Read Vaiphei JOB 14 Bible Online

JOB 14 - Vaiphei bible

JOB 14

¹Numei sung ah kipat piang mihing hi, ni chomcha leh buaina dim,

²pakcha gual ah hung lûn ah, hun sawt dai lo ding ah lîm hung kilang gual mai ahi.

³Zia gual mi bep chu maw la etsâl ding uh? vaihawmna maw lei kinialpi ding uh?

⁴Thilbuak lak ah kipat thil thiangtho, kua’n ladok thei ding a hem? Kuama’n ladok thei pua’n au.

⁵A dam sung ni ding jat uh tiampiak in, a damchan ding uh tha zat la het ziakin, a phâk tawp ding tiang uh la guat ta’ngâl a.

⁶Kithalaw gual ah chomkhat bêk a nopsak theina ding un, chomkhat bêk kihei mangsan ta’n la.

⁷Thingkung chu phuk pai in um maleh, hung selthak kit intin, a selthakte chu chawl ziang lo ding ahi, ti kinepna a nei ngâl a.

⁸La nuai lam ah a zungte chu têk in, tual ah a bulsum chu thi ta maleh,

⁹tui gim a hun het phat leh, hung selthak kit intin, thingno gual in a bâkte hung jamdok in a.

¹⁰Himaleh, mihing thitheite chu a thi’u a, niam tak ah koi in a um tau ah, mihingte chu a thiu a, khoilam a tung tau em?

¹¹Dil ah tui a hung kan ah, luipite chu tui bei ah a keugawp gual in,

¹²mihingte a lum thau in, a hung thodok kit ngai ta puau in; vante chu a hung bei masia, hung khanglo ta pua’n tiu in, a umnau ah kipat inle hung thodok kit ta pua’n au.

¹³Nang in ka hunbî ding a la guat in, ei hezing hin la, la lungnatna a bei masia, Sheol ah ei la sêlgu hizaw mai lechin aw!

¹⁴Mihingte a thi’nung un hung hing kit ding a hiu em? Ka sepgimna ding nite chu a hung bei ah, thâdaw ah ka umna ding hun chu, a la ngak mai ing ka.

¹⁵Ei ko inla tin hun dawnhu ing ka; la khut sepdawsa chu, mu kângkâl ngakla’n la.

¹⁶Ziaphat chuleh, ka kalsuante ensui ta pua’n la tin, ka gitlonate le entha talo ding la hi’ngâl a.

¹⁷Ka bawsiatnate chu dip sung ah châl bit khum hita’n tin, ka dukdaklonate chu khûmang ta ding la hi.

¹⁸Himaleh, tâng chu a chim in a nawn zo ta’n, suangpi chule a umna mun ah kipat chawn mang ah um in,

¹⁹tuite chun suangchangte chu a tok mang un; tuihok in leite a tok mang ah, zia gual chun mihingte kinepna chu la suksiat piak hi.

²⁰Nang in kumkhua’n amau la zo zing ah, amau chu a mangthai tau hi; a mêl uh la hi’danglam piak in, la sawl mang tai.

²¹A chateu jana a chang un, maleh, amau in zia chu a hepuau a, tawden ah a um uh chu kuama hetphâk a hita puai.

²²Amau taksa chung ah natna bep a thuak khop sêt un, amau leh amau a kithûm khum sek ui.