Read Vaiphei JOB 23 Bible Online

JOB 23 - Vaiphei bible

JOB 23

¹Job in zia gual hin a dawnhu a:

²Tu’ni hinle ha’phin ah kiphin ding ka hi; thûm leh mau ah ka um zing tâk nung ah hinle, a khut gik tak hi ka chung in a nga zing hi.

³A chênna mun tiang ah ka vachia theina dingin, a umna mun chu khoi tak a hem ti he ta ve leng aw!

⁴Ka chung thu hi a kiang ah tut ing ka tin, a nialna’n kam hat ten ding ka hi.

⁵Ei dawnhuna ding chu hia’ng ka ti’n, ka kiangah a gen nopte chule he ding hive’ng.

⁶A thilhitheina nasa tak ah chun, ei hun nial ma diam? Ei nial pua’n ah; ei ngaisak zaw ding ahi.

⁷Zia tak ah chun midik in ama kiang ah don intin, ka chung ah vaihawmpa chun, kumtuang dai dingin thiam ei chansak ding ahi.

⁸Ngai tiam un, ma lam ka zuan ah, ama a la um ta puai; nung lam in ka chia kit ah, ka mupha diak ta puai.

⁹Ka veilam inle ei kisêl mang san in, ka muthei diak pua’n; changlam in kihei lengle ama ka mu diak puai.

¹⁰Himaleh, ama’n ka lampi zui chu a henai; ei patep zaw phat leh sana gual in, hung pawtdok kit ding ka hi.

¹¹Ka kengte hin a zanung chu tawzui zing intin; a lampite chu zui zing in, pêt mang lo ding ka hi.

¹²A thupiakte chu ka pêtsan ngai pua’n, a kamsuakte chu ka âng sung in ka vopdet zing hi.

¹³Ama thu bep ah pansa ahiziak in, kua’n thêm zo ding a hem? A bawl nop taphot chu a bawl mai ngâl a.

¹⁴Kei â ding ah a guat tapo chu, bawl zo ding ahi’n; zia tawhbang chu a dang tam tak le, a ngaituana’n a um hi.

¹⁵Ziaziakchun, ama chu ka lau hi, ka ngaitua mai mai inle ka tiza ahi.

¹⁶Pathian in ka ngaituana a basapsak in, Hat Chungnung Pathian chun ei sulauthawng hi.

¹⁷Thim lak ah hin mangthai thei in, thimpi hin ei khang ziang thei zaw mai leh aw!