Read Vaiphei JOB 1 Bible Online

JOB 1 - Vaiphei bible

JOB 1

¹Uz gam ah chun mi pakhat a um ah, a min chu Job ahi. Zia mipa chu demna bei leh mi diktat, Pathian lau leh thil phalo him him bawl ngai lo mi ahi’n.

²Chapa pasagi leh chanu pathum a nei a.

³Mi neinung tak ahi ziakin, belam sang sagi, sangawngsau sang thum, bawngchal tuak za nga, sabiltungpi za nga leh nasem ding suak tampi nei in sualam gamkai ah mi hausa pen ahi.

⁴A chapate chu a In ua an nek khawmna siam in a um khawm un; chuleh, a suapiu numei pathumte chule a kiang ua ne ding leh dawn dingin a chial sek ui.

⁵Zia gual ah luaithe’na a nei zaw jing si’n ua leh, Job chu jingkal ma tak ah tho in, amau chu ko in, a mimal tin uh sukthianna ding in kithoina a changkim un a bawl piak sek ah; Job chun, “Ka chate hin thil phalo a la bawl kha pal in, a lungthim un Pathian a la samsia kha tawl in au,” a ti ziak ahi. Zia thil ziak tak ah chun Job in zia gual chun a bawl sek ahi.

⁶Ni khat chu Pathian chate chu LALPA kiang in a hung kilâk tau ah, a lak un Setan le a hung vâk lut a.

⁷LALPA chun Setan kiang ah, “Khoi lam ah kipat hung la hem?” ti’n a dong ah. Setan in LALPA kiang ah chun, “Lei chung ah ka vâk tawl tawlna lam leh, ka vâk suk ka vâkto’na lam ah kipat hung ka hi,” ti’n a dawnhu a.

⁸LALPA‘n Setan kiang in, “Ka suak Job saw la ngaitua kha em? Khawvel ah hin ama tawh bang ah pha bukim, thutak, Pathian lau leh thil phalo lak ah kipat kisûm thei mi umlo ei ve,” a ti’n.

⁹Ziaphatchun, Setan in LALPA kiang in, “Job chun a ziak beiah Pathian lau ahi em?

¹⁰Ama chu a In tawh, a nei zosia tawh kil tin ah la ûm kîmvêl ziang hilo a hem? A khut nasep la maljawl ah, gam sung ah hin a nei a pung ma ma hilam.

¹¹Himaleh, tu’hin la khut hun jak inla, a nei zosia hi vak khoi piak ma tiam in, la maichang in hun gensia mai ding ahi,” ti’n a dawnhu a.

¹²LALPA‘n, Setan kiang in, “A phai, a nei thil zosia chu la khut in a um hi; ama taksa vang chu khoi kin,” a ti’n. Tichun, LALPA umna kipat chun Setan chu a pawtdok tai.

¹³Ni khat a chapate leh chanute chu a u’pau In ah, an ne’khawm leh uain dawn khawm ah a um lai tak un,

¹⁴Job kiang ah chun thangko pakhat a hung tai tung ah, a kiang in, “Bawngchalte’n lou a kai zing lai un, a kiang un sabiltungte a ta hiat hiat un,

¹⁵Sebate’n a hung suam phut tau ah, a leng un a kipuak mang zo tau ah; chuleh, la suakte chu chemjam in a that gam tau hi; keima bep hi thupaw ding ah hung suakcha ka hi,” a hung ti’n.

¹⁶Zia thu chu a gen lai tak in, midang pakhat a hung tung kit ah, a kiang in, “Van ah kipat têk a hung kia’n, belamte leh a chingte chu a kâng tum ziang ta’n, la kiang ah thu hung tut dingin keima bep hi a suakcha ka hi,” a hung ti’n.

¹⁷Zia thu chu a gen zing lai in, midang pakhat a hung tung ah, a kiang in, “Kaldaite pawl thum in kigual tak in a hun sim un, sangawngsaute chu a kipuak mang sik sek un, la suak a chingte chule a that tau a; keima bep hi thu hung tut ding ah suakcha ka hi,” a hung ti’n.

¹⁸Zia thu chu a la gen zing lai in, midang pakhat a hung tung kit ngâl ah, ama chun a kiang in, “La chapate leh chanute chu a u’pau In ah, an ne’khawm leh uain dawn khawm ah a um lai tak un,

¹⁹gamkeu lam ah kipat in huipi hat tak a hung hâng ah, a umnau In chu kil li’n a hun nam ah; tichun, nungak tangvalte chu a del lum sik sek ta’n; keima bep hi thu hung tut ding ah suakcha ka hi,” a hung ti kit a.

²⁰Ziaphatchun, Job chu a dingdok ah, a puanâk a botthêk ah, a sam chu metmui in, lei tual ah kipuk in Pathian a ho tai.

²¹“Ka nu sul ah kipat ngawnchang in ka hung pawtdok in, ngawnchang ma ma’n kile’kit ding ka hi; LALPA‘n ei pia’n, LALPA‘n a la kit tai; LALPA min chu pâk in um ta hen,” ti in.

²²Zia haw zosia a tuak ziak ah chun Job in a hi’khial pua’n, Pathian chule a mawsiat diak puai.