Read Vaiphei JOB 27 Bible Online

JOB 27 - Vaiphei bible

JOB 27

¹Chuleh, Job in a thugen sunzom pek in zia gual hin a gen a:

²Pathian hing zing, bangmalo ei sua’pa, Hat Chungnung Pathian leh, ka hinkhua genthei tak ah ei siampa chu,

³ka hat thei laisia, Pathian hinna ka sung ah a um laisia,

⁴ka muk in zuau gen pua’n tin, ka lei inle mi thepna thu gen ngai ngai pua’n a.

⁵“Nanghaw chu la dik ngut ui,” titalojen ka! Ka thi masia ginumna hi nusia pua’ng ka.

⁶Ka dikna tudet ing ka tin, tha’suak ngai ngai pua’ng ka; ka dam sung sia’n ka lungthim in, ki’awimawna nei pua’ng ka.

⁷Ka mêlma leh eidote chu migilo leh, diktat lo gual ah gawt hitau hen.

⁸Pathian ngaisak lote chu, Pathian in a paithâk ah; a hinnau a lâkpiak phat leh, a kinepnau chu bang suak ta ding a hem?

⁹Buaina a hun tuak phat ua leh a kiko’na thawm uh, Pathian in hun ngaitha ding a hem?

¹⁰Hat Chungnung Pathian ah chun a kipakna diam uh? Pathian a ko zingna diam uh?

¹¹Pathian khut thâk dan hun hil ing ka, Hat Chungnung Pathian ah um chu, îmguk nei pua’ng ka.

¹²La leng un la mu suak tau ah; a leh, bang ding ah man theilo tak ah, um chiat nalai la hiu em?

¹³Zia hi Pathian in migilote gochan ding leh, mi nuaisiate chan ding ah, Hat Chungnung Pathian ah kipat, a guat piak chu ahi:

¹⁴Cha a nei tam po ua leh, chemjam ah thi ding bep hi’n tiu in, a suante chun a nêk khop nei ngai pua’n au.

¹⁵Zia ah suakcha sunte chu, hîpi’n thi’n tiu in, a meithâiteu inle kâ La sa pua’n au.

¹⁶Dangka chu leivui gual in, khol khawm maleule; nîk leh puan sil sên lo, chên sên lo sia vum ziang maleu le,

¹⁷bang jat sia khawm maleu, mi dikte’n sil leh cheng intiu in, mawna beite chun a dangkau chu kihawm in au.

¹⁸A Inteu chu vachabu gual leh, grep huan vênna bûkcha gual in a sau a.

¹⁹Hausa tak in lupna zuan intin uh, maleh, bangma dang a bawlbe thei diak puau hi; a mit uh a hun hak un, bangmacha a la um ta puai.

²⁰Tuisuagiat gual in lauthawngna’n, a hun chûm ah, jan kâl in chîmpei in a tok mang zo tai.

²¹Sualam hui in a lapkâng ah a mut mang tai; a umna mun ua kipat tawmang in a um zo tau hi.

²²Daidawp lo hial in a sep un; a thilhitheina’ kipat, kin tak in a taidok tau hi.

²³A khut a bet khum ah, a umna kipat in a hun nuisan tai, ti in.