³dawkan leh a jawnna ding molte, a matchâk zosiate tawh, a chung ah um zing ding ah kikoi vaithum tawh;

¹⁴a salvâk ding thaumei leh a tunna leh a matchâk zosiate, a thaumei leh a tui ding ah sathaute tawh;

¹⁵gimtui hâlna mâichâm, a jawnna ding molte tawh, kinu’ chi sathau dingte, hâl namtui dingte leh a biakbûk kotkhak ah puanjak dingte tawh;

¹⁶hâlmang thilpiak mâichâm, a sum-eng lên tawh, a jawnna ding molte tawh, a matchâk zosia, tui kuangpi tawh a tunna pum in;

¹⁷biakbûk sung ah puanjak dingte, a bankhuamte leh a kitunna ding ah kikhuakte leh a huang sung kotkhak ah puanjak dingte tawh;

¹⁸biakbûk kildenna dingte, a huang sung ûmna kildenna dingte leh a kaimatna ding khauhualte:

¹⁹mun thiangtho ah nasepna kicheina ding mêlpha tak tak ah siamte, thiampute’n na a sep hun ua a âk ding uh, thiampu Aron sil leh chên thiangtho leh a chapate sil leh chên dingte tawh, a tii, a tia.

²⁰Ziaphatchun, Israel mipi kikhawm zosia chu Mosi kiang ah kipat in a peljak tau a.

²¹Mi tin lak ah lungthim chaw’phul ah um leh lunggil tak ah phalna nei zosia a hung ua, biakbûk sakna ding ah matchâk ding, a poimaw taphot, sil leh chên thiangtho ah siam dingte tawh pum in LALPA â dingin a hun lakhawm tau a.

²²Chutichun, a numei, a pawsal kidang lo ah piak nopna lungthim nei zosiate chu a hung khawm ua; a chauchateu, a bilbateu, a min namnau khutsebite, khite, sana’ kicheina chitinte a hun pekhawm tau a; mi tin sana piak ding nei zosiate chun LALPA â dingin a hun pechiat tau a.

²³Mi tin pat dum, a sandup leh a sandâng nei leh puan malngat leh kêlmulte, belamchal vun kidianipte, savun pha nei zosiate chun a hun chawi khawm un.

²⁴Mi tin dangka leh sum-eng piak ding nei taphot in LALPA â dingin a hun piau ah; chuleh, thinggi thing matchâk chuam chuam â ding ah mat tâk nei taphot inle a hun lakhawm ua.

²⁵Numei them thiam zosia’nle pat a khêk ua, zia a patkhêk uh, a dum, a sandup leh a sandângte leh puan malngatte chu a hun lakhawm un;

²⁶numei khutthiam, a lungthim uh chaw’phul ah um zosiate chunle kêlmulte a khêk ua.

²⁷Chun, thiampu awmphaw leh puanâk chual jemhoina dingin, vaihawmte chunle Onik suang leh suang mantam chi chuam chuamte a hun lau a;

²⁸gimtuite leh thaumei â ding ah sathaute, kinu’ ding chi sathau leh hâl namtui dingte le a hun lakhawm un.

²⁹Israelte zosia, a numei, a pawsal kidang lo ah LALPA â ding ah amau lungtup dungzui chiat ah piak nopna nei zosia chun, Mosi’n thu a piak dungzui chiat in, LALPA â ding ah kiphalna thilpiak a hun chawi khawm chiat tau a.

³⁰Mosi chun Israelte kiang ah chun: “Ngai tiam un, LALPA chun Judah nam ah mi Hur chapa Uri, zia mipa chapa Bezalel chu a teldok tai;

³¹zia mipa chu lemhiatnate, hetthiamnate, hetnate, bangkim bawldan thiamnate;

³²thilbawl ding lem he tak ah suangtua ding dan thiamnate, sana leh dangka, sum-eng ah bawldan thiamnate;

³³suang mantam ât ding dan chi chuam chuamte, thing cheimawi ding dante leh bangkim bawl ding dan ah khut thiamnate nei dingin, Pathian Thagau in a lua dim tai,” a tia.

³⁴Chuleh, ama kithuapi ding Dan nam ah mi Ahisamak chapa Oholiab tawh, a sepkhawm theina ding ua a hiltheina dingin a chokphûl a.

³⁵Ama chu nasep tincheng sêm ding ah khut thiamna, pat a dum, a sandup leh a sandângte siam dan leh puan malngat jem bawl leh ga dan leh, thilbawl ding dan zosia guanggal thiamnate nei dingin lungthim pilna’n a thuam tai.