Read Vaiphei JOB 30 Bible Online

JOB 30 - Vaiphei bible

JOB 30

¹Tu’hin vang ka sâng ah chapang zaw te, a pateu bangma ka ngai lo; ka belam hon ching ah pang ka uichate sâng ah, bangma ka simlote chun tawtna’n ei mang ta mai ui.

²Amau ban thahâtna chu bang phatchuampi ding ka hem? A thakia ngen a hitau hi.

³Tâksap leh gilkial ziakin gamkeu leh, chulsa chu a khuat un;

⁴hampa lohing duate an ah ging in, munphi bawk in a kituam lum ui.

⁵Mite lak ah kipat nawmang in a um un; min gucha del ah a kiko khum gual un a kiko khum sek ui.

⁶Kenliang kawlhawm leh lei kawhawm leh, suangpi lak po in a giak ui.

⁷Gammâng ah sabiltung gual in a kiu veng vung ua, zakthâi buk lak ah te’n a kituak khawm sek ui.

⁸Mingol leh ngaituana bei chate a hiu ah, gam sung ah kipat zêp daw ah umte a hiu hi.

⁹Tu’hin vang, simmawna La ei sak khum tau ah; a pauchangthiatnau bep ka hita’i.

¹⁰Ei ki’dak un, gamla tak in ei pêl tau; ka mit mu ngei inle a chil uh a phijak sek ui.

¹¹Pathian in ka thalpi khâu a thamkol ah, ei sukzawngkhal ahi tâk ziakin, ka âng ah a nop a ning un a khuang tau ahi.

¹²Kil tin ah mite’n ei uibop un, ei tai sak un; ka thi’na ding a guanggal ui.

¹³Ka lampi a susiau ah, ka haksatna ei belap un, kuama’n ei sukdai piak puau hi.

¹⁴Awng thawl tak in a hung pawtdok un, ei chuanchil tau a.

¹⁵Lau umna’n ei chûm ah; ka za umna chu huizang gual in a leng mang ah, sûmpi gual in a mang tai.

¹⁶Tu’hin, ka hinna ka sung ah kipat lakdaw a hita’n, sukgentheina nite chun ei man chak tai.

¹⁷Jan leh ka gute’n ei chip ngut ngut un, ei pettu hin chol hun a nei puai.

¹⁸Thagum hat in ka puan in ei man ah, ka puanâk chual ngawng in ei tuchak hi.

¹⁹Buanthuak lak in ei seplut ah, leivui leh meivamte gual bep ka hi tai.

²⁰Ka hun ko ah, lei dawnhu pua’n; ka ding zing ah, lei mawk gâl et mai a.

²¹Ka chung in la nun a sia’n, la khut hat tak chun lei gawt tai.

²²Hui lei tawsak ah, thigawpi hat tak chu lei tawvêl sak tai.

²³Thi’na tiang ei tut ah, mihing zosia â ding ah, la guat In tiang chu ei tut ding la hi ti ka hia’i.

²⁴Mi tasam in vangsiatna a tuak lai tak ah, panpi’na a dot chun kuama’n a kilepsan ngai puai.

²⁵Haksatna tuakte â dingin ka kap sek hilo a hem? Migentheite le ka la thokpi pua a hem?

²⁶Himaleh, thilpha ka hawl lai in, thil phalo ka chung in a hung tung ah; vâk ka ngak lai in, thimna a hung tung hi.

²⁷Ka sunggil lam a buai ah, a chawlnga thei pua’n; gentheina hun in ei lamtua hi.

²⁸Nisa umlo’na thim lak in ka chia vêl vêl in, mi kikhopna’n panpi don in ka kikodok hi.

²⁹Ngeite suapipa leh vasakol, gualpha ka suak tai.

³⁰Ka vun a vom zo ta’n, a toltha zo tai; ka sung ah ka gute hi a kang lum hut hut hi.

³¹Ka theile chu lusûnna’n a chang in, ka lilu git chu kâna aw’n a chang zo tai.