Read Vaiphei JOB 19 Bible Online

JOB 19 - Vaiphei bible

JOB 19

¹Job in zia gual hin a dawnhu a:

²Bang chan la kamsuak ua lei sugenthei un, lei sem nêl nâk lai ding uh a hem?

³Sawmvei hial lei demsia tau in, a diklo ah lei ngawu hi zakcha lo lai la hiu em?

⁴Chuleh, a diklo hita mawng lengle, ka diklona chu kipuak mai ing’ka.

⁵Kei demna ding ah nanghaw kiletsak ah, nuaisia ah ka um ziak ah ei dem la hiu chun,

⁶Pathian in siatna hi ei tuak sak ah, a lênthâng ah ei tuam ahi ti hi he tau in.

⁷“Thagum sua’na ahi,” ti’n ka kiko jak ah ahi’n la, kuama’n ei limsak puau a; ngai tak in ka kiko ah, maleh dik tak ah vaihawmna a um puai.

⁸Ka kân zaw lo ding dâi ei kai khum ah, ka lampite chu thim a khu’khum hi.

⁹Ka lopina ei lîpthâk piak ah, ka luchang ah kipat ka lallukhuk ei lakdaw piak tai.

¹⁰Kil tin ah ei hisiau ah, ka mangthai ta’n; ka kinepna chu thing gual in, a zung a kaldok tai.

¹¹Ka chung ah a lungnatna a sêmkuang ah, a mêlmate lak in ei sim khawm tai.

¹²A sepaite a hung khawm un, khuk ei chawkual khum in, ka puanbûk ûm suak in giamun a khual tau hi.

¹³Ka chanaute gamla tak in a koimang in, ka mêlhette’n ei gamlat san zo tau hi.

¹⁴Ka chanaute leh ka gual ngai ma ma te’n, ei nusia zo tau a,

¹⁵ka In ah ka malzinte’n, ei hemil zo tau hi; ka nasêm nungakte’nle ei malzin bawl tau ah, a mit mu un malzin ka suak tai.

¹⁶Ka suakpa ka ko in la ei dawnhu ta pua’n; a kiang ah ka thûm thaw a ngai tai.

¹⁷Ka hat gim chu ka ji’n a thuak zo ta pua’n, ka Inkuanpite â ding ah ki’dak um ka suak tai.

¹⁸Naupangte nasan in ei simmaw tau ah, ka thawdok si’n leh ei gensiau hi.

¹⁹Ka gual ngai pente zosia’n ei kidak tau a, ka lungsiat pente chu, ei gensia’n a pang tau hi.

²⁰Ka vun leh phete hi ka gu’n a bek den un, a suakcha ham ham chu ka hi.

²¹Aw ka gualte haw, ei lainat unla, ei lainat un, Pathian khut in ei suliam ta’ngâl a!

²²Bang ding ah Pathian gual ah ei delzui nalai ah, ka taksa thokna hi lungkim zo nai lo la hiu em?

²³Aw, ka thugente hi zikdaw himaijen leh aw! Lekhabu zik lut a la himaijen leh chu aw!

²⁴Thikzum leh hâkngêk ah suangpi chung ah, kumkhua um ding ah sut daw hitamaijen leh aw!

²⁵Ei Tanpa chu a hing zing hi ti ka he’i, ama chu ni tawp ni leh, lei chung ah hin hung ding di ahi’n,

²⁶ka vun hi suksiat zaw ahi’phat leh, ka taksa hin Pathian chu tuak ding ka hi’n,

²⁷keima ei panpi pa chu mu’ng ka tin, ka mit ngei in mu’ng ka tin, kuama dang en ta pua’n a. Ka lungchang ka sung ah hin a chautha tai!

²⁸“Ama chu bang gual in I gawt diam uh? Ama ah chun thil zosia bul chu, a um ngâl a!” la tiu chun;

²⁹chemjam chu kicha unla, vaihawmna chu um ding ahi ti, la hettheina ding un, lungnatna chun chemjam ah, gawtna hun tun ding ahi ngâl a, ti in.