Read Vaiphei JOB 10 Bible Online

JOB 10 - Vaiphei bible

JOB 10

¹Ka hinkhua ka chimchâk hi; ka phunna thu ka nop ka ning in, genjak ing ka tin, ka lunggil ah thasiatna thu gen ing ka.

²Pathian kiang in, ei awimaw kin la, lei kinakpina ziak ei hil in, ti’ng ka.

³La khutsuak hi tawden in, la musit ah, mi nunsiate thil guanggal la doisak hi, la ngai ah thil kilawm a hem?

⁴Taksaphe neite gual ah mit nei la hem? Mihingte’n a mu gual mai ua mu la hem?

⁵La nite le mihingte dam sung gual a hem? La dam sung kumte chule mihingte kum gual a hia hem?,

⁶ka khawlona la mudok ah, ka gitlona la hawl ah,

⁷phatlona nei lo ka hi dan la he ngâl in, la khut ah pat ei ladok ding mi, pakhatle umlo hi’ngâl in?

⁸La khut ah ei guanggal in lei la siam ah; tu’hin la lei siamna khut chu, ei suksiatna’n la mang ta’n.

⁹Nang in tungman gual in, lei siam ahi ti hezing inla, leivui ei suaksak kit mai ding la hem?

¹⁰Bawngnawi gual ah ei sungtha, bawngnawi khal gual in lei chok ta hilo a hem?

¹¹Nang in vun leh phe in lei tuam ah, gu leh thagui in lei phêk khawm hi.

¹²Hinna leh ngilneina lei pia’n, lei khawtuana chun ka thagau a chingtup hi.

¹³Ahi’n, zia thilte chu la lungthim in la selgu’n, zia chu la thiltup ahi ti ka hia’i.

¹⁴Gilo leng la, lei entha zing in, ka thulimlona ngainêp lo hial ding la hi’ngâl a.

¹⁵A la bawl khial ka hileh vang, ka chung a gik hi! a dik hi lengle, mualphona dim leh ka thokgimna bep, buaipi ka hiziak in, kiletsak tak in ka mâi, thal put ziang diak lo ding ka hi.

¹⁶Sakeibaknei hâng gual in lei ngîm in, a vêl vêl in lei suam sek hi.

¹⁷Keima ei kãl ah thugen ding hiatpitu la koi tam deu deu ah, ka chung ah soisak dan zat chuam chuam bawl belap in, ei do ding sepai a thak thak la hun sawl hi.

¹⁸Bang ding ah le sûl ah kipat kha ei la ladok la hi tam? kuama’n ei mu masang pek ah khan, a la thi hizaw mai leng chu,

¹⁹sûl ah kipat thânkotang ah chia theng in, a umlo gual mai hiding ka hi’n.

²⁰Ka dam sung nikhua hi a tawmta hilo maw? A um nalai sun hi nuamah mang dingin, ka chang in ei nusia tau in.

²¹Dan leh lungjinna leh thimpi jinna gam ah chia in, hung kit talo ding ka hi’ngâl a;

²²zia gam chu lungjinna leh buaina’n a bawm in; khawvak him him umlona gam ahi.