Read Vaiphei JOB 11 Bible Online

JOB 11 - Vaiphei bible

JOB 11

¹Ziaphatchun, Naamath mi Zophar chun zia gual hin a hun dawnhu a:

²Zia gual lawm ah thu kigen tam chu, dawnhu lo ah um in; zia gual lawm ah kam tam chu, thiamchang him ding a hem?

³La phunna zozaipi hi kua’n thipsan ah, la mi simmawna thu chu kua’n hun suasal lo ding a hem?

⁴Nang chun la, “Ka gendawte hi a dik in, Pathian mit mu ah thiangtho ka hi,” la ti’n.

⁵Himaleh, Pathian in thu hun gen hen la, nang dawnhuna’n a kam hun ka’n,

⁶la pilna thu gente chu hun hil tamaleh chu aw! Pilna chu a thua tam tak ahi ngâl a. Pathian in la dukdak lona sâng ah, niamzaw’n a hun thuk ahi ti he ta’n aw.

⁷Pathian thu gilte thûk dan tak chu, mudok zo ding la hem? Hat Chungnung Pathian lopi dan leh, a bawlthei dan chu hesuak zo ding kisa la hem?

⁸Van sâng ah sâng zaw ahi, bang law thei ding la hem? Sheol sâng ah thûkzaw ahi, bang a hem la hetthei ding?

⁹A te’na chu lei pumpi sâng ah sauzaw leh, tuisuagiat sâng ah lianzaw ahi.

¹⁰Hung hen la, suangkul ah hun khum in, vaihawmna mai ah hun ko khawm leh, kua a hem nang thei ding?

¹¹Ama chun mi lûlna bei chu, kua kua a hiu em ti a he ma ma ngâl a; ama’n dukdak lona a mu phat leh, ngaitua lo ding ah la bawl a hem?

¹²Gam sabiltungno mihing ah a hung pian phat leh, mingol chunle hiatthiamna hun nei pan bep in a.

¹³La lungthim chu dik tak ah mang la hi chun, ama lam nga’n la khutte chu jak to in.

¹⁴Thulimlona chu la khut ah a um chun, gamla tak ah koimang inla, la puanbûkte ah chun nunsiatna chên densak kin.

¹⁵Chutileh, la mai chu dem kâi lo in, dadok ta’n la tin; bit tak ah um in, lau pua’n la.

¹⁶La gentheina hemil ta’n la tin, tui luangmangsa gual bep in ngai ta’n la.

¹⁷Chuleh, sûnchang lai tak sâng in, la hinna chu vâk zaw ta’n tin; a thimna chu jingkal gual hung hita’n a.

¹⁸Kinepna a um ziakin, thamuang tak in um ta’n la; venbit ah um in, bit tak in chawldam hiat hiat ta’n la.

¹⁹Lum in la tin la kuama’n hun hilauthawng ta pua’n au; mi tam tak in la doisakna hun ngêk ta’n au.

²⁰Migilo mitte chun vang bangma mu pua’n a; a suachâtna ding lampiu zosia mansua intiu in, thi ding bep chu a kinepnau hita’n a.