Read Vaiphei JOB 20 Bible Online

JOB 20 - Vaiphei bible

JOB 20

¹Ziaphatchun, Naamath mi Zophar chun zia gual hin a hun dawnhu a:

²Ngai in! Ka ngaituana a kichok ziang in, hun dawnhu lo thei gual in ka kingai puai.

³Thuhilna ei hi’zakcha chu ka he hen, kei hetthiamna sâng ah thûkzaw chun ei hun dawnhu hi.

⁴Lei chung ah mihingte a um ma pek ua kipat khan, zia hi la he kha la,

⁵mi nunsia kiphatsakna’n a daisawt pua’n, Pathian ngaisaklote kipakna chule, hun chomkhat sung bep dai ahi ti, a la henai lo la hiu em?

⁶Vante tiang supha’n sâng uh hen la, a luchang un sûmte supha hial maleh,

⁷a zun leh ek gual un mangthai inti un, amau a la mu kha sate chun, “Khoilam ah um ahi tam?” ti’n au.

⁸Jan mang gual in leng mang intiu in, mu ding um ta pua’n a; jan ah kilâkna kimu gual in naw mang hita’n au.

⁹Amau a la mu’na mit chun mu kit ta pua’n tin, a umna mun unle mu kit ta puan au.

¹⁰Michagate thil a la guk uh chu, a chateu in dit kit in au.

¹¹A taksau chu khangdawng lai gual bang maleu, leivui suak pai ta’n au.

¹²Nunsiatna chu a kam un thumsa maleu, a lei nuai un sêlgu maleu le,

¹³sêkdok nuam lo in a kam un muam zing maleule,

¹⁴a gilpi sung ua a lut phatin, a sunggil un gulgu a suak tai.

¹⁵Hausaknate chu a pumval un, a lawdok kit sek ui; Pathian in a gilpiu ah kipat in, a paidaw piak hi.

¹⁶Gulgu chu chawp intin uh, gulsegu chun amau that in a.

¹⁷Luipi khuaizu leh bawngnawi, tui ah luang chu mu pua’n au.

¹⁸A sepgimna gau chu pia kit intiu in, amau in chang pha pua’n au. A kiveinau ah sum pungte chu, nopchên diak pua’n au.

¹⁹Amau in chagate tawden ah limsak lo in, amau sak lo In chu, a pawng lâkpiak ngâl un.

²⁰A gilpi a um hiat hiat thei pua’n; a du-âmna ziakin bangma a hawi puai.

²¹A nêkbang bangma nutsia a nei pua’n, ziaziakchun, a nei leh lamte chun, sawt dai pua’n a.

²²A kiningtin lai tak chu, a buai lai tak hi’ntin; lunggimna zosia’n hun tâkbuak ding ahi.

²³A gilpiu vâ tawk tak ah a nêk ding un, Pathian in a lungnatna huaisia tak chu, sun khum intin, an ah a ngansia ding un gua gual in zuk khum in a.

²⁴Thik gâlvan lau in taidok maleu, dâk thik thalpi’n kâpthil tho tho ding ahi.

²⁵A jukdok un, a taksau ah kipat in, a hung pawtdok ah, a thinkhau ah kipat in a muk zum, te zel zel te chu a hung lengdok ta’n; a chung un tizatnate a hung tung hi.

²⁶Amau gochan dingin thimpi ko hi’ntin, kuama mut kuang hilo meikuang in, amau chu hun kâng tum in a; a puanbûk ua nutsia ah, um nalai sia chule hâl tum hi’n au.

²⁷Vante khin a mantheilonau chu, hun taklang intiu in, leilung hile ama’u do dingin, hung kipandok in a.

²⁸A Insung neithilte chu, puakmang piak hita’n tin, Pathian lungnatna ni chun, a nei leh lamte chu luakmang hita’n a.

²⁹Zia hi Pathian ah kipat mi nunsiate chanvo ding, a go ding ua Pathian in, a koikhêk piak chu ahi, ti in.