Read Vaiphei JOB 29 Bible Online

JOB 29 - Vaiphei bible

JOB 29

¹Job in a thugen chu zia gual hin a sunzom pek a:

²Aw! tu’ma lam ah Pathian in, ei etthâk zing lai nite khan, vak um thei hi’nglang;

³a thaumei ka luchung ah a vak lai ah, thim lak ah le a vâk ah ka chia lai ah;

⁴ka puanbûk ah Pathian tawh ka kithua lai ua, ka vânglai nite kha;

⁵Hat Chungnung Pathian in ei umpi lai ah, ka chate’n ei ûm kîmvêl lai ua;

⁶ka kiheina zosia bawngnawi ah jut ahi lai ah, suangpi nasan ah ka sathau ding, a luandaw lai kha aw!

⁷Khawpi kul kotkhak ah ka pawt daw lai ah, lamthuam ah vaihawmna chutpha’ ka kichut lai ah;

⁸tangvalte’n ei muu ah, ei kimulosak ua, têksete a dindawu ah, a din den ua;

⁹miliante holim lai a thip ua, a mûk uh a hum ziang ua;

¹⁰leng chate husa a thip ah, a lei uh a khadang ua a beden ziang lai kha.

¹¹Bil ah ei hete’n ei pakchak ua, mit ah ei mute’n ei genphatnau chu;

¹²migenthei kapte ka hukdaw ah, panpitu neilo nauchagate ka panpi ziakin ahi.

¹³Mi beidongte maljawlna ka dong ah, meithâite lunggil ah kipakna La, ka sak sak sek in.

¹⁴Dikna puan in ka kithuam ah, ei cheimawi un; ka thudikna chu puanâk chual leh, dialkop in ka mang hi.

¹⁵Mitthûmte mit leh, kengbaite keng in ka la pang ah.

¹⁶Mi tasamte â dingin pa’n ka la pang ah, mêlhetlote chung thu ka buaipi sek hi.

¹⁷Midiklote hatna chu ka suksiat piak ah, a hau ah a pesau chule ka lakdaw piak in.

¹⁸Ziaphatchun, “Ka buzawl ah hin thi’ng ka tin, ka dam sung nite hi piaunêl gual in, hitam ing ka,” ti’n;

¹⁹“Ka zungte le tui lak tiang in jam lut intin, ka bâk jamte chule jankhua’n, daitui in chapno intin;

²⁰ka lopina hile keima chung ah, thak zing intin, ka khut ah ka thalpi le, thak zing in a,” ti’n ka la ngaitua a.

²¹Mite’n kei lam ah a bil uh daw in, ei ngaitha sek un; ka thuhilna ngai in a thip chil chel sek ui.

²²Thu ka gen zaw phat leh, ei dawnhu thei ta ngai puau ah, ka thugen chu a chung un, daitui gual in a chu sek hi.

²³Gawtui a ngaklâ gual un, keima ei la ngak sek un; chavâng gawtui ngak la’, kamka sek te gual in ei ngak sek ui.

²⁴Thamuanna a nei lo lai unle ka nuisan ah; ka maisua lim tak chun a tilkho sek hi.

²⁵A lampi ding uh ka têl piak ah, a hausapau gual in ka kitung in; a sepai hon lak un lengpa gual in ka chêng in, lusûnte thamuantu gual in ka um sek hi.