Read Vaiphei JOB 2 Bible Online

JOB 2 - Vaiphei bible

JOB 2

¹Ni khat chu, Pathian chate chu LALPA kiang in a hung kilâk tau ah, Setan chule LALPA kiang ah kilâk dingin a hung a.

²LALPA chun, Setan kiang in, “Khoi lam ah kipat hung la hem?” ti’n a dong a. Setan in LALPA kiang in, “Lei chung ah ka vâk tawl tawlna lam leh, ka vâk suk ka vâk tona lam ah hung kipan ka hi,” ti’n a dawnhu a.

³LALPA‘n Setan kiang in, “Ka suak Job saw la ngaitua kha em? Khawvel ah hin ama tawhbang ah pha bukim, thu tak leh, Pathian lau leh thil phalo lak ah kipat kisûm thei mi umlo ei ve. A ziak leh zal bei ah lei hi’siatsak tiang inle a gin um zing nalai hi,” ti’n a dawnhu a.

⁴Ziaphatchun, Setan in LALPA a dawnhu a, “Vun thasâng ah vun! Mihing in a nei zosia chu a hinna dingin pia phal ngei ding a paw em?

⁵Tu’hin, la khut lam inla, a gu leh a phe te chu vak khoi tiam in, la maichang ah hânsia hun law mai ding ahi,” ti’n a dawnhu a.

⁶LALPA‘n Setan kiang in, “A phai, ama chu la khut ah um ahi; a hinna vang hawi in,” a ti’n.

⁷Tichun, Setan chu LALPA kiang ah kipat chun a pawtdok ah, Job chu a kengpêk ah kipat a lujang tiang in meima huaisia tak in a tuam suak tai.

⁸Job chun a kikhuatna dingin bêlhal a la’n, vut lak in a kichu ta mai a.

⁹Ziaphatchun, a ji’n a kiang in, “Tu’tiang ah hinle ginum nalai lai ding la hem? Pathian chu hânsia lawkhum inla, thi’suk mai ta’n,” ti’n a gen a.

¹⁰Himaleh, ama’n a kiang in, “Numei ngolte gual ah pau puat puat ziang la hi hi lam. Pathian ah kipat thilpha ngen mu ah, a phalo him him mulo ziang ding ah la ngai a hem?” ti’n a dawnhu ah. Zia zosia ah chunle Job in a kam sung ziang inle thu a gen khial puai.

¹¹Tu’hin, Job gualpha mi pathumte chun a chung ah thil phalo hung tung zosia chu a la het phat un, a In chiat ua kipat in a hung tau a: Teman mi Eliphaz, Shuhi mi Bildad leh Naamath mi Zophar a hiu a. Job thamuan ding ah chia dingin a kimukhawm tau a.

¹²A vak gâl mu lai un a mêl chu a hethei ziang ta puau a, aw ngai tak in a kap ta mai un; a puan uh botthêk in leivui a kibuak khum tau a.

¹³Ni sagi leh jan sagi zet chu lei tual in a kichutpiu ah, a nat thok a huaisiat ma ma ziakin, kuama kam khat ziang ah paudok le a um puau hi.