Read Vaiphei JOB 24 Bible Online

JOB 24 - Vaiphei bible

JOB 24

¹Bang ding ah Hat Chungnung Pathian chun, hun hi a vop phat lo ah, ama he mite chu a nite a musak ngai lo ahi diam?

²Migilote chun gamgi a chawn mang un, gancha honte a kimat un, a kichin sek ui.

³Nauchagate sabiltung chu a naw mang piak un, meithâite kitiamna’n bawngchal uh a lâkpiak sek ui.

⁴Mi tasamte chu lamlian ah kipat in a sawndok un, lei chung ah michagate zosia a kisêlmang sek ui.

⁵Chagate chu gamkeu ah sabiltungte gual in, nasêm gim dingin a kuandok un, a chateu nêk ding hawlin lou chul ah a kimai mai sek ui.

⁶Amau lou hilo in bu a ât un, migilote grep ga lêp lam chu a dawl khawm sek ui.

⁷Sil leh chên bei in jankhua’n a lum un, jan puan bei in phalbi a thuak sek ui.

⁸Tâng ah kipat daitui in a chapno in, bitna ding hawl in suangpite a bêl sek ui.

⁹Nauchagate nawichep lai kaidok ah, michagate nausen banda ding ah, lâkpiak ziang le a um ui.

¹⁰Nîk leh puan bei ah ngawnchang in, a vâk vêl vêl un, gilkial kawm in buphal a puau in,

¹¹changkuang lak ah Oliv sathau a sûk un, grep ga chil in a pang unla, a dangchâk uh a pha diak puai.

¹²Khawpi sung ah mithi dingte chu a thûm un, beliamte gawl in panpitu a ko ui; ahi’n la, Pathian in a dotnau a ngaisak puai.

¹³Khawvâk ziak ah hel lawi a um un, a lampite helo leh, a lampite haw kha ngailote a hiu.

¹⁴Tualthatte chu migenthei leh tasamte that dingin; thimbut in a kipan un; janthim nuai ah gucha gual a hiu.

¹⁵Ângkawmpa chunle khawthim a ngâk a, “Kuama’n ei muthei ta pua’n au,” a ti sek a; mi het theilo di’n a mai a tuam sek hi.

¹⁶Khawthim nuai in Inte a vit hawm in; sun nitum in a kikhum chak un, khawvak lam le a he ngai puau hi.

¹⁷Jan khaw thim chu amau â dingin, a jingkal uh ahi’n, khawthim lak launa kiti chu, amau a ding ah a gualphau ahi ngâl a.

¹⁸Tuisuagiat in a tokmang ah, a gam luanau chu hânsia lawkhumsa ahi’n; a grep huan lam un kuama grep chil ding, a kuan ngai ta puau hi.

¹⁹Khawkhâl leh nilum ziak ah, vûk tui a luan mang gual in, Sheol in migilote a chawp mang hi.

²⁰A nuteu inle hemil ta’n tiu in, than in vang tui sa ma ma ta’n a; hetphâk hita pua’n tin uh, nunsiatna chu thing gual ah tanbot hung hi’n a.

²¹Cha neilonu chu a sugenthei un, meithâinu chung in thilpha a bawl puau hi.

²²A chutisapi’nle Pathian in, a thilhitheina ziakin, mihatte dam sung a hisau piak ah; a hinkhuau chungchâng ah a lungkham phat ua leh, a hung thodok kit sek ui.

²³Bit tak ah umtheina a pia’n, panpi in a um sek ui; a mitte chun a lampiteu chu a entha zing hi.

²⁴Hun chomcha khat sung â ding ah choisa’n in a um un, ziazaw chuleh a mangthai ui; pakcha gual in a vuaithau ah, a chuai ta sek un; bu vui gual ah âttan in a um ui.

²⁵Chutichu hiloleh, kua a hem lepchiana hethei ah, ka thugen chu bangmalo mai mai ahi, tithei ding? ti in.