Read Vaiphei JOB 34 Bible Online

JOB 34 - Vaiphei bible

JOB 34

¹Elihu in zia gual hin a gen zui pek a:

²Aw mipilte haw, ka thugen hi a la ngai unla, hetna neite haw, la bil uh hun daw un:

³lei in an a tui leh tui lo a het gual in, bil in thu kigente chu a patep ngâl a.

⁴A dik chu kitêl chiat hitiu, ei haw’n a pha chu hawl hitiu.

⁵Job in, “Kei chu midik ka hi’n, Pathian in ka dikna a kihet lo sak in;

⁶dik hi’na pi’n zuauthei ah ei ngaw ah, bawl khial nei lo hi’na pi’n, sukdam thei lo ding khop ah hinat ka hi,” a ti’ngâl a.

⁷Job tawhbang ah musitna’ tui gual ah dawn ah,

⁸thil phalo bawlte kitonpi ah, mi nunsiate tawh kiton mi kua dang a um him em?

⁹Ama’n, “Pathian chung ah kipak tak ah um hi, mihing â dingin a phatchuamna bangma a um puai,” a ti’ngâl in.

¹⁰Ziaziakchun, nanghaw, ngaituana neitheite haw, ei ngaithau in; Pathian chun phalo tak in bawl pua’n tin, Hat Chungnung Pathian chun, diklo tak in bawl talojen in a.

¹¹Mi te’n a thilbawl dungjui chiat un thuk in, mi tin a khawsak dan tawh kituak chiat in, a chung un tunsak ding ahi ngâl a.

¹²A dik tak ah chun, Pathian in diklo tak in bawl pua’n tin; Hat Chungnung chun a dik chu, diklo lam in heikawi maijen pua’n a.

¹³Kua a hem ama kiang ah lei chung ah thuneina pedok, khawvel pumpi ama khut ah nga chu kua a hem?

¹⁴Ama’n a thagau kilak kit in, a hu tha khum zosia lakhawm kit leh,

¹⁵hinna nei zosia mangthai intin uh, mihing zosia hi leivui suak kit mai ding ahi ngâl un.

¹⁶Hetthiamna nei la hi chun, zia ka thugen hi a la ngai tha tiam in.

¹⁷Thudikna doilote chun vaihawm ngai ding a hiu em? midik leh hat tak chu thiamlo chansak ding la hem?,

¹⁸lengpa kiang ah, “Mi dukdaklopa,” ti ngam ah, leng chapate kiang ah le, “Mi nunsiate haw,” ti ngam ah,

¹⁹milian leh lal a himan ua doisak chuam lo leh, michaga sâng ah mihausa ngaisak chuam diaklote chu, thiamlo chansak ding la hi em? A leng ua ama khutsuak ahi sik sek ngâl un.

²⁰Mitphet kâl sung in a thiu ah; jan kal in mite chu kithing in a mangthai mai un, mihat chule khut thâk khum ngai lo ah, lak mang in a um mai sek ui.

²¹Mihingte umdan zosia a entha zing in, a kalsuan zosiau le a mu suak ngâl a.

²²Thil phalo bawlte kisêlmang theina ding khop ah, thim nasa a um paw’ngâl a.

²³Pathian vaihawmna mun ah mihingte chiana ding hunbî, guat piak ahi paw’ngâl a.

²⁴Mi hatte chu a chung thuu, ngaitua zui um se’ se’lo in a sutawp ah, amau mun lua dingin midangte a koi ngâl sek hi.

²⁵Ziaziakchun, a thilbawl dan zosiau a het ziakin, jan kâl in a lekkhup ah, a khen gawp tai.

²⁶Midangte mit mu in a nunsiatna ziak un a jep in,

²⁷ama nusia ah, a dante a ngaisak lo ziak un,

²⁸a navekna khop ding ah, chagate thum leh mau ah umsak ziak un, nuaisia ah umte kâ thawm chu la he ta’ngâl a.

²⁹A la thip hiat hiat leh, kua a hem awimaw thei diak ding? A mai ah sêl mang leh kua nam hi’n, kua mimal hileh a mudok zo ding kua a hem um?

³⁰Pathian helote leh mipi thâng ah awksate’n, vai a hawm lona ding un.

³¹Kua’n a hem Pathian kiang ah: “Gawtna ka thuak tai, thil phalo bawl kit ta pua’ng ka;

³²ka hetphâk lo chu ei hil inla, a la bawlkhial ta ka hi chun, bawl kit ta pua’ng ka,” a ti ngai em?

³³La la nial tak ziak ah, la lung lam tak ah hun thuk bek ding a hem? Keima hilo in, nang in la têl ding a hizaw ngâl ah; ziaziakchun, la het chu hun gen ta’n la.

³⁴Mi lunggêl mite leh mipil, ka thugen he te chun,

³⁵“Job hin hetthiamna bei ah, ngaituana neilote gual ah, thu mawk gen ziang ahi,” ei tipi ngei ngei in au.

³⁶Job hin mi nunsiate gual ah, mawk pau pau ahi dan tak hi, suklat hileh ka ti na e!

³⁷A gitlona belap in a hel nalai sêt ah; I lak un a khut a bêng ah, Pathian a nialna paukam a sêkdok tam nalai hi.