Read Vaiphei JOB 16 Bible Online

JOB 16 - Vaiphei bible

JOB 16

¹Ziaphatchun, Job in zia gual hin a dawnhu a:

²Zia gual thu chu ka la he tam ta ma ma hi; la bawn un ei sugenthei ding bep ah, thamuantu ngen la hiu hilam.

³Thu mantheilo hin chintawk a nei diam? Ahiloleh, bang in a hun chokphûl ah, zia gual ah chu thu gen la hiu em?

⁴Keima dinmun hin nanghaw um leu chin, la gen gual gual uh chun ke’nle gen thei ding ka hi; nanghaw nialna ding thu, ka nop cheng zop khawm thei ing ka tin, ka luchang le la chung un, hun thin khum thei ding ka hi

⁵Ka kamsuak in hun tilkho ing ka tin, ka mûk ah thamuanna thute chun, la thok gimna hun nêm ding ka hi.

⁶Bang cheng gen ma lengle, ka natna ei nêm diak pua’n tin, thuak tun tun ziang lengle, bang a hem a nop chuamna um?

⁷Ahi, ei suchau chu Pathian ahi ngei ah, ka lawi leh gualte zosia le, ei naw mang piak zo tai.

⁸Chuleh, ei hi’vuai chu ama ahi, zia chu ei dodâl ah hiatsakna ahi; ka kingakna chu ei do in a hung pang ah, zia chu ka maichang ah ei kophiltu a hung hi tai.

⁹A lungnatna’n ei bottel in, ei muda ah, a ha ei gawi khum nalai ah; ka mêlmapa chun muda tak in, ei mitchangsâl hi.

¹⁰A kam uh ei kâtdal khum un, simmaw tak in ka ngeibiang ei betpiak un, ei eulau dingin a kikai khawm ui.

¹¹Pathian in Pathian ngaisak lo, mi nunsiate kinoptelna dingin, a khut un ei pedok tai.

¹²Nuamsa tak in ka la um ah, ama’n phelni ei sua ta’n; ka ngawng ah ei man in, ei gawtnawi dim dem ah, a kungmui dingin ei tâkdok nalai ah;

¹³a thal kâp mite zosia’n ei ûm kîmvêl tau hi. Lainatna bei in ka kãlte chu a phildok ah, ka thinkha chu tual in a sungtha tai.

¹⁴Ka chung in a vêl vêl in a hung kuan in, gâlhat gual in ka chung in a huham hi.

¹⁵Ka vun tuamna dingin saidip puan ka kikhû ta’n, ka hatna chu leivui lak in ka paitha tai.

¹⁶Ka kâna ziakin ka maichang a san zo ta’n, ka mitkua le a thûk zo tai.

¹⁷Ka khut in thagum a sua pua’n, ka pauchapnale a thiangtho zing hi.

¹⁸Aw lei, ka thisan khu’khum kin, ka patau aw hi thip diak ki’hen.

¹⁹Tu’hin ei hiatpipa chu van ah a um in, ei panpitu chu vansâng tak ah um ahi.

²⁰Pathian kiang ah mitthi tui ka sungdok in, ka gualte chun ei nuisan ui;

²¹min a Inveng a panpi sek gual in Pathian kiang in mihing hi, panpi hizaw leu maw!

²²Kum sawt lo nung leh, ka kile’kit lona ding lampi zui in, chia ding ka hi ta’ngâl a.