Read Vaiphei PAWTDAWNA THU 8 Bible Online

PAWTDAWNA THU 8 - Vaiphei bible

PAWTDAWNA THU 8

¹Himaleh, LALPA chun Mosi kiang ah chun, “Pharaoh kiang in vachia inla, a kiang in, ‘Ka na a septheina ding un, ka mipite pawtsak in;

²himaleh, la pawtsak nop diak lo leh ngai in, la gam pumpi hi ukêng ah gawt ding ka hi.

³Luipi chu ukêng in dim intin, ziate chu la In sung ah te, la lupna pindan sung ah te, la lupna chung ah te, la miliante In leh la mipite In sung ah te, la thukkhûk ah te leh la vaithum mêkna kuang sung ah te hung lut in au.

⁴Ukêngte chu nangma leh la mipite chung leh la miliante chung ah hung kãl ding a hiu,’ ti vagen in,” a tia.

⁵LALPA chun Mosi kiang in, “Aron kiang ah, ‘La tiangkhut kha luite, tuilamte leh dil chung ah te vak jak inla, Aigupta gam sung ah ukêng hun lênsak in,’ ti’n,” a tia.

⁶Tichun, Aron in a khut chu Aigupta gam ah tuite chung in a vak jak ah; ukêngte chu a hung pawt un, Aigupta gam chu a tuam suak ziang tai.

⁷Ahi’n, dawithiamte’nle a dawi uh mang in zia gual ma chun a bawl ua; tichun, Aigupta gam sung ah chun ukêng a lênsak tau a.

⁸Ziaphatchun, Pharaoh in Mosi tawh Aron a ko ah, a kiang un, “Ukêngte hi keima leh ka mipite lak ah kipat lamang dingin LALPA chu don un; tichun, mipite hi LALPA kiang ah kithawi dingin hun pawtsak ing ka,” a tia.

⁹Mosi chun Pharaoh kiang in, “Ukêngte hi nangma leh la mipite lak ah kipat sukmang ah a um ua, Nail luipi bep ah a umtheina ding un, nangma leh la miliante leh la mipite â ding ah bangtik leh dot piak ding ka hem ti ei hil in,” a tia.

¹⁰Ama chun, “Jing leh,” a tia. Mosi’n, “La ti gual ah chun hi hen: tichun, LALPA ka Pathian uh tawhbang hi a um puai ti la hiattheina dingin.

¹¹Ukêngte chu nangma leh la Inte leh la miliante leh la mipite lak ah kipat in vâk mang intiu in, Nail luipi bep in nutsia in um tan au,” a tia.

¹²Ziaphatchun, Mosi tawh Aron in Pharaoh a nusiau ah; Pharaoh chung ah ukêngte ziak ah chun Mosi chun LALPA a ko ta’n.

¹³LALPA’n le Mosi dot gual in a bawl piak ah; ukêngte chu a In ah te, In hulliap ah te leh loulai ah te a thi zo tau a.

¹⁴Amau chun ukêngte chu a vum vum in a luak khawm ua, a gam in a ui veng vung ziang tai.

¹⁵Ahi’n, Pharaoh chun a thawveng tai ti a het phat in a lungthim a hikhau kit ah; amau chu a limsak nuam diak puai: LALPA’n a la gensa gual in.

¹⁶Chuleh, LALPA chun Mosi kiang in, “Aron kiang ah, ‘La tiangkhut chu lâm inla, tual ah leivui jep in, chutileh Aigupta gam ah leivui zosia hi thovâi a hung suak theina dingin,’ ti’n,” a tia.

¹⁷Amau chun zia gual chun a bawl tau a; Aron in a tiang chu a lâm ah, leivui chu a jep ah; tichun, thovâi chu mihing leh ganchate zosia chung ah chun a chu ta’n; Aigupta gam ah leivui zosia chu thovâi a hung suak zo tai.

¹⁸Dawithiamte chunle a dawiteu mang ah thovâi umsak a guau ah; himaleh, a bawlthei puau a. Mihing leh gancha zosiate chung ah chun thovâite chu a chu tai.

¹⁹Dawithiamte chun Pharaoh kiang in, “Zia hi Pathian khut ah thil kibawl ngei ngei chu ahi!” a tiu a. Himaleh, Pharaoh lungthim chu hikhau in a um zing hi.

²⁰LALPA chun Mosi kiang in, “Jingkal ma tak in tho inla, lui ah Pharaoh hung ding chu a la ngâk inla, a kiang in, ‘Ka mite’n ei ho theina ding un pawtsak in LALPA’n a tii;

²¹chutia, ka mite la hun pawtsak nop lo ding chun, nang leh la miliante leh la mipite chung ah leh la In sung ah te hin thosi hon hun sawl ding ka hi; tichun, Aiguptate In zosia chu thosi hon ah dim intin, a chênnau leitual nasan dim in a.

²²Ahi’n, zia ni ah chun Goshen gam, ka mite chênna gam chu koichuam ing ka tin; tichun, zia tak ah chun thosi hon him him um pua’n ah: Chutichun, lei ah hin LALPA chu ka hi ti la hettheina ding un.

²³Tichun, ka mipite leh nang mipite kikâl ah kikhenna koi ing ka tin; jing leh zia tepte’na chu hung um in a,’ ti’n,” a tia.

²⁴LALPA’n zia gual chun a hun bawlta’n, Pharaoh leh a miliante In sung ah te chun thosi hon nasa tak a lut ua; thosi hon ziak ah chun Aigupta gam sung pumpi suksiat in a um zo tai.

²⁵Ziaphatchun, Pharaoh chun Mosi tawh Aron a ko ah, a kiang un, “Chiau inla, gam sung ah hin la Pathian kiang un vakithawi tau in,” a tia.

²⁶Himaleh, Mosi’n a kiang in, “Zia gual chun bawlthei hipua’n a, LALPA ka Pathian kiang ua ka thillat dingteu hi Aigupta mite jakda lam tak ahi ding ziakin; suang in ei seplum ziang lo ding a hiu em?

²⁷Ni thum lam gamthip ah ka chiau ah, thu ei piak dungzui ah LALPA ka Pathian kiang ua ka vakithawi ding uh ahi,” a tia.

²⁸Tichun, Pharaoh chun, “Gamthip ah LALPA la Pathian kiang ua kithawi dingin hun pawtsak ing ka; gamla la chia lo ding uh hi’ntin. Tichun, kei â dinginle ei dot piak un,” a tia.

²⁹Ziaphatchun, Mosi’n, “Nangma ka hun pawtsan phat phat leh jing ah kipat thosi hon in Pharaoh leh a miliante leh a mipite nusia ngal ding ahi; ahi’n, mipite hi LALPA kiang ah kithawi ding ah pawtsak lo dingin ei thêpdâ ta lechin,” a tia.

³⁰Tichun, Mosi chu Pharaoh kiang ah kipat in a pawtdok ah, LALPA kiang in a pauchap a.

³¹LALPA chun Mosi dot gual in a bawl piak ah; Pharaoh leh a miliante leh a mipite chung ah kipat in thosi hon chu a ladok ah, pakhat chale a um ta puai.

³²Himaleh, Pharaoh in zia hun ah hinle a lungthim a hikhau ah, mipite chu a pawtsak nuam diak puai.