Read Vaiphei JOB 33 Bible Online

JOB 33 - Vaiphei bible

JOB 33

¹Aw Job, tu’hin ka thugen hi a la ngai inla, ka gen zosia hi gunchu tak in a la ngaitua tiam in.

²En in, ka kam ka’n, ka lei in thu a gen hi.

³Ka thugen hin ka lungthim a dik dan tak a taklang in, ka mûk in ka het dan dik tak in a gen hi.

⁴Pathian thagau chun ei siam ah, Hat Chungnung Pathian in hu thâ khum in hinna ei piai.

⁵Gen ding la het leh ei dawnhu in; ka âng ah hin la thugen dingte chu, siam tuak inla, pan hun la’n.

⁶Ngai in, Pathian mit mu in nang leh kei kibang I hi; keile tungman tâng khat ah siam tho ka hi.

⁷Keima lei tizat ua launa ding a um puai; hun chuti awimaw lo ding ka hi.

⁸Ka het in la gen ta’n, la thugen le ka he tai.

⁹Nang in, “Bangma ka bawl khial pua’n, keima ah dukdak lona a umlo ziakin, ka thiangtho in, demkai lo ka hi.

¹⁰En in, ei demna ding bep hawl ahi, a mêlma gual ah ei ngai ah;

¹¹ka kengte chu kol ei busak a, ka tawidan zosia ei chingsui mai mai ahi,” la ti’n.

¹²Himaleh, zia thu ah hin vang la dik puai. Hun dawnhu ing ka: Pathian chu, mihingte cheng sâng in a lopi zawi.

¹³“Ka thugen kam khat inle ei dawnhu puai,” ti ah, bang ding ah Pathian dem la hi em?

¹⁴Mihingte’n a la helo maleu le, Pathian in vang lampi khat leh, ni in thu a gen sek hi.

¹⁵Mihingte tui tak ah, a khum laijawl ua a i-mut lit lit lai un, mang lam leh jan kilâkna’n,

¹⁶a nakhang uh hon piak in, a vaulawknate chu a tizatsak sek in,

¹⁷a thilbawl phalo teu a haisan ua, a kiletsak theilona ding uh leh,

¹⁸Siatna Khuk thim ah kipat a thagau uh hukdaw a um ua, a hinkhuau chun thi’na Luipi, a gâl kâi theina dingin a hil sek hi.

¹⁹A khum laijawl chung ua natna’ thunun ah um in, a gu zosiau ah natna umsak in,

²⁰an nasan du lo a luaksuak in, an tui tak tak te le a dunau a bei sek in.

²¹A taksau nasan muthei lo ding khop in a gawnsak ah; a guu le tiangkang a bang zo tai.

²²Thi’na Khuk thim lam a manaw tau a, a hinnau in manthaina lam chu a nai tul tul hi.

²³Ama chu a dik hi ti ah panpitu leh genjak piak dingin, vansawlchâk a palai ding, sang khat lak ah pakhat bêk um hihen la,

²⁴ama lainat in doisak ma ma in, “Thi’na ko’tang ah kipat in hun hukdok un, ama kitatna ding ka mudok tai;

²⁵a phe leh vo le hung mâm kit hen la, a vanglai hun ah a hatna kha hung kile’kit hen,” ti hen la.

²⁶Zia gual chun Pathian kiang ah pauchap hen la, a la pom piak ta leh; a kiang ah lim tak in hung intin, a dikna tawh kiphu tak in, Pathian in dit in a.

²⁷Zia mipa chun midangte kiang in, “Ka la bawl khial ta’n, a dik chu ka la pêt mangsan ta’n; ahi’n la, thuk in ka um puai.

²⁸Thi’na ko’tang ah lut ding lai ei hukdok in, ka hinna hin vâk mu kit ding ahi tai,” ti’n La a sak khum hi.

²⁹Pathian in mihingte kiang in, nivei thumvei tiang zia gual hin a bawl sek hi,

³⁰Thi’na ko’tang ah kipat a hukdaw ah, hinna vâk a mu kit theina ding un.

³¹Aw Job, ngai pha’n la, gunchu tak in ngai tha’n, thipbek in um inla, hun gen ing ka.

³²Gen ding la nei leh ei dawnhu in; gen in, thiam hun chansak nuam ka hi.

³³Ahiloleh, ka thugen hi ngai hiat hiat in, thipbek in um inla, pilna thu hun hil ing ka.