Read Vaiphei JOB 18 Bible Online

JOB 18 - Vaiphei bible

JOB 18

¹Ziaphatchun, Shuhi mi Bildad in zia gual hin a hun dawnhu a:

²Bang chan thu mantheilo hawl gaw nalai la hem? A la ngai inla, hun gen ing kau.

³Bang ding ah gancha gual bep ah ei ngai la hem? Bang ding ah ngaituana bei gual ah lei bawl a hem?

⁴Nang, la lungnat man ah kipuaitel pa, nang ziak ah leisiat hi nutsia ah um in, suangpi le a umna mun kichawn la hisak a hem?

⁵Ahi, mi nunsiate vâkna chu hithim piak ahi’n, a meikuang le vâk pua’n a.

⁶A puanbûk sung ua mei chu thim intin, a chung ua thaumei chu mut mit hi’n a.

⁷A kalsuan hatnau chu sukchom hi’ntin, amau lemguatna chun paithâk in um in au.

⁸Amau keng ma ma’n lênthâng ah kipal awk in, kawkhûk in a vâklut ngâl un.

⁹Chepden thâng in a keng uh a awk a.

¹⁰A awkna ding uh thângkual lei ah sêlgûk ahi’n, a jawi ua thâng kam ahi.

¹¹Kiltin ah kipat launa’n a hun ûm in, a khawtalzum uh a chuan zui pek hi.

¹²A thahâtnau chu sawlsam in man intin, a kipalpaina ding un siatna a chângpang zing hi.

¹³Natna ziakin a vun uh nêk zaw in a um in, Thi’na masa pen chun, a taksa bâk zosiau a ne zo tai.

¹⁴A kisuanpiu puanbûk ah kipat in, puaitel in um intiu in, leng tizat um takte kiang ah chun, pui lût hung hi’n au.

¹⁵A puanbûk un bangma um ta pua’n tin, a chênna mun zosiau kât the’khum hi’n a.

¹⁶Nuai lam ah a zungteu chu keu intin, chung lam ah a bâk jamte chule, vuaitha ta’n a.

¹⁷Lei ah amau hetzingna zosia bei ta’n tin, kotzing vêl ah le min nei ta pua’n au.

¹⁸Vak ah kipat thim lak ah, naw lut hi’n tiu in, khawvel ah kipat nawdaw in um ta’n au.

¹⁹A mi teu lak in tu leh cha nei ta pua’n tiu in, A chênnau ah chêng ding mi nei ta pua’n au.

²⁰Tumlam gam ah mite’n a thil tuak uh chu, maksa’n tiu in, sualam gam ah mite chule tiza hial ta’n au.

²¹Pathian ngaisaklote chênna chu, zia gual chun hung um him intin, Pathian he’phalote umna chu, zia gual chun hung um in a, ti in.