Read Vaiphei JOB 21 Bible Online

JOB 21 - Vaiphei bible

JOB 21

¹Job in zia gual hin a dawnhu a:

²Ka thugen hi pha tak in ngai unla, zia hi la kithamuannau hita hen.

³Ka thu gen ding hi ei ngaithâk piak un; ka gen zaw phat leh ei nuisan na’n lau.

⁴Mihing chung ah phunnawi ei hi’sak la hiu em? Daw zo lo thei mawng hilo ka hem?

⁵Ei en ma taleu chin, maksa’n la kam uh la khut un hum ding la hiu.

⁶Ka ngaitua phat leh lungkhamna’n ka dim sek ah, ka pum in ka kithing hial ziang sek hi.

⁷Bang ding ah mi nunsiate chu hing ah, a têk hun tiang uh dam ah, a thil hitheinau khang tul tul nalai sek a hem?

⁸A damsung un a tu leh chateu a siam piting man un, a suanteu pitin a mu man ui.

⁹A Inteu chu launa kipat hukdaw ahi’n, a chung un Pathian jepna mol a chu ngai puai.

¹⁰A ganchateu in a no nei hun chet chet un a hing un; a bawngpiteu no le a sia ngai puai.

¹¹A naupangteu chu gan hon gual in a thâdok sek un, a tu leh chateu in a lâmkual khum sek ui.

¹²Theile leh khet git tawh La a sau ah, mûtgit tawh a kihilim sek ui.

¹³A dam sung niteu neinung tak in a mang tum un, thamuang tak in Sheol lam a zuan sek ui.

¹⁴Pathian kiang in: “Ei nusia in! La lampite le ka he nuam puau hi,

¹⁵Hat Chungnung Pathian chu kua a hia a hem, a na ka sep ding uh? Ama kiang ah ka pauchap un, bang phatchuamna mu ding ka hiu em?” a tiu a.

¹⁶A neinungnau bep chu a lawchâk uh hilo a hem? Mi nunsiate guanggalna chu ka ki’dak lam tak ahi.

¹⁷Mi nunsiate thaumei chu, bang jat vei bep mut mit piak a hiu em? A chung un siatna bang jat vei a tung em? Pathian in a lungnatna’n, bang jat vei thok gimna a pia ta em?

¹⁸Bang jat vei tak hui in a mut mang sek chângvai leh, thigua’n a tawmang sek busi gual in a um sek awm?

¹⁹Nang unla, “A dukdak lonau chu, a tu leh a chateu dit dingin, Pathian in a khol khawm piak hi,” la tiu in. A chung un thuk kit ziang leh hechian ding a hiu.

²⁰Amau mit ngei in a siatna tuak uh chu mu ziang uh hen la, Hat Chungnung Pathian lungnatna chu, tui gual in dawnleu hiding.

²¹A dam sung ding uh tha jat a bei hun ah, a thi’nung ua, a Inkuanteu khankhua ding, a gêl piak sam ua a hem?

²²Milian leh lalte zosia chung ah, vaihawmpa ama ahi sapi’nle, kua’n Pathian chu hetna hil thei ding a hem?

²³Mi pakhat chu hausa tak ah nuam tak leh, thamuang tak ah a um lai tak in a hung thi ta’n,

²⁴a phûkle a sâ in, a theng leh gute le a hing ma ma hi.

²⁵Midang pakhat chu lungngai tak ah, thilpha mawng mawng tep lo in a thi’n.

²⁶Leivui lak in kibang tak in a lumkhawm tau ah, a than un a tuam gêl tai.

²⁷Aw, ka mawna ding hawl ah, la ngaituanateu chu ka henai.

²⁸Nang un, “Lengte In chu khoitak ah um a hem? Mi nunsiate chênna puanbûk chule, khoi tak ah um a hem?” la tiu a.

²⁹Lamlian dung ah khualzinte chu la dong kha puau em? Amau thugen chu la pom puau ah a hem?

³⁰Mi nunsiate chu siatna ni khoikhâk lo ah um in, lungnatna ni’ hukdaw ahi ngai awm?

³¹Kua’n a maichang uh kawk ngam in, a thilbawl uh a thuk ngai awm?

³²Thân ah vui ahi tiang unle, a thân uh veng ding koi a hisek hi.

³³Phâi tungman ziang inle amau chu a duat in, a masang ua simsênlote a la chia tâk nung un, mi tin in a nung uh hun zui nalai ding a hiu.

³⁴Thu mantheilo ngen ah chun, bangti ei thamuan ding la hiu em? Lei dawnhunau ah hin zuau thu lo’ngâl, bangma dang a um puai, ti in.