Read Vaiphei PAWTDAWNA THU 5 Bible Online

PAWTDAWNA THU 5 - Vaiphei bible

PAWTDAWNA THU 5

¹Ziazaw chun, Mosi tawh Aron chu Pharaoh kiang in a chiau ah, a kiang in, “LALPA, Israel Pathian in: Ka mipite pawt dawsak inla, gamthip ah ka kiang ah Kût a bawltheina ding un, a tii,” a tiu a.

²Himaleh, Pharaoh chun, “Israelte ka chiasak ah, a thu ka ngai ding LALPA chu kua a hem? Zia LALPA chu ka hepua’n, Israelte chu le pawt daw sak lo ding ka hi,” a tia.

³Ziaphatchun, amau in, “Hebraite Pathian ngei chun kei uh ei kimupi ta’n: gamthip lam ah ni thum chiana ah gamla ei chiasak inla; tichun, LALPA ka Pathian kiang ua kithoina bawl ing kau; achutiloleh, ama’n I chung un hipi a hem, chemjam a hem hun lênsak kha ding ahi,” a tiu a.

⁴Himaleh, Aigupta lengpa chun a kiang un, “Mosi leh Aron, bang ding ah mipite hi a nasepnau ah kipat pui mang gua la hiu em? La nasepna lam chiat uh kizot tau in,” a tia.

⁵Pharaoh in a gen jel a: “Ngai un tu’hin a gam mite sâng ma in amau a tam zaw hial tau ah, a nasepnau cholsak ding la ti nalai sêt un,” a tia.

⁶Zia ni ma ma chun Pharaoh in mipite nasêmte enkol leh a hotuteu chu thu a pia’n:

⁷“Tu’ma gual ah khan mipite chu a chêktang siamna ding un bupawl la piak tâk lo diu ahi; amau vachia in vakihawl tau hen.

⁸Ahi’n, tu’ma chêktang a siam jat mau kha la phût tho diu ahi; la sukkiam him him lo diu ahi. A thâtbei ziak un, ‘Ei pawt dawsak unla, ka Pathian kiang un kithoina ei bawl sak un,’ a tiu hi.

⁹Na haksa zaw diak sepsak un; tichun, a nasep ding bep uh buaipi in, thumanlo a ngaisak manlo’na ding un,” a tia.

¹⁰Tichun, nasêm enkolte leh mipi lak ah hotute chu a chia dok un, mipite kiang ah chun, “Zia gual hin Pharaoh in a gen hi: Bupawl hun peta lo ding ka hi,

¹¹nang uh chiau inla, la mutheina taphot un kilâk ziang tau in; himaleh, la nasep ding uh chu neuchale suktawm hi diak lo ding ahi, a tii,” ti’n a gen tau a.

¹²Tichun, mipite chu Aigupta gam zosia ah chun bupawl ah mat ding, bu kungsum hawl khawm in a kithejak tau a.

¹³Nasem enkolte chun kin tak in a nawu ah, “La ni khat na’teu chu bupawl piak ah la um lai gualmau khan sêm zo kin un,” a tiu a.

¹⁴Israel nam lak ah puitute chu Pharaoh nasep enkolte chun a vuau a: “Bang ding ah tu’ma gual ah kha ja’ni leh tu’ni hin la chêktang bawl ding uh zo lo la hiu em?” ti’n a nawu a.

¹⁵Ziaphatchun, Israelte lak ah hotute chu Pharaoh kiang in a hung ua, a kiang in, “Bang ding ah la suakte zia gual lawm lawm ah hi lei bawl ziang uh a hem?

¹⁶La suakte kiang ah bupawl piak ahi puai; ahi’n la, amau in ka kiang un, ‘Chêktang siam un’ ei tiu a. En tiam in, la suakte hi bang gual ah vok ah um ka hiu em! La mipite chung ah la thilbawl hi a dik puai,” a tiu a.

¹⁷Ama chun, “La thabei ui! La thâtbei ziak un, ‘Ei pawtsak unla, LALPA kiang ah ei vakithoisak un,’ ti la hiu.

¹⁸Tu’hin chiau inla, na sêm un; bupawl le piak hita pua’n la tiu in, la chêktang siam jat ma mau la siam zaw ding uh ahi,” a tia.

¹⁹Ama’n, “La ni khat chêktang siam ding jat uh kha suktawm thei hipua’n a,” a tipiak phat ah chun, Israelte lak ah hotute chun a dinmun uh a siat dan tak chu a hechian tau a.

²⁰Pharaoh kiang ah kipat a hung pawt daw phat un, amau a la ngâk Mosi tawh Aron chu a kituakpi tau hi.

²¹A kiang un, “LALPA’n hun en hen la, la chung un vaihawm ta hen; Pharaoh leh a suakte mit mu ah huat um tak in lei siam tâk ziak un: a khut ua kei uh thâna ding chemjam la choisak ta’ngal un,” a tiu a.

²²Tichun, Mosi chun LALPA lam a nga kit a, “Aw LALPA, bangatia zia mipite hi bawlsia la hem? Bang ding ah lei la sawl him him a hem?

²³La min ah Pharaoh kiang ah thugen ding ah ka hang chia masak pen ah kipat khan ama’n zia mipite hi a bawlsia; ahi’n, la mipite hukdawna dingin nang in bangma la bawl nai paw’ngal in,” a tia.