Read Vaiphei JOB 31 Bible Online

JOB 31 - Vaiphei bible

JOB 31

¹Ka mitte tawh thuthung ka siam un; bangti’n em nungak ka et thei ding?

²Chung lam ah Pathian ah ka chanvo ding leh, sâng tak ah um Hat Chungnung Pathian ah kipat, ka gochan ding chu bang ahi diam?

³Midiklote chung ah vangsiatna leh, dukdak lo tak ah bawlte chung ah, siatna tung lo ding a hem?

⁴Ama’n ka lampi zosia a mu’n, ka kalsuan zosia a sim zing hilo a hem?

⁵Diklo tak ah a la um hin, ka keng a thepna lam zuan ah, jangkhai tak ah kalsuan ka la hi chun,

⁶bûkna dik tak in ei te’ unla, Pathian in ka dik zia he hen!

⁷Lampi nusia ah pêt mang hin, ka mit in a mu taphot ah lunggel mai a la hi’n, ka khut nasep ah demkâi a la hita leng,

⁸chuti a la hi chun, ka chi tu chu midang in ne hen la, kei â ding ah kekdok taphot chu, a zung ah kaldaw in um mai hen.

⁹Ka lunggil hi numei in a hipmang ah, ka Invengte kotkhak bul ah, mi châng ah a la pang kha, ka hi chun vâng,

¹⁰ka ji’n midang busuk piak hen la, pawsal dangte lupna’n giak ta hen.

¹¹Zia chu gitlona khawk tak, thi’na khop ah gitlona leh,

¹²Abaddon tiang ah kâng tum ding leh, ka bu ât ding zosia zung kaldaw ding chu ahi ngâl a.

¹³Ka suakpa a hem, ka suaknu a hem, ka chung ah a thasiatnau ka la kihiatlosak chun,

¹⁴Pathian a hung kipatdaw phat leh, bang tiding ka hi tam? Ei hun dong chil ten ta leh, bangti dawnhu ding ka hi tam?

¹⁵Sul sung ah keima ei siam pa ma ma khan, amau le a siam hitho lo a hem? Sul sung ah ei la guanggaltu kha, ama ma ma hilo a hem?

¹⁶Migentheite thildoi ka la piak nop lo ah, meithâite mittung lo ah ka la um ah;

¹⁷nauchagate pang lo ah kei ngen in, an ne ngai ka la hi chun,

¹⁸ka tanglak ah kipat amau ka la etkolna, pa gual ah ka la pan ziak leh; ka nu sul a kipat him ah le, meithâite kaibâttu ah a la pang ta ka hiziak in —

¹⁹Sil leh chên bei ah thi ding, ka mu khak kua hita leh, chuleh, sil ding nei lo ah chaga kua hita leh:

²⁰A lunggil tak ua ka chung ah kipak lo, ka belam mul puan lum ka sil sak lo kua a um ah;

²¹vaihawmna mun ah zo ding ka hi ti ka het ziak ah, nauchaga chung ah khut tha ka la hi chun,

²²zia gual chu ka la hi ngei ngei chun, ka dâk pêk hi ka liangko ah kipat in ketha mai hen la, ka khutbân hile tongtha mai hen.

²³Pathian ah kipat vangsiatna tuak ding chu, ka tizat lam tak ahiziak in leh, a lopina chu tuak ngam lo ding ka hi’ngâl a.

²⁴Sana chu kisuanpi ah, sana thiang ah kinga hin;

²⁵ka hausakna thupi ziak ah kipak ah, ka khut in a sepdaw nasat ziak ah kipak hi leng;

²⁶nisa a vaklai a la ho hi’n, thapi vâk hoi chia lai chu a la ho hi leng;

²⁷ka ngaituana hi a gukcha’ a la hipmang in, ka khut in ka kam a la huk hita leng chu;

²⁸zia chu vaihawmte gawtna tak ah dukdaklona ahi’n, chung lam ah um Pathian kilepsan a la hiding ka hi’ngâl a.

²⁹Ei mudate vangsiatna chung ah kipak a la hi’n, a chung ua siatna a tun kipakpi a la hileng;

³⁰hânsia a lawna ding ua pauchapna, ka kam a la mang sual hileng,

³¹ka puanbûk sung ah um te chunle, “Ama an ne kha lo kua a um ah a hem!” a la tiloleu chu vang;

³²malzinte chu khawlai dung in ka giaksak kha pua’n, khualzinte â dingin ka kotkhak, ka la hon piak nuam lo kha diak puai.

³³Midangte gual in ka sukkhialnate sêlgu nuam in, ka dukdaklona ka sung ah îmgu’n;

³⁴mipi tam tak âng ah din jachât ziak leh, Inkuanpite ei mu tawm ding lau ziak ah; thip bik bek ah kotkhak ah le, dakdok ngam lo ka hi chun;

³⁵Aw! Ka thugen ngaitha ding, mi khat bêk um ta maleh chu aw! (Ka panna chu zia hih ahi! Hat Chungnung Pathian chun hun dawnhu hen! Aw, ka kinialpipa’n ei nialna, a zikdaw chu nei ta ma leng aw!)

³⁶Ka liangko in pu’ng ka tin, chuleh, lallukhuk gual in, ka lujang in khit den ing ka tin;

³⁷ka kalsuan jat nasan hil ing ka tin, lengpa chapa gual in a kiang lam nai ing ka.

³⁸Ka gam chun ei doi lo ah kiko ahi ah, a jawtlamte le kap khawm a hiu chun,

³⁹a man pe lo ah a lei gate ne ka hi ah, a neipa thi khawlaw saktu ah pang ka hi chun,

⁴⁰gehu thasâng in hampa lingneite kek mai zawu hen la, barli thasâng in lobuangte kek zaw mai uh hen. Job thugen chu a tawp tai.