Read Vaiphei PAWTDAWNA THU 6 Bible Online

PAWTDAWNA THU 6 - Vaiphei bible

PAWTDAWNA THU 6

¹Ziaphatchun, LALPA chun Mosi kiang in, “Tu’hin Pharaoh chung ah bang bang hun bawl ding ka hem ti hun mu’n la: Keima khut thahât tak ziakin amau chu hun pawt dawsak ding ahi ngal ah; ama chun keima khut thahâtna ziakin a gam sung ah kipat in hun nawdok ding ahi,” a tia.

²Pathian in Mosi kiang in, “Kei LALPA chu ka hi;

³Abraham, Isak leh Jakob kiang in Elshaddai in ka la kilâk sek ah; himaleh, ka min tak tak JEHOVAH ti in vang amau kiang in ka la kihiat sak kha nai puai.

⁴Amau tawh ka thuthung ka sudet ah, malzin gual ah a chênnau gam uh Kanaan gam ka piakna dingin.

⁵Chuleh, Aigupta mite’n sal ah a koi uh Israel chate kâ thawm le ka he ta’n: chuleh, ka thuthung kha ka hezing hi.

⁶Israel chate kiang ah chun: Kei LALPA chu ka hi; Aiguptate puakgik nuai ah kipat leh a suak uh la channau ah kipat in hun hukdok ding ka hi; ka khutbân thahât ma ma chu hun thadok in, huaisia tak in amau hun gawt ing ka tin, hun hukdok ding ka hi.

⁷Chuleh, nang uh ka mipite hi dingin hung kilâk ing ka tin, keile la Pathian uh hi’ng ka tin; tichun, Aigupta puakgik ah kipat hun puidok kha Kei LALPA la Pathian uh ka hi, ti hun he ta’n lau.

⁸Abraham, Isak leh Jakob kiang ah piak ding ah ka tiamna gam ah chun hun pui lût ing ka tin; la gochan ding un zia gam chu hun pia ding ka hi: Kei LALPA chu ka hi, a tii, ti’n vagen in,’ a tia.

⁹Mosi’n zia gual chun Israel mipite kiang in a gen ah; himaleh, a lungthim uh a nat bêk ziak leh a saltânnau a huaisiat bêk ziakin Mosi thugen chu a ngaisak him him puau hi.”

¹⁰LALPA chun Mosi a hun ho ah,

¹¹“Aigupta Lengpa Pharaoh kiang ah chia inla, a lenggam ah kipat Israelte pawtdawsak dingin va gen in,” a tia.

¹²Himaleh, Mosi chun LALPA kiang in, “Ngaitia, Israel mipite nasan in ka thu a ngaisak ta puau ah; kei tawhbang ah thugen theilo hi Pharaoh in ei la ngaisak ding a hem?” a tia.

¹³Chutichun, LALPA chun Mosi tawh Aron kiang in, “Israel mipite tawh Aigupta gam ah lengpa Pharaoh kiang ah chun, Israel mipite chu Aigupta gam ah kipat thâdaw sak dingin thu ka pia tai, ti vahil un,” a tia.

¹⁴Ziate hi a Inkuan dungzui ua a pu leh pateu chu a hiu a: Israel cha lutîl Reuben chapate chu: Hanokh, Pallu, Hezron tawh Karmi: ziate hi Reuben Inkuante chu a hiu a.

¹⁵Simeon chapate chu: Jemuel, Jamin, Ohad, Jakin, Zohar tawh Shaul, (Saul le kiti) Kanaan numei tawh a chapa a hiu ah; ziate hi Simeon Inkuante chu a hiu.

¹⁶Ziate hi a khanggui dungzui ua Levi chapate chu a hiu: Gershon, Kohath tawh Merari: Levi dam sung chu kum za khat sawmthum leh sagi ahi.

¹⁷Gershon (Gershom le kiti sek) chapate, a phung dungzui un: Libni tawh Shimei a hiu a.

¹⁸Kohath chapate chu: Amram, Izhar, Hebron tawh Uzziel a hiu a; Kohath dam sung chu kum za khat sawmthum leh thum ahi.

¹⁹Merari chapate chu: Mahli tawh Mushi a hiu. Ziate hi a khang dungzui ua Levi chapate min chu ahi.

²⁰Amram in a pa suapinu a kichenpi ah, ama chun Aron tawh Mosi a hing a. Amram dam sung chu kum za khat sawmthum leh sagi ahi.

²¹Izhar chapate chu: Korah, Nepheg tawh Zikri a hiu a.

²²Uzziel chapate chu: Mishael, Elzaphan tawh Sithri a hiu a.

²³Aron in Aminadab chanu, Nahshon suapinu Elisheba chu ji’n a nei ah; ama chun Nadab, Abihu, Eliezer tawh Ithamar a hing a.

²⁴Korah chapate chu: Assir, Elkanah tawh Abiasaph a hiu a; ziate chu Korah suante chu a hiu.

²⁵Aron chapa Eliezer in Putiel chanute lak ah pakhat ji’n a nei ah; a ma chun Phinehas a hing a. Ziate hi a khanggui dungzui ua Levi suante chu a hiu hi.

²⁶LALPA chun, Mosi tawh Aron kiang ah, “Ziate hi a hon hon in Israelte chu Aigupta gam ah kipat in puidok un,” a la tite chu a hiu a.

²⁷Amau hi Aigupta lengpa Pharaoh kiang ah Israel mipite chu Aigupta gam ah kipat puidok ding thu vagen ah, Mosi tawh Aron ma ma vachianate kha a hiu hi.

²⁸LALPA’n Aigupta gam ah Mosi kiang ah thu a gen lai ah chun;

²⁹a kiang in, “Keima hi LALPA chu ka hi; la kiang ah thu ka gen zosia hi Aigupta lengpa Pharaoh kiang ah hil in,” a ti’n.

³⁰Himaleh, Mosi chun LALPA kiang in, “Ngaitia, thugen thiamlo ka hi, bangti’n em Pharaoh in ka thu a ngai ding?” a tia.