Read Vaiphei JOB 28 Bible Online

JOB 28 - Vaiphei bible

JOB 28

¹Dangka chawdawna khûk a um ngei ah, sana hâlthianna mun le a um hi.

²Lei ah kipat in thik chu laidaw ahi’n, suang ah kipat chun ngen lakdaw ahi.

³Thil laidokte chun lei sunggil thim nuai ah a lut un, leinuai sunggil thûk pen leh, thim lak ah suang thikte chu, a vahawldok sek ui.

⁴Mihing chênna pawlam ah phâijang ah lei kawhawm siam in, a chung ah zin leh lengte hetphak lona, mite hetphâkna khêl lam pek in na a sêm ui.

⁵Lei chung hivang nêk leh châk, hung pawtdawna ahi’n, a sunggil lam chuvâng mei in, a sukdanglam vek ahi tai.

⁶A suangte lak in sapphire suang mantamte a um un, a leivui lak in sana a um sek hi.

⁷Zia lampi chu sasial ne vachate’n a hepuau ah, mupi mit inle a mu ngai puai.

⁸Gam sahângte’n le a haw ngai puau ah, sakeibaknei inle a haw kha puai.

⁹Meisuang chu khut in a cho un, tângliante chu a lum let ui.

¹⁰Suangpi a vitvang un, suang mantam chitin a mudok sek ui.

¹¹Luipi nâkte chu a hukbing un, thil kisêlgute chu a tâklang sek ui.

¹²A leh, pilna chu khoi’tak ah kimu ta ding a hem? Hetthiamna chu khoi tak mun ah, um ding a hem leh?

¹³Mihingte’n a lampi a hepuau ah, hing leh damte gam ah hin mu zaw ahi puai.

¹⁴Tui thuk in, “Keima ah a um puai,” a ti’n; tuisuagiat chunle, “Ka kiang in a um puai,” a ti kit hi.

¹⁵Sana ah chawk thei a hipua’n, a man dingin dangka thik le, te’daw thei ahi diak puai.

¹⁶Ophir sana’n a tuk thei pua’n, onik leh sapphire suang mantamte’n le, a tuk zo puau hi.

¹⁷Sana leh suanggial hoi pen inle a tuk pua’n, sana thiangtho ah cheimawi inle a tuk puai.

¹⁸Pilna man ding ah chun suang mantam chitin, tuikep suang leh krustal nangawnle gen kham ahi puai.

¹⁹Ethiopia gam ah suangval zosia tawh le, te’ ding a hipua’n; sana thiangtho zosia’n le a tuk zo puai.

²⁰Pilna chu khoitak ah kipat hung kipan a hem? A leh, hetthiamna chule khoitak ah um a hem?

²¹Hinna nei zosia mit mu ah kipat sêlguk ahi’n, chunglêng vachate muphâk lo ah sêlgûk ahi.

²²Abaddon leh Thi’na chun, “A husa git uh chu, ka bil un ka la he veu sek ui,” a tiu hi.

²³Pathian in a lampi chu a hia’n, a umna mun chule a he’i.

²⁴Ama’n lei mong lam tiang in a vak en ah, vante nuai ah thil um zosia hi a mu zing hi.

²⁵Huizang gikna a piak lai leh, tuisuagiat a te’daw lai ah khan;

²⁶gawtui â ding ah dan a siam lai leh, têk â ding ah lampi a siam lai khan;

²⁷ama’n a la mu’n a la gen tai, a la phudet in a la hawldok zo tai.

²⁸Ziaphatchun, mihingte kiang in: “LALPA launa chu vang pilna ahi takzet in, thil phalo nutsia hi, hetthiamna bul chu ahi takzet hi,” a tii.