Read Vaiphei JOB 3 Bible Online

JOB 3 - Vaiphei bible

JOB 3

¹Ziazaw chun, Job in a pian ni chu hânsia lawkhum in a hung paudok ta’n.

²Job in zia gual hin a hun gen a:

³“Chapa a kizil ei,” a ti jan uh leh ka pian ni chu bei mai hen la,

⁴zia ni kha thim suak ta hen! Pathian in ngaisak ki’hen la, vak him him inle hun saldâ mai hen.

⁵Lungkhamna ni leh thimjin ni hi hen. Sûmpi’n chup khum hen la; sûm ah thim jing chun hilau ta hen.

⁶Zia jan chu thimpi jing in khûchak zing hen! Kum sung ah ni simna’nle pang ki’hen la, tha simna’nle panda mai zaw hen!

⁷Ahi, zia jan chun kuama piang ki’hen la, zia ni’ chun kipakna husa him him gidok ki’hen.

⁸Tuisuagiat hânsia lawkhum ah, Leviathan choktho theite chun, hânsia lawkhum uh hen.

⁹A jingsol aksite chule thim hen la; Khawvak a kinepnau thawn hen la, jingkal phalvak mu a kinepnau lâk mang hi hen.

¹⁰Ka nu sûlkot a la khâk lo in, buaina ei la pêlsak lo ziakin.

¹¹Bang ding ah ka nu sûl ah kha a la thiden mai lo ah, ka pian thâk thâk ah khale a la thi mai lo ka hem?

¹²Bang ding ah ka nu’n a pheichung ah ei la pâi ah, bang ding ah a nawi ei la chep sak a hem?

¹³Chuti hiloleh, tu’hin thipbek ah lum in, chawldam tak in ipmu ta’ng ka tin,

¹⁴lei chung ah lengte leh dot leh ho mite, amau â ding ah khawpi sesa, kisiam phat kitte haw kha tawh,

¹⁵ahiloleh, leng chapa sana tam tak nei ah, dangka thik In dim ah neite tawh.

¹⁶A hilo ngâl leh bang ding ah lamzul ah thi, khawvak him him mu manlote gual ah, vuimang ah a la um zaw mai lo ka hi em?

¹⁷Zia chun mi nunsiate’n a subuai ta pua, mi sawlsamte le a chawldam tau hi.

¹⁸Zia mun ah chun suangkul tângte, nuam tak in a um khawm tau in; a sep ding uh genpiakpa aw a he ta puau hi.

¹⁹Zia tak ah chun a lian a neu a um khawm un, suakte le a puteu ah kipat in a zalen tau hi.

²⁰Bang ding ah genthei thuak mi khawvak kipia, lunggimte chu hinna kipia,

²¹thi nuam ma ma, thi’na mu lo ah, go phûmguk hawlte sâng ah gunchu zaw te,

²²thân kotang ah lut nuam ma mate, kiang ah piak hilo a hem?

²³Bang ding ah a lampi mutheilote kiang leh, Pathian in a ûm khumte, kiang ah khawvak kipia a hem?

²⁴Ka vaithum nêk ding gual in, thûm leh mâuna a hung tung in, ka thûm leh maunate chu, tui gual in a luangdok hi.

²⁵Ka thil lau pen chu ka chung in a chu ta’n, ka tizat pen chu ka chung in a tung tai.

²⁶Lungthim nopna ka nei pua’n, ka umthim thei puai; Chawldamna him ka nei pua’n; Buaina ngen a hung tung hi, ti in.