Read Vaiphei JOB 12 Bible Online

JOB 12 - Vaiphei bible

JOB 12

¹Ziaphatchun, Job in zia gual hin a dawnhu a:

²Mipil vang la hi ngei mai un, pilna chu nang tawh thi khawm ding la hiu.

³Himaleh, nanghaw gual tho in, hetthiamna chu ka nei in, nanghaw sâng in ka niam zaw diak puai. Zia gual thilte hi kua a hem helo diak ding?

⁴Ka gualte nuizatbûk ka hi; keima, Pathian ko ah a dawnhu sek, midik leh demna bei hi’ngâl in, mi nuizatbûk ka hi tai.

⁵Mi nuamsate chun mi vangsete a musit un, a chuanteute chu phaze sa’n a chânggu zing ui.

⁶Suammangte chu lungmuang tak in a chêng un, a bân tha hatnau chu a pathian uh ahi.

⁷Ganchate nasan dong tiam un, hun hil in au; chunglêng vachate le dong un, amau inle hun hil in au.

⁸Lei chung ah thing leh guate chu dong un, hun hil in au, tuisuagiat ah sangate’n le la kiang ah taklang in au.

⁹Zia haw zosia lak ah khat cha hinle, LALPA khut in zia haw hi a bawl ahi, ti helo a um ua a hem?

¹⁰Ama khut ah chun thilhing tinte hinna leh, mihing zosia hatna a um hi.

¹¹Lei in an a tui leh tui lo a het gual in, bil in a thu hiatte chu teptê lo a hem?

¹²Têksete kiang ah pilna, damsawtte kiang ah hetthiamna a um hilo a hem?

¹³Pathian ah pilna leh hatna a um in, ama’n het dikna leh hetthiamna a nei hi.

¹⁴Ama’n a hisiat chu kuama’n sa kit thei ta pua’n a; ama’n a khak khum chu kuama’n hongthei ta pua’n a.

¹⁵Tuite chu a tuktân leh a kang mai ah, a thâdaw kit leh lei chung a chup kit mai hi.

¹⁶Ama ah hatna leh pilna a um hi, mithêmpa leh thep ah umte chu, ama â gêl a hiu.

¹⁷Lemguattute lawsam in a puimang ah, vaihawmte a hi’ngol hi.

¹⁸Lengte puan lopi lipthâk piak in, a kawng ua saltânna puan a khi’piak hi.

¹⁹Thiampute nîk leh puan bei in a puimang ah, mihatte a tawden hi.

²⁰Mi taksan umte thugen theina a lâkpiak ah, upate hetthiam theina chu a lâkmang piak hi.

²¹Leng chate kiletsakna a lâkmang piak ah, chuleh, mihatte kawnggâk a tha kawl piak hi.

²²Thim nuai thûk tak ah umte chu a hawkdok ah, thim sâ tak chu vakna’n a phodok hi.

²³Namte chu a hilian ah, a zaw leh ahi’sia kit ah, namte chu hi’pung in, a zaw leh a puimang sek hi.

²⁴Lei chung ah mipi puitute, hetthiamna chu a lâk mang piak ah, tichun, lampi umlona gamthip ah chun, a vâkvâi sak a.

²⁵Thim nuai ah vâk bei in a kimai a kimai un; zukham gual in a umsak hi.