Read Vaiphei JOB 15 Bible Online

JOB 15 - Vaiphei bible

JOB 15

¹Ziaphatchun, Teman mi Eliphaz in zia gual hin a dawnhu a:

²Mipil in bangmalo mai mai ah dawnhu in, sualam hui bep in a gilpi sudim ding a hem?

³Thu man lo mai mai ah kinialpi in, phatchuamna bei in mawk gen ding a hem?

⁴Himaleh, nang in Pathian launa la koimang in, Pathian kiang ah kipum piakna la dâl nalai ah.

⁵La khawlona’n la kam la kân, mithepna paukam la mang zaw mai a.

⁶Keima hilo in nangma kamsuak in thiamlo la kichan ah, la muk ah thupawt in nangma a hun heksia ta chu lam.

⁷Mihing lak ah piang masa pen ah kingai la hem? Tângte kisiamma khan la piang ta a hem?

⁸Pathian vaihawmna thu la ngaitha kha a hem? Pilna hi nang bep â a hem?

⁹Ka hetlo uh nang in bang la he diak ah a hem? Ka hiatthiam lo uh nang in la hiat thiam bang a um diak em?

¹⁰La pa sâng ah upa zaw têksia leh, samkângte ah kipat pilna chu ka zil uh ei vei.

¹¹Pathian thamuanna thute leh, la kiang ah aw nem tak ah thu kigente hi, neu talua sa la hem?

¹²Bang ding ah la lungthim in hun pui mang ah, bang ding ah la mit tesâl ah,

¹³zia ziak ah chu la lungthim in Pathian kãl ah, la kam ah zia gual thu chu gen la hi em?

¹⁴Mihing thitheite hi bang a hiu ah thiangtho ding, numei sung ah piangte hi, bangti’n dik thei ding a hiu em?

¹⁵Pathian in a mithiangthote nasan a taksang zo pua’n, van mite chule ama mit mu’n a thiangtho zo puau in,

¹⁶dukdaklona tui gual ah dawn mi chu, bang gual tuk ah ki’dak um leh, buak a hita bep diam!

¹⁷Hun etsak ing ka, ei la ngai tiam in; ka la musa chu hung puangdok ing ka tin,

¹⁸zia chu mipilte’n ei la hil uh, a pu leh pateu in a la îmguk lo uh;

¹⁹amau kiang bep ah a gam chu piak a la hi te, a lak uh malzin in a hawkhak lo chu ahi.

²⁰Mi nunsiate chu a dam sung un, mi sugentheite thokgimna ding ah kum tiam sungsia chu, nat thuakgim in a um ui.

²¹A nakhang un thawmgi lau um tak a hezing un; a thil nei buting hun un a susia ding, a chung un hung tung in a.

²²Thimna lak ah kipat kile’kit ding, a kinepna him a nei puau in, a that ding chemjam ngâk bep a hiu.

²³A nêk ding uh hawl in kiltin in a vâkvêl un, “Khoi tak in a um uh em?” a tiu a. A tuak ding uh thimpi chu, naicha um ahi tai ti a he ma mau in,

²⁴buaina leh lungkhamna’n a sudipchâk in, leng pakhat gâldo ding ah kisa zosa um gual ah, hun tuak ding ahi ti a he ngâl un.

²⁵Amau in a khut ua Pathian do ding ah, a lapdaw ziak un leh, Hat Chungnung Pathian dem ding ah, a la kipat tâk ziak un;

²⁶ama do in lochal tak in, a phaw sâ let lut uh chawi in a tai he huu a,

²⁷kiletsak ah mai thalput in, kihatsak tak in a um un;

²⁸khawpi nutsiasa ah chêng in, kuama chênlona In te lua in, kidak kisunvumna ding ah, In kibawl ah chun chêng intiu in;

²⁹hausa ngai pua’n tiu in, a hausaknau inle daisawt pua’n a; lei ah a zung uh le tha diak pua’n tiu in,

³⁰thimna kipat suakcha pua’n tiu in, a zungteu chule meikuang in kângkeu intin, a pâk lûnteu chule hui in mût mang ta’n a.

³¹Ama leh ama kithêm in bangmalo ah kinga ki’hen, a mu ding chu beingawn ahi ngâl a.

³²A hunbî kiguat a tun masang in a ting ah piak hi’ntin uh, a bakteu chule seldok man pua’n a.

³³Grep gui gual in a ga sialte thinpul hi’n tiu in, Oliv pâk gual in a pâk uh pul in au.

³⁴Pathian nei lo honte chun ga sua pua’n tiu in, nêkgûkna puanbûk chu mei in kâng tum in a.

³⁵Ngaituana phalo a nei un, thil phalo a hung ga sek in; a lunggil un dawha phalo a guanggal sek ui.